Titə 2 - Dɔnɔn kə̂ Siki: Tar kə̂ aw arə təbbə

Ndəjə ɔju dɔ bbukaje

¹ A əi Titə, maji karə ə-tɔju nɛ̂n kə̂ to ddəw kâra baa kə nɛ̂n-tɔju kə̂ to gatə gatə.

² Ə-pa arə bbukaje gərəje dɔ jide, maji karə bbo kinga narɛ kə dɔgɔlɛ̂ ang ddade ang ngaâ n̂-ddaje nɛ̂n kə ddəwe. Arə darje dɔ mə-kunn tə̂ ləde kə̂ tɔkɔrɔ, arə n̂-ndikije naan ngaâ duwaje darə ngəng.

³ Ddəw kâra baa, ə-pa arə dɛnɛ̂nje kə̂ tɔkəje ngəmje pa-nja ləde to dəwje kə̂ unnje rɔde dang mba dda kula lə Lubba. Maji karə n̂-toje to njê-nanɛnje ang ddəm n̂-toje to bbərəje lə koto ang ddəm. Maji karə nɛ̂n kə̂ maji â n̂-tɔjuje.

⁴ Maji karə n̂-tɔjuje dɛnɛ̂nje kə̂ naynje mandə bbay darə n̂-ndikije ngawdede kə ngannde,

⁵ darə n̂-ddaje nɛ̂n kə ddəwe, n̂-ngəmje rɔde, n̂-ddaje kula ngaw ləde, darə məde maji ngaâ dooje ta ngawdede. Baann bba dəwje a paje tar kə̂ maji ang dɔ tar tə̂ lə Lubba ang.

Ndəjə ɔju dɔ basanje

⁶ Ddəw kâra baa, ə-ndəjə basanje arə n̂-ddaje nɛ̂n kə ddəwe

⁷ mə nɛ̂nje tə̂ tɔyn. Əi njaa kara, maji karə ə-to nɛ̂n-kɔju-marɛ̂ ddəw kula-ddai tə̂ kə̂ maji. Ə-tɔju nɛ̂n kə dɔgɔlɛ̂ ta ə-ndam nɛ̂n ang.

⁸ Maji karə tar-pa ləi to kə ddəwe bba karə dəw asə mayn səi ang. Baann bba karə rɔ-kul dda njê-baanje ləje, mba dâ kingaje marə nɛ̂n kə̂ maji ang tɛn ta pa dɔje tə̂ ang.

Ndəjə ɔju dɔ bbərəje

⁹ Maji karə ə-pa arə bbərəje ooje ta əbbədede mə nɛ̂nje tə̂ tɔyn. Maji karə n̂-sangəje ddəw mba maji kəm əbbədede tə̂, n̂-maynje kə de tar ang,

¹⁰ ngaâ n̂-bbokoje marə nɛ̂n ləde ang. Maji karə dasəje karə əbbədede undaje məde dɔde tə̂ kə ndɔ tɔyn. Baann bba dâ dda karə dəwje bbəəlje nɛ̂n-tɔju lə Lubba kə̂ to Nje-kajije.

Mə-maji lə Lubba ddəw tə̂ lə Jeju-Kristə

¹¹ Mba Lubba tɔju mə-maji laa kə̂ to ddəw kə̂ dəwje tɔyn asəje ta kinga nɛ̂n kaji.

¹² Mə-maji laa le tɔjuje karə jinyaje pa-nja ləje kə̂ maji ang kə bbo nɛ̂nje kə̂ nangə̂ nəənn, mba karə kisi ləje to kə dɔgɔlɛ̂ ddəm gatə gatə ddəm ngaâ karə juwaje tar lə Lubba jarəje ngəng.

¹³ N-ddaje tokə baann n-nginanje nɛ̂n ndɔ kisi kə rɔ-nəəl ləje kə̂ jundaje məje dɔɛ̂ tə̂ le. To ndɔ kə̂ tɔkə Lubba ləje kə̂ to Nje-kajije Jeju-Kristə a ddee kə piti laa.

¹⁴ Nunn rɔɛ̂ njaa narə yo mbaje, mba kɔruje mə majang tə̂ ngaâ ta toko nɛ̂n-yərəw ləje karə n-toje to dəwje laa njaa ddəm karə n-toje to dəwje kə̂ bbo dda kulaje kə̂ maji to məde tə̂ nya ddəm.

¹⁵ Maji karə ə-pa tar tokə baann, arə ndəjə arə dubbaje nɛ̂n singa ta ə-ndangəde kə ndu kə̂ mɔngu. Ə-dda arə dəw kâra dabbi ang.