Fileemɔɔ 1 - New Testament

Sɛtʋ

¹ Pɔɔlɩ weyi ma paɖʋ-m salaka se malakɩ Krɩstʋ Yesu tʋmɩyɛ yɔ, ma nɛ ɖa-taabalʋ Timootee ɖɩmaɣnɩ takayaɣ kanɛ. Fileemɔɔ weyi ña ŋkɛ ɖɛ-ɛgbaɣdʋ nɛ ɖa nɛ ŋ ɖɩlakɩ tʋmɩyɛ kʋɖʋmɖɩyɛ yɔ, ña

² nɛ Yesu ŋgbɛyɛ taa ñɩma mbá pekpeɣliɣ ñɛ-tɛ yɔ nɛ ɖa-taabalʋ halʋ ñɩnʋ Apɩya nɛ Arciipu weyi ɖa nɛ ɩ ɖɩlakɩ you kʋɖʋmʋʋ lidaʋ yɔɔ yɔ ɖɩmaɣ-kɛ,

³ ɖɩsɛ-mɩ: ɖa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.

Pɔɔlɩ saŋ Ɛsɔ Fileemɔɔ yɔɔ

⁴ Fileemɔɔ, alɩwaatʋ ndʋ́ tɩtɩŋa mɛnsɛɣ Ɛsɔ ñɔ-yɔɔ yɔ, mansaŋ-ɩ.

⁵ Mbʋ́ pʋyɔɔ yɔ, manɩɣ pɔyɔɔdʋʋ ɛzɩma mbʋ́ ŋsɔɔlɩ Kɩpaɣlʋ Yesu nɛ Ɛsɔ ñɩma tɩŋa payɩ nɛ ŋlakɩ pa nɛ Yesu ɛnʋ mbʋ́ pʋpɔzʋʋ yɔ.

⁶ Mentendiɣ Ɛsɔ se eyele nɛ nɔɔ kʋɖʋmaɣ ŋgá pɩtɩŋnɩ lidaʋ ŋgʋ́ ɖɩwɛnɩ yɔ kʋ-yɔɔ nɛ ɖɩla yɔ, kasɩnɩ-ŋ nɛ ŋtɩlɩ ñɩm kɩbam mbʋ́ pɩtɩŋa payɩ ɖɩwɛnɩ ɖa nɛ Krɩstʋ ɖɛ-kpɛndʋʋ taa yɔ.

⁷ Man-taabalʋ, ñɔ-sɔɔlɩm yeba nɛ man-taa hʋlʋmɩ siŋŋ nɛ pɩlabɩ-m ɖɔɖɔ hʋnʋm. Mbʋ́ pʋyɔɔ yɔ, piyeba nɛ Ɛsɔ ñɩma laŋa hɛɛ.

Pɔɔlɩ tendiɣ Fileemɔɔ Onezim yɔɔ

⁸ Pʋ-yɔɔ lɛ, paa Krɩstʋ ɛha-m waɖɛ tɩŋa se mañazɩ-ŋ nɛ ŋla mbʋ́ pʋwɛɛ se ŋla yɔ yɔ,

⁹ sɔɔlɩm yɔɔ lɛ, mentendiɣ-ŋ se ŋlabɩ-pʋ. Đenɖe mɛwɛɛ yɔ, ma Pɔɔlɩ mankpadɩyaa. Đɔɖɔ lɛ, lɛɛlɛɛyɔ paɖʋ-m salaka Krɩstʋ Yesu yɔɔ.

¹⁰ Mentendiɣ-ŋ Onezim yɔɔ. Ɛpɩsɩ man-pɩɣa, mbʋ́ pʋyɔɔ yɔ, salaka taa cɩnɛ pɩtɩŋnɩ mɔ-yɔɔ nɛ ɛwɛnɩ lidaʋ Krɩstʋ Yesu ɛnʋ ɛ-yɔɔ.

¹¹ Đooo lɛ, ɛtaawɛ-ŋ wazaɣ. Ɛlɛ́, lɛɛlɛɛyɔ ɛwɛ-ŋ wazaɣ nɛ ɛwɛ-m wazaɣ ɖɔɖɔ.

¹² Manpɩsɩɣnɩ-ŋ-ɩ, ɛnʋ lɛ me-liu tɛɛ ñɩnʋ.

