1 ATEPTAP PEETUUSYEK 20 - BUKUIT NE TILIIL Sireet ne Dutero Kanon

Kiterteeri Amonik

¹ Ak ye ki neegit kogeskei kenyiit, eng' peetuusyek che ki cham kobendi laitorinik lugeet, komut Joab nyigoonigap lugeet. King'em emetap lagogap Ammon ak kobwa koyiem Rabbah. Ago ki tebi Daudi eng' Jerusalem. Ak ki par Joab Rabbah, kowong'.

² Ki inem Daudi naaryeetap laitoryannywa eng' metinnyi, ak ki keer kole yamegei ak keruutik sosom ak muut che po thahabu, ak kimi koik che po kamanuutyet ne oo eng' oriit; ak ki kigerchine metit Daudi. Ki ip parunenik che chaang' kot che po nganaseet komong'.

³ Ak ki imut piik che ki mi nganaseet komong', ki igoochi icheek kobois komurmure musumenosyek ak kariik che kiburburene mbareenik ak aonok. Ak ki yachi Daudi ko uu nooto nganasook tugul che po lagogap Ammon. Ki week anyun Daudi ak piik tugul koba Jerusalem.

Paretapkei ak Philistiik

⁴ Kingo pata niito, kong'eet pooryeet eng' Gezer kobargei ak Philistiik. Ak ki par Sibekai Husatindet Sipai, agenge eng' weeriigap chiito chemosit, ak ki kiterteer pichooto.

⁵ Ki piit kogeny lugeet ak Philistiik, ak ki par Elanan weeriitap Jair Lami ng'eetap kametap Goliat Gitindet, ne ki kergei irumetap ndirinnyi ak keetit ne oo ne taachin usiisyek chiito ne nabisyei.

⁶ Ki piit lugeet kogeny eng' Gath, ole ki mi chiito ne kooi kot, ne ki tinyei morik tiptem ak ang'wan, ki lo eng' euut age tugul, ak ki lo eng' keeldo age tugul; ak ki kisige agine chiito chemosit.

⁷ Ak ye kingo reeny ineendet Israel, kobar Jonathan weeriitap Simea ng'eetap kametap Daudi.

⁸ Ki kisikyi pichuuto chiito chemosit eng' Gath, ak ki par Daudi ak otwogikyik pichooto.