1 ATEPTAP PEETUUSYEK 10 - BUKUIT NE TILIIL Sireet ne Dutero Kanon

Meetap Saulo

¹ Ki pargei Philistiik ak Israel, ak ki mweiso piigap Israel eng' taitap Philistiik, ak ki kibarchi che chaang' tulweetap Gilboa.

² Ki oon `Philistiik Saulo ak weeriikyik koosup inne, ak ki par `Philistiik Jonathan, Abinadab, ak Malki-sua weeriigap Saulo.

³ King'wanit pooryeet eng' Saulo, ak ki nam ineendet mwogik, ak kiguoten ineendet.

⁴ Koleenji anyun Saulo chiito ne ki ipchin ineendet kariik, “Ng'usu rotweng'ung' po chok ak itoorena, si ma pwa pichooto chu ma kimuratan kochota.” Ago ma cham chiito ne ki ipchin kariik; amu ki iywei miising'. Konam anyun Saulo rotwennyi po chok, kong'at ak kobutyi.

⁵ Kingo keer chiito ne ki ipchin ineendet kariik kole kagome Saulo, kobutyi agine rotwennyi po chok ak kome.

⁶ Kome anyun Saulo ak weeriikyik somok; ak koonnyi tugul kibagenge.

⁷ Kingo keer piik tugul che po Israel che ki mi atebweet kole, “Kagomwei lugeet ak ko kagome Saulo ak weeriikyik, kometo nganasookwak ak komwei. Ak ki pwa Philistiik komeny nganasochooto.”

⁸ Ak ki eng' karon, ye kibwanei Philistiik kobutei piik che kiga kibar, konyoor Saulo ak weeriikyik ko kogobek eng' tulweetap Gilboa.

⁹ Kibut tuguukyik, ak koip metinnyi, ak kariikyik, ak koyookto koba emetap Philistiik komoswek tugul koipchi logoiywek kanamonikwak, ak piik ak icheek.

¹⁰ Ki inde kariikyik kootap kanamonikwak, ak kogartaat metinnyi eng' kootap Dagon.

¹¹ Kingo kas Jabes-gilead komugul kiit ne koyachi `Philistiik Saulo,

¹² kong'eetyo piik tugul che nyigoonen, ak koba koip poortap Saulo ak che po weeriikyik, ak koip kobwa Jabes. Kitup kawekwak eng' keetit keel eng' Jabes, ak korugutkei peetuusyek tisap.

¹³ Ki me anyun Saulo amu chalwoktanyi ne ki ingelelji Kamuktaindet ne Toroor, ak amu ng'olyootap Kamuktaindet ne Toroor ne ma riip; ak amu kiteep ng'omnateet kogeny eng' ineendet ne kiboisyee oik, koteepse,

¹⁴ ama teebee Kamuktaindet ne Toroor. Kobar anyun `Kamuktaindet ne Toroor ineendet ak kogoochi laitornatet Daudi weeriitap Jesse.