Titə 3 - Dɔnɔn kə̂ Siki: Tar kə̂ aw arə təbbə

Pa-nja lə njê-mə-kunnje

¹ Ole mə njê-mə-kunnje tɔyn arə n̂-bbəəl tɔkə mbayje kə njê-kɔn-bbeje. Maji karə dooje tade ta n̂-toje ngɔsi mba dda nɛ̂n tɔyn kə̂ maji.

² Maji karə n̂-tajije dəw ang, n̂-toje to njê-ddɔje kə dəw ang, maji karə n̂-toje to njê-mə-majije. Maji karə n̂-toje to dəwje kə̂ wul pee kə dəwje tɔyn kə ndɔ tɔyn.

³ Mba jeje njaa kara, ləw toje to mbəje, n-toje to njê-dɔ-ngəngje, n-ndəəmje ddəw, bbo nɛ̂nje kə rɔ-nəəlje dang dang uta dɔje. Jaw ddaje majang ngaâ məje aw maji ang dɔ njê-marəjeje tə̂, n-nəəl kəm dəwje tə̂ ang ngaâ n-mbətəje naan tɔ.

⁴ A kar tə̂ kə̂ Lubba kə̂ to Nje-kajije tɔju maji laa kə ndiki kə̂ n̂-ndiki dəwje a,

⁵ najije. Nɛ̂n kə̂ gatə gatə kə̂ n-ddaje bba najije mbɛɛ̂ goto. Najije mba noo kəm-to-ndoo ləje, narə n-ddeeje to dəwje kə̂ siki ddəw toko tə̂ kə̂ n̂-tokoje ddəm ddəw tə̂ lə Ndil-mə-nda ddəm.

⁶ Lubba arə Ndil le ddee dɔje tə̂ kə nangə̂ baa ddəw tə̂ lə Jeju-Kristə kə̂ to Nje-kajije.

⁷ Yeenn a, ddəw mə-maji tə̂ laa le n̂-dda narə n-ddeeje gatə gatə kəmɛ̂ tə̂ ddəm karə jingaje təbbə kə̂ to kə ndɔ kə ndɔ kə̂ junda məje dɔɛ̂ tə̂ le ddəm.

Pɔl ndəjə Titə

⁸ Tar nəənn to tar kə̂ asə karə dəw unda məɛ̂ dɔɛ tə̂. M-ndiki ta karə ar dɔɛ tə̂ nya, mba karə dəwje tɔyn kə̂ undaje məde dɔ Lubba tə̂ unnje rɔde mba dda kulaje kə̂ maji uta. Yeenn to nɛ̂n kə̂ kura ngaâ aw dda maji kə dəwje.

⁹ A ə-mbətə kuru gəl nɛ̂nje kə̂ baa baa, Gəl-kuju dəwje kə mayn naan tarje kə̂ baa kə koo-ta-naan ang ɔju dɔ ndu: To nɛ̂nje kə̂ dda maji kə dəw ang ddəm to nɛ̂nje kə̂ baa ddəm.

¹⁰ Maji karə ə-ndɔru mbi dəw kə̂ aw tin njê-mə-kunnje. Ə-ndɔru gɔl kâra, gɔl joo, â bbo noo ang a, ilɛ̂ ddaka.

¹¹ Ə-gərə kə majɛ̂ to dəw kə̂ baann ndəəm ddəw mban. Ne njaa naw gangə sariya dɔ rɔɛ̂ tə̂ ddəw majang tə̂ kə̂ n̂-nayn ddəwe tə̂ naw dda.

Dɔbɔyn tar lə Pɔl

¹² Bbo mula Artemas wase Tisikə rɔi tə̂ a, ə-dda gan ə-ddee ingam Nikopolis, mba to lo kə̂ m-ndiki ta kaw kisi tə̂ dɔ nɛyn-kul tə̂.

¹³ Maji karə unda məi ta kuman Jenas kə̂ to nje-gərə-Ndu nya, umande, ne kə Apolos nja tə̂ ləde arə marə nɛ̂n dude ang.

¹⁴ Maji karə kəsə njê-mə-kunnje kara unnje rɔde tɔyn ddaje kulaje kə̂ maji. Yeenn bba bbo marə nɛ̂n du a, dâ kasəje ta karə nɛ̂nje njangə baa kuman nɛ̂n ngaâ dâ toje to dəwje kə̂ kari baa ang.

¹⁵ Dəwje tɔyn kə̂ eeje səm nəənn ddaije lapiya. Ə-dda lapiya njê kə̂ toje to nanʼmjeje ddəw mə-kunn tə̂. Maji karə mə-maji lə Lubba nayn kə se tɔyn!