1 ATEPTAP PEETUUSYEK 13 - BUKUIT NE TILIIL Sireet ne Dutero Kanon

Kiutoi Moinget eng' Kiriath-Jearim

¹ Ki inaisechigei Daudi ak kiptainigap eliphuusyek ak che po pogolusyek, ak kandoindet age tugul.

² Ki leenji Daudi tuiyet tugul ne po Israel, “Ngot ogeere ole myee eng' okweek, ak ngot kobunu Kamuktaindet ne Toroor, Kamuktaindennyo, ogany kiyookte tupchosyekyok che kang'et eng' komosta age tugul ne mi emet tugul ne po Israel, kobooto Tisiik ak Lawiik che mi ak icheek nganasookwak che tinyei ole kiyagisye.Ongiyookte koyumgei ak kobwa ole kimi.

³ Ongeibu kogeny moingetap Kamuktaindennyo konyo ole kimi, amu ki ma kimage kiy moingonooto eng' peetuusyegap Saulo.”

⁴ Ki iyan tuiyet tugul kole yaei ko uu nooto, amu ki myeiit kioto eng' taitap piik tugul.

⁵ Koyum anyun Daudi tuiyet tugul ne po Israel, kobooch Sihor aineetap Misiri kot koit ole kimandoe Lebo-hamath, koip moingetap Kamuktaindet eng' Kiriath-Jearim.

⁶ Ki togosta Daudi kobooto Israel tugul koba Baala yooto ko Kiriath-Jearim, ne ki po Judah, koip eng' olooto moingetap Kamuktaindet, Kamuktaindet ne Toroor ne tebee kerubisyek, ne kimwaitoe kainanooto.

⁷ Ki ibune moingetap Kamuktaindet chepkichutit ne kita ko leel, komong' eng' kootap Abinadab. Ki kweri chepkichutinooto Uzzah ak Ahio.

⁸ Ki ureren Daudi kobooto Israel tugul eng' taitap Kamuktaindet eng' kimnateennywa tugul, eng' tyenwogik, ketubosyek, kibugandinik, sugutisyek che mengeechen, sanisyek che po sugunonik che kibirei ak iryagook.

⁹ Kingo it rwanyut ne kiboorsee ne po Kidon, koyogooito eunnyi Uzzah kole koti moinget amu kiterteryot eiik.

¹⁰ Ki nereekyi kot `Kamuktaindet ne Toroor Uzzah ak ki par ineendet amu ki iyogoito eunnyi konam moinget. Kime eng' yooto eng' taitap Kamuktaindet.

¹¹ Ki nereech kot Daudi amu ki par eng' nereegek Kamuktaindet ne Toroor Uzzah. Ak kiguure yooto Peres-usa agoi ra.

¹² Ki iywei `Daudi Kamuktaindet peetuunooto ak kole, “Amuktoi ano aip moingetap Kamuktaindet konyo kaa ole ami?”

¹³ Mata koip anyun Daudi moinget kwo oldanyi eng' nganasennyi, ago ki imaas kwo kootap Obed-edom Gitindet.

¹⁴ Ki tebi moingetap Kamuktaindet eng' kap Obed-edom arawek somok, ak ki iberuur Kamuktaindet ne Toroor kootap Obed-edom ak tuguuk tugul che ki tinyei.