2 Yohanɛɛsɩ 1 - New Testament

Sɛtʋ

¹ Đo-ɖoo weyi ña Ɛsɔ lɩzɩ-ŋ yɔ, ma Krɩstʋ ŋgbɛyɛ taa sɔsɔ, mamaɣnɩ ña nɛ ñe-piya takayaɣ kanɛ. Mɔnsɔɔlɩ-mɩ toovenim taa. Ɛlɛ́, pɩtɛkɛ men-ɖeke mɔnsɔɔlɩnɩ-mɩ, mbá patɩŋa payɩ pasɩm toovenim tɔm yɔ, pɔsɔɔlɩ-mɩ ɖɔɖɔ.

² Mbʋ́ pʋyɔɔ yɔ, tɩwɛ ɖa-taa, halɩ tɩwɛɣ ḿbʋ́ tam. Mɛnsɛ-mɩ:

³ Caa Ɛsɔ nɛ ɛ-Pɩyalʋ Yesu Krɩstʋ, pɔkɔŋ-ɖʋ labʋ lootiye nɛ pana ɖa-pʋtɔdɩyɛ nɛ pɛhɛzɩ ɖa-laŋa toovenim nɛ sɔɔlɩm pa-taa.

Toovenim nɛ sɔɔlɩm pɔ-tɔm

⁴ Đo-ɖoo! Man-taa hʋlʋmaa pɩtɩɩfɛyɩ, mbʋ́ pʋyɔɔ yɔ, manɩwa se ñe-piya nasɩyɩ ɖɔŋ toovenim nʋmɔʋ taa nɛ sɩlakɩ ɛzɩ Caa ɖʋʋ se ɖɩla yɔ.

⁵ Lɛɛlɛɛyɔ lɛ, mentendiɣ-ŋ se ɖɩsɔɔlɩ ɖama. Pɩtɛkɛ paɣtʋ kɩfatʋ natʋyʋ manɖʋʋ-ŋ ḿbʋ́, ɛlɛ́, ndʋ́ ɖɩɩnɩ ɖooo kiɖe tɛɛ yɔ manɖʋʋ-ŋ.

⁶ Sɔɔlɩm lɛ se ɖɩɖɔ Caa paɣtʋ yɔɔ. Paɣtʋ ńdʋ́ tɩ-yɔɔ pʋwɛɛ se ɩɖɔ ɛzɩ ɩkpɛlɩkʋʋ ɖooo kiɖe tɛɛ yɔ.

Ɩkpa mɩ-tɩ nɛ cɛtɩyaa!

⁷ Meheyiɣ-mɩ ḿbʋ́, mbʋ́ pʋyɔɔ yɔ, cɛtɩyaa sakɩyɛ lɩ kedeŋa yɔɔ nɛ paakaɖɩɣ kpayɩ se toovenim Yesu Krɩstʋ pɩsɩ ɛyʋ nɛ ɛkɔɔ kɔ-yɔɔ. Yee nɔɔyʋ ɛlakɩ ḿbʋ́ yɔ, pʋdʋ kɛ cɛtɩyʋ nɛ ɛtɛ ɛkɛ Krɩstʋ koyindu.

⁸ Pʋ-yɔɔ lɛ, ɩɖaŋ mɩ-tɩ yɔɔ nɛ ɩkɔɔ ɩmʋ mɩ-kɩhɛyʋ tɩŋa payɩ. Pɩtɛkɛ ḿbʋ́, ilesiɣ tʋmɩyɛ nɖɩ́ ɖɩtɩŋa payɩ ɖɩlaba yɔ ɖɩ-kɛzɛɣa.

⁹ Ɩtɩlɩ camɩyɛ se weyi ɛɖɛlɛsɩɣ niye nɛ ɛɛwɩlɩɣ Krɩstʋ tɔm tɩ-nasɩ taa yɔ, Ɛsɔ fɛyɩ ɛ-cɔlɔ. Weyi ɛ́lɛ́ wɩlɩɣ-tʋ tɩ-nasɩ taa yɔ, Ɛsɔ nɛ ɛ-Pɩyalʋ pɛwɛ ɛ-cɔlɔ.

¹⁰ Pʋ-yɔɔ lɛ, meheyiɣ-mɩ se yee nɔɔyʋ ɛkɔm mɩ-cɔlɔ nɛ ɛɛwɩlɩɣ-mɩ se Krɩstʋ pɩsɩ ɛyʋ nɛ ɛkɔɔ kedeŋa yɔɔ yɔ, ɩtaatisi nɛ ɛsʋʋ mɩ-tɛ, ɩtaacazɩ-ɩ sɛʋ.

¹¹ Yee nɔɔyʋ ɛsɛ-ɩ yɔ, pɩwɩlɩɣ se ɛ nɛ pʋdʋ palakɩnɩ ɛ-ɛzaɣ́tʋ tʋmɩyɛ.

Sɛtʋ

¹² Mɛwɛnɩ tɔm sakɩyɛ se meheyiɣ-mɩ, ɛlɛ́, maacaɣ se mama-tʋ takayaɣ taa. Mantaɣ liu se mɔnkɔŋ mɩ-cɔlɔ nɛ ma nɛ mɩ ɖɩyɔɔdɩ nɛ ɖa-laŋa tɛzɩ hʋlʋmʋʋ ɖeu.

¹³ Ñɔ-kɔɔ weyi Ɛsɔ lɩzaa ɖɔɖɔ yɔ, e-piya sɛɣ-ŋ.