Room 1 - New Testament

Sɛtʋ

¹ Ma Krɩstʋ Yesu tʋmlaɖʋ Pɔɔlɩ, mamaɣnɩ-mɩ takayaɣ kanɛ, mɛnsɛ-mɩ. Ɛsɔ ya-m se mɛnkɛ Yesu tiyiyu nɛ ɛsɩ-m nɛ hɔɔlʋʋ se monsusi ɛ-Laŋhɛzɩyɛ Tɔm.

² Ɛsɔ katɩŋnɩ náyaa yɔɔ ɛ-Tɔm Takayaɣ taa ɖooo lɔŋ nɛ ɛɖʋ nɛ pama se ɛcɛlɩɣ-ɖʋ Laŋhɛzɩyɛ Tɔm ńdʋ́.

³ Ńdʋ́ lɛ ɛ-Pɩyalʋ Yesu Krɩstʋ weyi ɛkɛ ɖa-Kɩpaɣlʋ yɔ ɛ-tɔm. Palʋlɩ-ɩ wiyaʋ sɔsɔ Daaviidi liɖe taa. Liɖe ńɖɩ́ ɖɩ-taa palʋlɩ-ɩ,

⁴ ɛlɛ́, efem nɛ ɛlɩɩnɩ sɩɖaa taa yɔ, pʋ-yɔɔ Ɛsɔ ya-ɩ se ɛ-maɣmaɣ ɛ-Pɩyalʋ weyi pɩtɩŋnɩ e-Fezuu Kiɖeɖeu yɔɔ nɛ ɛwɛnɩ ɖoŋ yɔ.

⁵ Ɛ-yɔɔ pɩtɩŋnaa nɛ Ɛsɔ labɩ-m lootiye nɛ ɛha-m waɖɛ se mɛnkɛ Yesu ɛnʋ e-tiyiyu nɛ meyele nɛ ajɛya kpeekpe taa ɛyáa wɛnɩ lidaʋ ɛ-yɔɔ nɛ pañam-ɩ. Ḿbʋ́ yekina nɛ paɖʋ-ɩ hɩɖɛ.

⁶ Mbá mɩ Yesu Krɩstʋ ya-mɩ yɔ, ɩwɛ ɖɔɖɔ ɛyáa ḿbá pa-taa.

⁷ Room ñɩma mbá mɩ Ɛsɔ sɔɔlɩ-mɩ siŋŋ nɛ ɛ́yáa-mɩ se ɩkɛ ɛ-ñɩma yɔ, mɩtɩŋa payɩ mamaɣ takayaɣ kanɛ. Đa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa!

Pɔɔlɩ caɣ se ewolo ɛna Room Krɩstʋ ñɩma

⁸ Kajalaɣ lɛ, mantɩŋɩɣnɩ Yesu Krɩstʋ yɔɔ nɛ mansaŋ Ɛsɔ mɩtɩŋa payɩ mɩ-yɔɔ. Mbʋ́ pʋyɔɔ yɔ, pɔyɔɔdʋʋ lidaʋ ŋgʋ́ ɩwɛnɩ yɔ kʋ-tɔm kedeŋa kpeekpe yɔɔ.

⁹ Ɛsɔ weyi malakɩ ɛ-tʋmɩyɛ nɛ ma-lɩmaɣza tɩŋa nɛ monsusuu ɛ-Pɩyalʋ Laŋhɛzɩyɛ Tɔm yɔ, ɛnawa se mɛwɛɛ mamaɣzɩɣ mɩ-yɔɔ

¹⁰ mɛ-Ɛsɔ sɛʋ taa. Mɔnpɔzʋʋ-ɩ paa ɖooye se yee etisiɣ yɔ, ɛtɛzɩ-m haʋ nʋmɔʋ nɛ mɔnkɔɔ mɩ-tɛ.

¹¹ Mbʋ́ pʋyɔɔ yɔ, me-liu wɛɛ kpem se mɔnkɔɔ nɛ Fezuu Kiɖeɖeu tɩŋnɩ mɔ-yɔɔ nɛ kɩlabɩ-mɩ kʋjɔʋ nɛ ɩkpa ɖoŋ.

¹² Ndʋ́ mancaɣ yɔɔdʋʋ yɔ lɛ se mɔnkɔŋ mɩ-tɛ se lidaʋ ŋgʋ́ ma nɛ mɩ ɖɩwɛna yɔ, kiyele nɛ pɩla ma nɛ mɩ hʋnʋm.

