1 ATEPTAP PEETUUSYEK 12 - BUKUIT NE TILIIL Sireet ne Dutero Kanon

Toretigap Daudi

¹ Chu ko che ki pwa ole mi Daudi eng' Ziklag, ye kita kounyegei amu Saulo weeriitap Kish. Ki pooto piik che kiimeen che ki toretikyik eng' lugeet.

² Ki tinyei kwangok ak ki imuuchi koboisyee eutap tai ak murot kaataam eng' wiirtaetap koik eng' porowet ak eng' mwoktoetap kipchabonik eng' kwangok; ki po tupchosyegap Saulo ne po Benjamin.

³ Ne oo ko ki Aieser, korup Joash, weeriigap Semaa Gibeatindet; Jesyel ak Phelet, weeriigap Asmabet; kobooto Beraka, ak Jehu Anatotindet,

⁴ ak Ismaia Gibeonindet, chiito ne kiim eng' pichooto sosom, ne ki pou pichooto sosom; Jeremiah, Jahasyel, Johanan, Josabad Gederatindet,

⁵ Elusai, Jerimoth, Bealia, Semaria, Shepatiah Harupindet;

⁶ Elkanah, Isia, Asarel, Joeser, ak Jasobeam, Koraik;

⁷ ak Joela ak Sebadia weeriigap Jeroham ne po Gedor.

⁸ Ki itabaangei che po piigap Gad koba ole mi Daudi eng' irimeet eng' surkwen. Ki murenik che kiimeen che nyigoonen, che ki kineet, piik che ki imuuchi konam long'onik ak ng'otwek. Ki uu togoochikwak togoochigap ng'etuunyik ak kichepcheben ko uu cheptirgichik che mi tuloonook.

⁹ Ki ne oo Eser, ne po aeng' ko Obadiah, ne po somok ko Eliap,

¹⁰ ne po ang'wan ko Mismana, ne po muut ko Jeremiah,

¹¹ ne po lo ko Atai, ne po tisap ko Eliel,

¹² ne po sisiit ko Johanan, ne po sogool ko Elsabad,

¹³ ne po taman ko Jeremiah, ne po taman ak agenge ko Makbanai.

¹⁴ Chuuto po weeriigap Gad ko ki kiptainigap lugeet; ne ki ming'in eng' icheek ko ki imuuchi koterteer piik pogol, ak ne ki oo eng' icheek ko ki imuuchi koterteer piik eliphuut.

¹⁵ Chu ko icheek che kiga landa eng' Jordan eng' arawet ne po tai, ye kiga nyi peek kot koba timiin eng' ngeguusyekyik tugul, koba koon piik tugul che ki po atebwosyek, koba kong'asiis ak cherongo.

Kasubik che punu Benjamen ak Judah

¹⁶ Ki pwa che po lagogap Benjamin ak che po Judah irimeet ole kimi Daudi.

¹⁷ Ki manda Daudi kotorookta icheek ak komwachi icheek koleenji, “Ngot obwonjino eng' kaalyeet otoreta, konamegei muguleldanyu ak okweek. Ago ngot ko kobwane ong'wekyino puunikyuk, ago ma mi yaityet eunekyuk, ko ingogeer Kiptaiyat Kamuktaindetap kwanisyekyok kioto ak koger kong'.”

¹⁸ Konyonji anyun `Kabuuset ne Tiliil Amashai, ne ki ne oo eng' pichooto sosom, ak kole: “Ki cheguuk, Daudi! Ki mi komostang'ung', inyee weeriitap Jesse! Mi kaalyeet, ingotep kaalyeet kobooten, ak ingotep kaalyeet kobooto toretiguk, amu toretin Kamuktaindeng'ung'.” Kotaach anyun `Daudi icheek, ak koyai koek kiptainigap kweanet.

¹⁹ Ki pa ole kimi Daudi ak icheek alak che po Manasseh, ye kingo pwa kobooto Philistiik kobookyin Saulo, ago ma toret pichooto icheeget. (Amu ki irwooch kiptainigap Philistiik si koon ineendet kole “Tuun pagaachech ak kwo konamgei ak Saulo kiptaiyandennyi, si koek ng'oiyonditap saboonwekyok.”)

²⁰ Ye kiwendi Ziklag, kobwa ole mi ineendet che po Manasseh, Adna, Josabad, Jediael, Mikael, Josabad, Elihu ak Siletai, kiptainigap eliphuusyek che ki po Manasseh.

