1 ATEPTAP PEETUUSYEK 18 - BUKUIT NE TILIIL Sireet ne Dutero Kanon

Lugoosyek ak katerteerisyosyegap Daudi

¹ Kingo pata niito, kobar Daudi Philistiik ak koterteer icheek, ak kirebe Philistiik Gath ak nganasookyik.

² Ki iterteer kora Moab, ki ek Moabik otwogigap Daudi ak koip kagoochinoik.

³ Ne siire nooto kogibar Daudi Hadareser laitoryatap Soba eng' Hamath, ye kingo wendi kogimiti pounatennyi eng' ole neegitee aineetap Yufrets.

⁴ Kirebe Daudi ineendet kariisyek eliphuut, murenik eliphuusyek tisap che ki laanyei paraisisyek, ak che kibunei keelyek eliphuusyek tiptem. Ki ep Daudi kutung'oigap paraisisyek, ago ki ituuch eng' chooto che yamei kariisyek pogol.

⁵ Ki par `Daudi piigap Syria che menyei Damasko piik eliphuusyek tiptem ak aeng', che kibwonei kole kotoret Hadareser laitoryatap Soba.

⁶ Ki inde anyun Daudi riibiik Syria ne po Damasko, ki ek piigap Syria otwogigap Daudi, ak ki ip kagoochinoik. Ki igoochi Kamuktaindet ne Toroor Daudi katerteeret eng' komosta age tugul ne ki wo.

⁷ Ki ip Daudi long'onigap thahabu che ki tinyei otwogigap Hadareser kobwa Jerusalem.

⁸ Ki ip Daudi sugunonik che chaang' eng' Tibat ak Kun, nganasoogap Hadareser, che kiyae Solomon nyanjet ne po sugunwet, tolochik ak tuguuk che po sugunonik.

⁹ Kingo kas Tou laitoryatap Hamath kole kogobar Daudi lugeet tugul ne po Hadareser laitoryat ne po Soba,

¹⁰ koyookto Hadoram weeriinnyi kwo kaplaitoryat Daudi, kwo kogat ineendet ak koberuur, amu kiga pargei ak Hadareser ak kobar ineendet. Kiga kobargei Hadareser ak Tou konyil che chaang'. Ki tinyei Hadoram tereenik alak tugul che po thahabu ak fedha ak sugunonik.

¹¹ Ki itabaanji Daudi Kamuktaindet ne Toroor tuguuchuuto ak icheek, kobooto fedha ak thahabu che ki ibune pororyosyek tugul: eng' Edom ak Moab, eng' lagogap Ammon ak eng' Philistiik, ak eng' Amelek.

¹² Ki par kogeny Abisai weeriitap Zeruiah piigap Edom eliphuusyek taman ak sisiit eng' Atebweetap Munyuk.

¹³ Ki inde riibiik Edom, ak ki ek Edomik tugul otwogigap Daudi. Ki igoch Kamuktaindet ne Toroor Daudi katerteeret eng' komosta age tugul ne ki wo.

¹⁴ Ki laitoran Daudi eng' Israel tugul; ki irwookyi piikyik tugul eng' lititindo ak iman.

¹⁵ Ki pou Joab weeriitap Zeruiah lugeet; ak kisiriindetap tuguuk che piitu Jehoshaphat weeriitap Ahilud.

¹⁶ Ki tisiik Zadok weeriitap Ahitub ak Abimelek weeriitap Abiathar; ak ki siriindet Sabsa;

¹⁷ ki pou Benaiah weeriitap Jehoiada Keretik ak Peletik; ak ki che eecheen weeriigap Daudi che ki tebee ye neegitee laitoryat.