¹³ Man-taabalaa! Me-liu wɛɛ se ɩtɩlɩ se manpam ɖʋʋ se mɔnkɔŋ mɩ-tɛ nɛ mala tʋmɩyɛ nɛ pɩlɩɩ pʋyʋ ɛzɩ malabʋ ajɛya lɛɛna taa yɔ. Ɛlɛ́, pʋwɛɛ pɩlaɣzɩɣ-m halɩ nɛ sɔnɔ.

¹⁴ Pɩkɛnɩ-m kɩcɛyʋʋ se mowolo mbá pɛ-ɛsɛ kulaa nɛ mbá pɛ-ɛsɛ tokuli yɔ, nɛ lɔŋsɩnɖaa nɛ mbá patasɩ lɔŋ yɔ pɔ-cɔlɔ.

¹⁵ Ḿbʋ́ yebina nɛ me-liu wɛɛ siŋŋ se monsusi ɖɔɖɔ mbá mɩ ɩwɛ Room yɔ Laŋhɛzɩyɛ Tɔm.

Laŋhɛzɩyɛ Tɔm kɛ Ɛsɔ ɖoŋ

¹⁶ Mbʋ́ pʋyɔɔ yɔ, fɛyɛ ɛɛkpaɣ-m nɛ Laŋhɛzɩyɛ Tɔm ńdʋ́: tɩkɛ ɖoŋ weyi Ɛsɔ tɩŋɩɣnɩ ɩ-yɔɔ nɛ ɛya mbá patɩŋa payɩ pɛwɛɣnɩ lidaʋ ɛ-yɔɔ yɔ pa-ñʋʋ yɔ. Ɛpazɩɣnɩ Yuda ñɩma nɛ pʋkɔɔ pɩtamnɩ mbá pɛtɛkɛ Yuda ñɩma yɔ.

¹⁷ Toovenim lɛ, ńdʋ́ wɩlɩɣnɩ tam ɛzɩma mbʋ́ Ɛsɔ tʋʋzaa nɛ ɛtɩŋɩɣnɩ ɛyáa lidaʋ wɛnaʋ ɖeke koŋ yɔɔ nɛ ɛpɩsɩɣ-wɛ kʋtʋʋzaa yɔ. Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Weyi ɛkɛ kʋtʋʋzʋ e-lidaʋ wɛnaʋ yɔɔ yɔ, ɛwɛɣ wezuu.»

Kɩwɛɛkɩm mbʋ́ mbá pɛtɛkɛ Yuda ñɩma yɔ palaba yɔ

¹⁸ Đɩna kaŋŋ se Ɛsɔ pana kpa ɖooo ɛsɔdaa. Akpanɩ mbá patɩŋa payɩ pa-paa fɛyɩnɩ-ɩ nɛ palakɩ mbʋ́ pɩtatʋʋzɩ yɔ. Ḿbʋ́ ɖɩkɩnɩ ɛyáa nʋmɔʋ se pataatɩlɩ e-toovenim.

¹⁹ Ɛ-pana kpaɣnɩ-wɛ, mbʋ́ pʋyɔɔ yɔ, ɛ-maɣmaɣ ɛwɩlɩ-wɛ mbʋ́ papɩzɩɣ patɩlɩ ɛ-tɔm taa yɔ.

²⁰ Toovenim lɛ, ɖooo ɛzɩ Ɛsɔ labʋ kedeŋa yɔ, ɛlabɩ-kɛ labʋ mbʋ́ yɔ, piyeba nɛ panaɣ ɛ-wɛtʋ ndʋ́ paanaɣ yɔ kaŋŋ nɛ e-ɖoŋ weyi ɛfɛyɩ tɩnaɣ yɔ nɛ mbʋ́ ɛkɛnaa kpem yɔ.

²¹ Pʋ-yɔɔ lɛ, paapɩzɩɣ pawaanɩ natʋyʋ. Mbʋ́ pʋyɔɔ yɔ, pasɩm Ɛsɔ, ɛlɛ́, pataɖʋ-ɩ hɩɖɛ ɛzɩ pʋmʋnaʋ yɔ, patasam-ɩ ɖɔɖɔ. Pa-lɩmaɣza nɛ pa-laŋa taa wɛɛkaa, paasɩŋ pʋyʋ.

²² Pakpazaɣ pa-tɩ se pɛkɛ lɔŋsɩnɖaa nɛ papɩsɩ kpaanzɩyaa.

