Titə 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl, m-to bbərə-kula lə Lubba ddəm nje-kaw-kula lə Jeju-Kristə ddəm. Lubba unnum to nje-dda karə dəwje kə̂ Lubba mbərəde unnje məde arɛ̂ ngaâ karə n̂-gərəje tar kə̂ tɔkɔrɔ bba ta n̂-ngəmje rɔde mba Lubba.

² Yeenn bba dâ kundaje məde to dingaje təbbə kə̂ to kə ndɔ kə ndɔ. Lubba kə̂ ərə ngəm ndɔ kâra ang unn ndue ləw baa nu ta karəje təbbə kə̂ to kə ndɔ kə ndɔ le.

³ Karɛ̂ asə a, Lubba tee kə tar laa le kə ddaka ddəw tar tə̂ kə̂ n̂-pa narəm. Lubba kə̂ Nje-kajije le inya tar le mə jim tə̂ ngaâ nunn ndu narəm ta karə mila mbər tar le.

⁴ Mula kə makəturu nəənn mari, əi Titə le kə̂ ə-to ngonnəm kə̂ tɔkɔrɔ ddəw mə-kunn tə̂ kə̂ mbɔnje naan tə̂. Maji karə Lubba kə̂ Bɔ kə Nje-kajije Jeju-Kristə, n̂-ddaje səi mə-maji ngaâ darəje məi wul lɔm.

Tar lə dəwje kə̂ dɔ Egilisi tə̂

⁵ Minyai dɔ dərə-maann tə̂ kə̂ Krɛtə karə ə-gɔl gɔl nɛ̂nje kə̂ nayn bbay ə-tunga ngaâ ta karə unda dəwje kə̂ dɔ Egilisi tə̂ mə bbeje tə̂ kâra kâra tokə m-pa mari le.

⁶ Maji karə ansinyɛ to dəw kə̂ tar to dɔɛ̂ tə̂ kâra ang, n̂-to nje-dɛnɛ̂n kə̂ kâra, maji karə ngannɛ̂ ooje məde tə̂ ngaâ pa-nja ləde to pa-nja kə̂ dəwje a kundaje nɛ̂n tar dɔde tə̂ ang wase dəwje a kundaje tar dɔde tə̂ mba dɔ-ngəng ləde ang.

⁷ Dəw kə̂ dɔ Egilisi tə̂ to nje-ngəm nɛ̂n lə Lubba. Yeenn a, maji karə tar to dɔɛ̂ tə̂ kâra ang. Maji karə noo rɔɛ̂ bo ang, n̂-to nje-wungu ang, n̂-to bbərə lə koto ang, n̂-to nje-ddɔ kə dəw ang, maji karə bbo kinga narɛ kə dɔgɔlɛ̂ ang ddɛɛ̂ ang.

⁸ A maji karə n̂-gərə ngəm njê-mbaje ngaâ kəjə dda nɛ̂n kə̂ maji dɔrɔ â to məɛ̂ tə̂. Maji karə n̂-to dəw kə̂ dda nɛ̂n kə ddəwe, n̂-to gatə gatə, n̂-to dəw kə̂ ndiki nɛ̂n-yərəw ang ngaâ n̂-gərə ta tɔ bbo kə̂ da-rɔ tə̂.

⁹ Maji karə n̂-nayn ddəw tar kə̂ tɔkɔrɔ tə̂ tokə ye kə̂ n̂-tɔjɛ̂ le njaa. Yeenn bba nâ kasə dda karə dəwje ubbaje singa ddəw nɛ̂n-tɔju tə̂ kə̂ maji tɔyn ngaâ dəwje kə̂ aw mbətəje nɛ̂n-tɔju laa, nâ kasə ta tɔjude nɛ̂n kə̂ ulade naan tə̂ le.

Tar nɛ̂n-tɔju kə̂ to kə dɔgɔlɛ̂ ang

¹⁰ Tɔkɔrɔ, njê-dɔ-ngəngje, njê-kundaje bula kə̂ baa kə njê-kərəje dəwje banyaje nya, uta tɔyn, n̂-banyaje nya horo Jiipije tə̂ kə̂ ooje məde tə̂.

¹¹ Maji karə uwa tade, mba daw tujuje kəjə lə dəwje tɔyn kə̂ mə nujuje tə̂ kâra kâra. Daw tɔjuje nɛ̂n kə̂ asə karə dəw tɔju ang mba kinga nɛ̂n narɛ kə dɔgɔlɛ̂ ang.

¹² Marɛ̂ kâra horode tə̂ kə̂ to nje-kila mbər tar ləde pa nan: «Njê kə̂ dɔ dərə-maann tə̂ kə̂ Krɛtə to njê-ngəmje ləw baa, n̂-toje to daje kə̂ aw ddaje dingaw nya, n̂-toje to njê-dabbəje, kəjə nɛ̂n-kusa dɔrɔ â to məde tə̂.»

¹³ Tar laa le to tar kə̂ tɔkɔrɔ njaa. Mba yeenn bba, maji karə ə-ndangəde kə singa, mba karə mə-kunn ləde to gatə gatə.

¹⁴ Ə-ndangəde arə daaje lo kə tar ngəmje tə̂ kə̂ ləw kə̂ Jiipije aw turaje ang ddəm daaje lo kə nduje tə̂ lə dəwje kə̂ turuje giride arə tar kə̂ tɔkɔrɔ le ang ddəm.

¹⁵ Dəwje kə̂ nɛ̂n-yərəw ɔrude ang, nɛ̂n tɔyn to nɛ̂n-yərəw mbade ang. A dəwje kə̂ nɛ̂n-yərəw to məde tə̂ ngaâ mbətəje ta kunn məde, nɛ̂n kâra maji mbade ang, mba nɛ̂n-yərəw tuju nɛ̂n-gərə ləde ddəm kəjə ləde ddəm.

¹⁶ N̂-paje nan n̂-gərəje Lubba, a kula-ddade tɔju to n̂-gərəje Lubba ang. N̂-majije ang, n̂-toje to njê-dɔ-ngəngje, dasəje ta dda kula kə̂ maji kâra ang.