1 ATEPTAP PEETUUSYEK 19 - BUKUIT NE TILIIL Sireet ne Dutero Kanon

Kobaregei Daudi ak Amonik ak piigap Syria

¹ Kingo pata niito, kome Nahas laitoryatap lagogap Ammon, ak ki laitoran weeriinnyi kogeer ineendet.

² Ki le Daudi, “Ayachini ne myee Hanun weeriitap Nahas, amu ki yaiywo ne myee kwandanyi.” Ki iyookto anyun Daudi piik koba kogaigai ineendet, amu kwandanyi. Ak ki it otwogigap Daudi emetap lagogap Ammon kap Hanun, koba kogaigai ineendet.

³ Ago ki leenji pounigap lagogap Ammon Hanun, “Ibwaati ile konyiti Daudi kwandang'ung', kot koyogun kagoigoik? Tos ma pwa otwogikyik kobwa ole imi, kosyach, kosegei ak kobar emet?”

⁴ Ki nam anyun Hanun otwogigap Daudi, konem tamnokwak, kotil ngoroikwak komut kwenut koboochit ngorook, ak kounda koba.

⁵ Koba anyun piik alak, komwachi Daudi kiit ne ko ki yachi pichooto. Ki iyookto piik kotorookta, amu kiga konyoor teweernateet pichooto miising'. Ki leenji laitoryat, “Otebi eng' Jeriko agoi kobiityo tamnokwok, ye ibata, obwa.”

⁶ Kingo keer lagogap Ammon kole kagoyaagitu icheeget eng' Daudi, koyookto Hanun ak lagogap Ammon talendaisyek eliphuut agenge che po fedha koale kariisyek ak piik che ketei paraisisyek eng' Mesopotamia, ak Aram-maaka ak Soba.

⁷ Koaljigei anyun kariisyek eliphuusyek sosom ak aeng', kobooto laitoryatap Maaka ak piikyik, che ki pwa koteech taitap Medeba. Ak ki iyumgei lagogap Ammon komong' eng' nganasookwak, kobwa koyai lugeet.

⁸ Kingo kas Daudi, koyookto Joab ak lugeet tugul ne po murenik che kiimeen.

⁹ Ki pwa lagogap Ammon ak kotet lugeet eng' ormariichetap nganaseet ak ko ki mi laitorinik icheegei warenget che kiga pwa.

¹⁰ Kingo keer Joab kole kagetet lugeet agobo ineendet eng' tai ak let, kokwei murenik che ki kilewen che po Israel, ak kotet kobargei ak piigap Syria.

¹¹ Ki inde piik che kiga ng'et, eutap Abisai, ng'eetap kamet, kotetkei icheek si kobargei ak lagogap Ammon.

¹² Ki le Joab, “Ngot kogimegitu piigap Syria koterteera, itoreta; ago ngot kogimegitu lagogap Ammon koterteerin, atoretiin.

¹³ Nyiganitu, ngeegu murenik agobo piikyok, ak nganasoogap Kamuktaindennyo. Ingoyai Kamuktaindet ne Toroor ko uu ye keerei kole myee.”

¹⁴ Kiriikta anyun Joab ak murenik che ki mi ak ineendet koba lugeet kobargei ak piigap Syria, ak ki mwee ineendet.

¹⁵ Kingo keer lagogap Ammon kole kagomwei piigap Syria, komwei ak icheek eng' taitap Abisai ng'eetap kametap Joab, ak ki pa nganaseet. Ki nyo anyun Joab Jerusalem.

¹⁶ Kingo keer piigap Syria kole kagiterter icheek eng' taitap Israel, koyookto piik, koba koguur piigap Syria che ki mi aineet pitoniin, kobooto Sopak kiptaiyatap lugeetap Hadareser ne ki indoe icheek.

¹⁷ ki ngemwachi Daudi agobo niito, koyum Israel tugul ak kilandae Jordan, kiche icheek ak kotet lugeet kobargei ak icheek. Kitet anyun Daudi lugeennyi si kobargei ak piigap Syria, ki yai icheek lugeet ak ineendet.

¹⁸ Ago ki mwee piigap Syria Israel, ak ki par `Daudi piigap Syria eliphuusyek tisap che po kariisyek, murenik eliphuusyek artam che punei keelyek. Ki par kora Sopak kiptaiyatap lugeet.

¹⁹ Kingo keer otwogigap Hadareser kole kagiterter icheek eng' taitap Israel, koyai kaalyeet ak Daudi ak koot ineendet. Ara mata kocham piigap Syria kotoret lagogap Ammon kogeny agoi.