²³ Ɛsɔ ɛɛsɩkɩ kaʋ, ɛlɛ́, mbʋ́ ɛzɩ paaluŋ e-koboyaɣ tɛɛ lɛ, peyele poluŋuu ɛyʋ weyi ɛ́lɛ́ ñasɩkɩ yɔ nɛ sumasɩ nɛ kpɩna nɛ tɛtɛ ñɩtʋ pa-sɩʋ kpelisi tɛɛ.

²⁴ Pʋ-yɔɔ Ɛsɔ yebi-wɛ nɛ palakɩ kɩdɛkɛdɩm ɛzɩ paɖʋʋ pa-taa yɔ nɛ paɖʋʋ ɖama tomnasɩ fɛyɛ.

²⁵ Pakpaɣ cɛtɩm nɛ pɛlɛɣzɩ Ɛsɔ toovenim lone taa. Poluŋuu mbʋ́ Ɛsɔ laba yɔ pɩ-tɛɛ nɛ palakɩ pɩ-tʋmɩyɛ nɛ peyeki Ɛsɔ ɛnʋ ɛ-maɣmaɣ. Ŋgʋ́, laɖʋ ɛnʋ ɛ-tɛɛ pɩɩwɛɛ se poluŋ tam. Pɩla ḿbʋ́!

²⁶ Pʋ-yɔɔ Ɛsɔ yebi-wɛ nɛ pañɩnɩɣ kpem se pala mbʋ́ pʋɖʋʋ ɛyáa fɛyɛ yɔ: halaa yebi pa-walaa cɔlɔ sʋʋ nɛ panɩɣnɩ ɖama caʋ.

²⁷ Ḿbʋ́ ɖɔɖɔ abalaa ñeyebi pa-halaa yɔɔ sʋʋ nɛ panɩɣnɩ ɖama caʋ ɖeke kpem. Ḿbʋ́ pɛwɛɛ nɛ palakɩ ɖama mbʋ́ pɩkpaɣ ɛyáa fɛyɛ yɔ nɛ pamʋʋ pa-nʋmɔʋ lebu kɩhɛyʋʋ ŋgʋ́ pʋmʋnaa yɔ.

²⁸ Pɔtɔsɔɔlɩ se patɩlɩ Ɛsɔ yɔɔ, ɛ́lɛ́ yebi-wɛ nɛ pɛwɛnɩ lɩmaɣza kɩdɛkɛdɛɛ nɛ palakɩ mbʋ́ pɩtamʋna yɔ.

²⁹ Ḿbʋ́ suni pa-taa ɖo. Ḿbʋ́ lɛ: mbʋ́ pɩtatʋʋzɩ yɔ pɩtɩŋa nɛ kɩdɛkɛdɩm nɛ ɛsɛ naɣnaɣ nɛ kañatʋ nɛ ɛsɩsɛmɩyɛ nɛ ɛyáa kʋʋ nɛ eyoziye nɛ ɛyáa cɛtʋʋ nɛ ɛzaɣ́tʋ nɛ ɛyáa tɔm yɔɔdʋʋ.

³⁰ Pɛwɛɛkɩɣ ɖama hɩla. Pɛkɛ Ɛsɔ koyindinaa, pa-paa fɛyɩnɩ nɔɔyʋ, paasɩɣ pa-tɩ pʋ-cɔlɔ, pakpazɩɣ pa-tɩ pɩtɩɩfɛyɩ. Pañɩnɩɣ nʋmɔŋ kɩfaŋ weyi patɩŋ nɛ pɛtɛzɩ kɩdɛkɛdɩm labʋ yɔ nɛ paañaŋ pa-ñɩma.

³¹ Pa-ñʋŋ taa fɛyɩ, paalakɩ mbʋ́ paɖʋwa se palakɩ yɔ. Pʋ-yɔɔ pa-laŋa wɛ kpɩzɩŋ nɛ paanaɣ lɛlaa pʋtɔdɩyɛ.

³² Ŋgʋ́, pasɩm paɣtʋ ndʋ́ Ɛsɔ ɖʋwa yɔ ɖeu. Ńdʋ́ lɛ se: mbá palakɩ lakasɩ ńzɩ́ yɔ, pʋmʋnaa se pakʋ-wɛ. Pɩtasɩɩnɩ se pɛwɛɛ palakɩ lakasɩ ńzɩ́, ɛlɛ́, pɛwɛɛ patɩnɩɣ ɖɔɖɔ mbá palakɩ-sɩ yɔ pɔ-yɔɔ.