1 ATEPTAP PEETUUSYEK 14 - BUKUIT NE TILIIL Sireet ne Dutero Kanon

Komi Daudi Jerusalem ak teekseetap koonnyi

¹ Ki iyookto `Hiram laitoryatap Tyro piik koba kap Daudi koipchi taragonik; kiyookyi piik che waei koik ak musogigap pagoinik koba koteekyi ineendet koot.

² Ak ki nai Daudi kole kogogimiit `Kamuktaindet ne Toroor ineendet koek laitoryatap Israel amu ki kitoroor laitornatennyi, amu piikyik Israel.

³ Ki itun Daudi osotik alak eng' Jerusalem, ak ki sich weeriik ak tiibiik alak.

⁴ Chu ko kainaigap lagok che kisichei eng' Jerusalem: Samua, Sobap, Nathan, Solomon,

⁵ Ibar, Elisua, Elpelet,

⁶ Noga, Nepeg, Japia,

⁷ Elisama, Beeliada ak Eliphelet.

Koterteeri Daudi Philistiik

⁸ Kingo kas Philistiik kole kogiil Daudi koek laitoryatap Israel tugul, kotogosta Philistiik koba kocheeng' Daudi, ak ki kas Daudi ak kwo kobargei ak icheek.

⁹ Kiga kobwa Philistiik kobookyi atebweetap Repaim.

¹⁰ ki teebee Daudi Kamuktaindet koleenji, “Atogoste awe kebarge ak Philistiik? Tos inde eunnyu icheek?” Ki leenji `Kamuktaindet ne Toroor ineendet, “Togoste, amu andoi icheek eung'ung'.”

¹¹ Kotogos anyun kobwa Baal-perasim, ak ki parchi `Daudi icheek yooto. Ki le ineendet, “Kagoiyesta Kamuktaindet puunikyuk eng' eunnyu, ko uu peek che iyestoi.” Koguure anyun kainetap koronooto Baal-perasim.

¹² Kiga pagage olooto kanamonikwak, ak ki ng'at Daudi kebel, ak ki kibeel eng' maat.

¹³ Kita kobookyi kogeny atebwonooto Philistiik.

¹⁴ Ak kiteebe Daudi kogeny Kamuktaindet, ak ki leenji `Kamuktaindet ineendet, “Amat itogoste isup icheek, ui taban si ichee icheek eng' ye itoorchingei keetiigap logoek.

¹⁵ Ak ye igas cheetap panda eng' keetichooto po logoek parak, iwe anyun obargei, amu kagondoenen Kamuktaindet kwo kobar lugeetap Philistiik.”

¹⁶ Ki yai Daudi ko uu ye ki ng'at `Kamuktaindet ineendet; ki par lugeetap Philistiik kobooch Gibeon agoi Gezer.

¹⁷ Ki yom emotinwek tugul tagunatetap Daudi ak ki igoochi Kamuktaindet ne Toroor pororyosyek tugul koywei ineendet.