²¹ Ak kitoret Daudi kobargei ak kweanaigap piik che ki iboktooti, amu tugul ko ki piik che kiimeen, che nyigoonen ak ko ki kiptainigap lugeet.

²² Amu kibwanei peetuut age tugul kotoreti Daudi, kot koek lugeet ne oo, ne uu lugeetap Kamuktaindet.

Koitetap lugeetap Daudi

²³ Chu ko koitetap kandoigap icheek che kiga ilaach kariik che kiyae lugeet, che kiga pwa ole mi Daudi eng' Hebron, kogoochi ineendet laitornatetap Saulo, ko uu ng'olyootap Kamuktaindet ne Toroor.

²⁴ Lagogap Judah che ki tinyei long'onik ak ng'otwek ko ki eliphuusyek lo ak pogol sisiit, che kiga ilaach kariik si koyae lugeet.

²⁵ Che po lagogap Simion, che kiimeen che nyigoonen che po lugeet ko ki eliphuusyek tisap ak pogol agenge.

²⁶ Che po lagogap Lawi ko ki eliphuusyek ang'wan ak pogol lo.

²⁷ Ak ki kandoindet Jehoiada ne po kootap Aron, ak ki mi kobooto ineendet `piik eliphuusyek somogu ak pogol tisap,

²⁸ ak Zadok, neraneet ne ki kiim ak ko nyigan, ak kiptainik tiptem ak aeng' che po kootap kwandanyi.

²⁹ Che po lagogap Benjamin, tupchosyegap Saulo ko ki eliphuusyek somok, amu kita konamegei kebeberta ne oo ne po pichooto ak kootap Saulo agoi peetuunooto.

³⁰ Che po lagogap Ephraim, ko ki piik eliphuusyek tiptem ak sisiit, che kiimeen che nyigoonen, piik che taagunotiin eng' kooriigap kwanisyekwak.

³¹ Che po kebebertap pororyetap Manasseh, ko ki eliphuusyek taman ak sisiit che kiga kimwa eng' kainaik, si kobwa koyai Daudi koek laitoryat.

³² Che po lagogap Issakar, che ki iguitos agobo peetuusyek, che ki ingen kiit ne kanyool koyai Israel ko ki pogol aeng' kandoikwak, ak kigase iit icheek tupchosyekwak tugul.

³³ Che po Zebulun, ko ki ek eliphuusyek konom che ki imuuchi komanda koba lugeet, che ingen koborisye kariik alak tugul che po lugeet, che ki imuuchi kong'at lugeet, ak ki tinyei muguleldo ne pekyinot.

³⁴ Che po Naphtali, ko ki kiptainik eliphuut agenge, ak ki mi kobooto icheeget, piik eliphuusyek sosomu ak tisap che ki tinyei long'onik ak ng'otwek.

³⁵ Che po Danik, che ki imuuchi kotet lugeet, ko ki eliphuusyek tiptem ak sisiit ak pogol lo.

³⁶ Che po Asher, che ki imuuchi komanda koba lugeet, che ki imuuchi kotet lugeet, ko ki eliphuusyek artam.

³⁷ Ak eng' pitoniin eng' Jordan, ne po piigap Reuben, piigap Gad ak ne po kebebertap pororyetap Manasseh, che ki tinyei kariik alak tugul che po pooryeet che yaei lugeet, ko ki mi piik eliphuusyek pogolu agenge ak tiptem.

³⁸ Ki pwa Hebron chuuto tugul eng' muguleldo ne ititaat che icheeget ko piigap lugeet, che ki imuuchi kong'eet lugeet. Ki pwa icheek yooto si koyai Daudi koek laitoryat koboi Israel tugul. Piik tugul che ki ng'et ak icheek che po Israel ko ki tinyei mageet agenge koyai Daudi koek laitoryat.

³⁹ Ki tebi icheek eng' yooto ak Daudi peetuusyek somok, koamisyei ak koeisei, amu kiga chopchi tuguuk tupchosyekwak.

⁴⁰ Ak icheek che ki neegitee pichooto, kobooch Issakar Zebulun ak Naphtali, ko ki ip amitwogik eng' sigiroik ak tambeesik, ak eng' nyumbusyek, ak eiik. Ki mi amitwogik che po peek che ng'ootiin, magatiinik che po mogoonik, mooriik che mi logoek che po sabibuk che yamyotiin, divaik, mwanik, eiik ak keechiirek che chaang', amu ki mi poiboiyet Israel.