¹³ Weyi ma paɖʋ-m salaka Laŋhɛzɩyɛ Tɔm susuu yɔɔ yɔ, me-liu kɛwɛɛ se mansɩɩ-ɩ mɔn-cɔlɔ nɛ ɛlabɩ-m tʋmɩyɛ ño-lone taa.

¹⁴ Ɛlɛ́, mantañɩnɩ se mamanɩ ñɔ-yɔɔ nɛ mala nabʋyʋ: maacɛyɩɣ-ŋ se ŋlabɩ-m mbʋ́ pʋwɛ ɖeu yɔ. Me-liu wɛɛ se ŋlabɩ-m-pʋ nɛ ña-maɣmaɣ ñɔ-sɔɔlɩm.

¹⁵ Pʋtɔma yɔ, Onezim kɔhɔm ɛ-tɩ kʋhɔm alɩwaatʋ pazɩ se ɛpɩsɩ ɛkɔɔ nɛ ña nɛ ɩ ɩwɛɛ tam.

¹⁶ Ɛlɛ́ lɛɛlɛɛyɔ, ɛtatasɩ kɛʋ yom. Ɛkɩlɩ yom wee wee. Taabalʋ kʋsɔɔlʋ ɛkɛnaa. Ma lɛ, mɔnsɔɔlɩ-ɩ siŋŋ. Paa pɩɩla ɛzɩma, ñɔsɔɔlʋʋ-ɩ nɛ pɩkɩlɩ. Mbʋ́ pʋyɔɔ yɔ, ɛkɛ ña-ñɩnʋ nɛ ɛtɛ ɛkɛ ña-taabalʋ ɖa nɛ Kɩpaɣlʋ ɖɛ-kpɛndʋʋ taa.

¹⁷ Pʋ-yɔɔ lɛ, yee ŋkpaɣ-m ɛzɩ ña-taabalʋ yɔ yɔ, mʋ-ɩ ɛzɩma mbʋ́ ŋmʋwaɣ-m yɔ.

¹⁸ Paa ɛtɩɩyʋsɩnɩ-ŋ yaa ɛtɩɩtɔɔ-ŋ kɩmɩyɛ naɖɩyɛ yɔ, kpaɣ se mɔntɔɔnɩ-ŋ-ɖɩ.

¹⁹ Ma-maɣmaɣ mamaɣnɩ se: ma Pɔɔlɩ mɔnkɔŋ-ŋ-ɖɩ hɛyʋʋ. Ŋgʋ́, pɩfɛyɩ se mɔntɔzɩ-ŋ kʋtɔzʋʋ se ŋtɔɔ-m kɩmɩyɛ ɖɔɖɔ. Ńɖɩ́ lɛ ña-maɣmaɣ ñe-wezuu.

²⁰ Hayɩ! Man-taabalʋ, mentendiɣ-ŋ se Kɩpaɣlʋ yɔɔ lɛ, labɩ-m tʋmɩyɛ ńɖɩ́. Đa nɛ Krɩstʋ ɖɛ-kpɛndʋʋ yɔɔ lɛ, hɛzɩ ma-laŋɩyɛ.

²¹ Mamaɣʋ-ŋ takayaɣ kanɛ yɔ, mantaɣ liu se ŋlakɩ mbʋ́ mɔnpɔzɩ-ŋ yɔ. Halɩ ŋlakɩ nɛ pɩkɩlɩ ḿbʋ́.

²² Ñɔɔzɩ-m ɖɔɖɔ ɖɩsʋyɛ kpaagbaa. Mbʋ́ pʋyɔɔ yɔ, mantaɣ liu se Ɛsɔ nɩɣ mɩ-sɛtʋ nɛ paha-m nʋmɔʋ nɛ mɔnkɔɔ mɩ-cɔlɔ.

Sɛtʋ

²³ Epafraasɩ weyi ma nɛ ɩ ɖɩwɛ salaka taa Krɩstʋ Yesu yɔɔ yɔ, ɛsɛ-ŋ.

²⁴ Maarkɩ nɛ Aristaarkɩ nɛ Demaasɩ nɛ Luka mbá ma nɛ wɛ ɖɩlakɩ tʋmɩyɛ kʋɖʋmɖɩyɛ yɔ, pɛsɛ-ŋ ɖɔɖɔ.

²⁵ Đa-Kɩpaɣlʋ Yesu Krɩstʋ ɛlabɩ-mɩ lootiye.