1 ATEPTAP PEETUUSYEK 22 - BUKUIT NE TILIIL Sireet ne Dutero Kanon

¹ Ki le anyun Daudi, “Ni ko kootap Kamuktaindet ne po Toroornatet, ak ni ko kaptisisyetap kagoochinet ne kibeelei, ne po Israel.”

Chobutigap Daudi agobo teekseetap Hekaluut

² Ki ng'at Daudi kiyum punootik che ki mi emetap Israel, ak ki inde musogik che waei koik kowai koik si keteege kootap Kamuktaindet.

³ Ki chop Daudi kariik ng'iisyat koek kipchumarisyek che po kereiywegap ormariichok, ak che po ole kituiyechin; kobooto sugunonik ng'iisyat che ma iitoksei.

⁴ Ki chop kora taragonik che ma iitoksei, amu ki ipchi piigap Sidon ak che po Tyro Daudi taragonik ng'iisyat.

⁵ Ki le Daudi, “Ta ko ming'in weeriinnyu Solomon, ak ko etyet, ak nyolu kogararanit miising' koot ne keteekyin Kamuktaindet ne Toroor, konyoor tagunateet ak toroornatet eng' emotinwek tugul. Ko uu nooto anyun achopchini tuguuk koyooto.” Kochop anyun Daudi tuguuk ng'iisyat kotom kome.

⁶ Ki kuur weeriinnyi Solomon anyun ak kong'at ineendet koteekyi koot Kamuktaindet ne Toroor, Kamuktaindetap Israel.

⁷ Ki leenji `Daudi Solomon weeriinnyi, “Kimi muguleldanyu ateekyi koot kainetap Kamuktaindet ne Toroor Kamuktaindennyu.

⁸ Ago ki nyoonjo ng'olyootap Kamuktaindet ne Toroor, koleenjo: ‘Ki itumde korotiik che chaang' miising', ak iyai lugoosyek che eecheen. Meteekyini koot kainennyu, amu ki itumde korotiik che chaang' eng' ng'wony eng' tainnyu.

⁹ Keero, tuun kisigun weeriit, ne egu chiitap kamuung'et, ak agoochini ineendet kamuung'et eng' puunikyik tugul che mi komoswek tugul. Tuun kiguure kainennyi Solomon, ak agoochi Israel kaalyeet ak kamuung'et eng' peetuusyekyik.

¹⁰ Teekyin ineendet koot kainennyu. Egu ineendet weeriinnyu, ak aegu kwandanyi. Ak agimiit ng'echereetap laitornatet ne po pounatennyi eng' Israel koigeny.’

¹¹ Ara anyun, weeriinnyu, ingotep Kamuktaindet ne Toroor kobooten, ak iboor ak iteech kootap Kamuktaindet ne Toroor Kamuktaindeng'ung', ko uu ye ki komwa agobo inyee.

¹² Ingogoonin Kamuktaindet ne Toroor kaguiyet ak naet, ak kogoonin ng'atuutyet agobo Israel, si kobiit iriip ng'atuutyetap Kamuktaindet ne Toroor Kamuktaindeng'ung'.

¹³ Ibore anyun, ngot iriip ak iyai kosupkei ak ng'atuutik ak kirwoogutik che ki iyomis `Kamuktaindet ne Toroor Musa agobo Israel. Kimitu ak nyiganitu. Meiywei anan itoptoben.

¹⁴ Keer anyuno, ki achopchi kootap Kamuktaindet ne Toroor eng' nyalildanyu talendaisyek eliphuusyek pogol che po thahabu, ak talendaisyek milonit agenge che po fedha; kobooto sugunonik ak kariik che ma iitoksei, amu ng'iisyat. Ki achop keetiik ak icheek ak koik. Ak imuuchi kota ites alak.

¹⁵ Itinye kogeny kiboitiinik che chaang' kot, waigap koik ak che poisyee koik ak keetiik, ak piik tugul che ng'oomen eng' poisyet age tugul,

¹⁶ ma iitoksei thahabu ak fedha, sugunonik ak kariik. Ng'eet anyun poisye, ak ingotep Kamuktaindet ne Toroor kobooten.”

¹⁷ Ki ng'at kogeny `Daudi pounik tugul che po Israel kotoret weeriinnyi Solomon, koleenji,

¹⁸ “Tos ma mi kobootok Kamuktaindet ne Toroor Kamuktaindeng'wong'? Ak ma koonok kamuung'et eng' komoswek tugul? Amu ki inde eunnyu piik che menyei emoni, ak ki kiterteer emet eng' taitap Kamuktaindet ne Toroor, ak eng' taitap piikyik.

¹⁹ Ara anyun, ochop mugulelwekwok ak saboonwekwok, ocheeng' Kamuktaindet ne Toroor Kamuktaindeng'wong'. Ong'eetyee anyun, oteech ole-tiliil ne po Kamuktaindet ne Toroor Kamuktaindeng'wong', si oibu moingetap arorutyetap Kamuktaindet ne Toroor ak tuguuk che tiliileen che po Kamuktaindet, kobwa koot ne kiteekyin kainetap Kamuktaindet ne Toroor.”