1 ATEPTAP PEETUUSYEK 15 - BUKUIT NE TILIIL Sireet ne Dutero Kanon

Lewenetap piik agobo ibunetap Moinget

¹ Ki teekyigei Daudi kooriik eng' nganaseetap Daudi, ki chop ole tebee moingetap Kamuktaindet ak kolumdochi moingonooto emait.

² Yeityo kong'at Daudi kole, “Ma nyolu koip chii age tugul moingetap Kamuktaindet kobatee Lawiik icheegei, amu ki kolewen `Kamuktaindet ne Toroor icheek koip moingetap Kamuktaindet ak koboisyechi ineendet koigeny.”

³ Ki iyum `Daudi Israel tugul eng' Jerusalem si koip moingetap Kamuktaindet ne Toroor kotogos konyo komostanyi ne kiga kochopchi ineendet.

⁴ Ki iyum `ineendet weeriigap Aron kobooto Lawiik:

⁵ che po weeriigap Kohat, ne oo ko ki Uriel, ak tupchosyekyik pogol ak tiptem;

⁶ che po weeriigap Merari, ne oo ko ki Asaiah, ak tupchosyekyik pogol aeng' ak tiptem;

⁷ che po weeriigap Gershom, ne oo ko ki Joel, ak tupchosyekyik pogol ak sosom;

⁸ che po weeriigap Elizaphan, ne oo ko ki Semaiah, ak tupchosyekyik pogol aeng';

⁹ che po weeriigap Hebron, ne oo ko ki Eliel, ak tupchosyekyik tamanwogik sisiit;

¹⁰ che po weeriigap Uzziel, ne oo ko ki Aminadab, ak tupchosyekyik pogol ak taman ak aeng'.

¹¹ Ki kuur `Daudi tisiik Zadok ak Abiathar, ak koguur Lawiik: Uriel, Asaiah, Joel, Semaiah, Eliel ak Aminadab.

¹² Ki leenji icheek, “Oo kandoigap kooriigap kwanisyek che po Lawiik. Otiliilgei okweek ak tupchosyekwok si oibu moingetap Kamuktaindet ne Toroor, Kamuktaindetap Israel, kotogos konyo komosta ne koachopchi.

¹³ Amu ki ma oip okweek yuginye, kobar anyun Kamuktaindet ne Toroor, Kamuktaindennyo, chiito eng' acheek amu ki ma ki cheeng' ineendet ko uu ye ki king'at.”

¹⁴ Ki itiliilgei anyun Tisiik ak Lawiik si koip moingetap Kamuktaindet ne Toroor, Kamuktaindetap Israel, kotogos.

¹⁵ Ki ip lagogap Lawiik moingetap Kamuktaindet eng' tigigoikwak eng' keetiik che ki ibe, ko uu ye kiga ng'at Musa ko uu ng'olyootap Kamuktaindet ne Toroor.

¹⁶ Ki mwachi Daudi che eecheen che po Lawiik kolewen tupchosyekwak tyeniik, ak tuguuk che kibutei, che chooto ko kibugandinik, ketubosyek sanisyek che po sugunonik che kibirei kebut kocheiyo miising', ak kotyenso eng' kagasetapkei.

¹⁷ Ki lewen anyun `Lawiik Herman weeriitap Joel; ak eng' tupchosyekyik, kolewen Asaph weeriitap Berekiah; ak eng' weeriigap Merari tupchosyekwak, kolewen Ethan weeriitap Kusaia;

¹⁸ ak ki mi kobooto icheek tupchosyekwak che kirubei icheek eng' etunateet: Zekariah, Ben, Jaasyel, Semiramot, Jehiel, Uni, Eliap, Benaiah, Maseia, Matitia, Elipeleu, Mikneia, Obed-edom ak Jeiel riibiigap kurgotik.

¹⁹ Tyeniik anyun ko ki Herman, Asaph, ak Ethan, che ki tinyei sanisyegap sugunonik che kibirei kocheiyo miising';

²⁰ kobooto Zekariah, Asyel, Semiramot, Jehiel, Uni, Eliap, Maaseia ak Benaiah, che ki tinyei kibugandinik che po cheetap Alamot,

²¹ ak Matitia, Elipeleu, Mikneia, Obed-edom, Jeiel ak Azaziah che kibutei ketubosyek che po cheetap Seminit, si kondochi.

²² Ki pou Kenania, ne oo eng' Lawiik, tyenwogik; ki ineeti piik tyendo, amu ki utaat ineendet.

²³ Ki riibiigap kurgeetap ole ki mi moinget Berekiah ak Elkanah.

²⁴ Ki kuut iryagook eng' taitap moingetap Kamuktaindet tisiik: Sebania, Josapat, Nethanel, Amashai, Zekariah, Benaiah ak Elieser. Ki riibiigap kurgeetap ole ki mi moinget Obed-edom ak Jeia.

Keibu Moinget konyo Jerusalem

²⁵ Ki wo anyun Daudi kobooto poisyegap Israel ak kiptainik che ki pou eliphuusyek, koba koip eng' kagasetapkei moingetap arorutyetap Kamuktaindet ne Toroor kotogos eng' kootap Obed-edom.

²⁶ Kingo kagotoret `Kamuktaindet Lawiik che ki ibei moingetap arorutyetap Kamuktaindet ne Toroor, koeny kiruugik tisap ak mengichik tisap.

²⁷ Ki ilaachi Daudi ngoryeet ne po katanit ne karaaran, kobooto Lawiik tugul che ki ibei moinget, ak tyeniik, ak Kenania kandoindetap tyeniik. Ki ilaachi kora Daudi ephod ne po katanit.

²⁸ Koip anyun `Israel tugul moingetap arorutyetap Kamuktaindet ne Toroor kotogos kogasanugei eng' tuugeet ne oo, ak koguutonu iryagook, ak kobironu sanisyek che po sugunonik, ak kobutonu kibugandinik ak ketubosyek.

²⁹ Kingo it `moingetap arorutyetap Kamuktaindet ne Toroor nganaseetap Daudi, koiitito Mikal cheptap Saulo eng' tirisia, kogeer Daudi kourereni ak kogasigei; ki sas ineendet eng' muguleldanyi.