Rɔmɛnje 9 - Dɔnɔn kə̂ Siki: Tar kə̂ aw arə təbbə

Lubba mbərə dəwje kə̂ Ijarayɛl

¹ Ddəw mə-kâra tə̂ kə̂ m-dda kə Kristə le, tar kə̂ tɔkɔrɔ â maw pa bbo mərə ngəm ang. Ndil-mə-nda ɔn dɔm arə kəjə ləm tɔjum to maw pa tar kə̂ tɔkɔrɔ.

² Mba rɔm nəələm ang ngaâ bbəngərəm aw ti kə ndɔ tɔyn.

³ Kə̂ məm tə̂, m-ndiki karə əman njaa Lubba ubbu nɛ̂n arəm ngaâ ɔrum kə ddang ji Kristə tə̂ mba tar kaji lə ngakɔnʼmje kə̂ gəlje kâra baa.

⁴ N̂-toje to ngann Ijarayɛlje kə̂ Lubba arə n̂-ddeeje to ngannɛ̂. Lubba arə dooje piti laa, nɔsu dɔnɔn kə̂ de, narəde Ndu laa, narə n̂-toje to dəwje kə̂ aw poleje kə ddəwe ngaâ nunn ndue ta karəde nɛ̂nje.

⁵ Lubba dda arə ddəw kuju tə̂, Mesi kə̂ to Lubba kə̂ ee dɔ nɛ̂nje tə̂ tɔyn, in gəl kadedeje tə̂ kə̂ to Abaraham, Ijakə kə Jakobbo. Maji karə dəwje ɔsuje gajɛ̂ kə ndɔ kə ndɔ! Amɛnn!

⁶ Yeenn tɔju to tar kə̂ Lubba pa le ture a to baa njaa be ang. Mba dəwje tɔyn kə̂ gəl Ijarayɛl tə̂ toje to ngann Ijarayɛlje kə̂ tɔkɔrɔ tɔyn ang.

⁷ Ngaâ ngaka Abaraham tɔyn njaa toje to ngannɛ̂ kə̂ tɔkɔrɔ ang. Mba Lubba pa arə Abaraham nan: «Ddəw tə̂ lə Ijakə â a kinga nɛ̂n gəl-dəwje kə̂ munn ndum ta kari le.»

⁸ Yeenn a ta pa nan: Ngannje tɔyn kə̂ Abaraham ujude â toje to ngann lə Lubba ang. Ngann lə Lubba kə̂ tɔkɔrɔ â to dede kə̂ Lubba unn ndue ta karə nujude.

⁹ Mba Lubba unn ndue arɛ̂ nan: «Kar tə̂ kə̂ tokə be nəənn njaa mâ təəl ddee a, Sara a kuju ngonn kə̂ dingaw.»

¹⁰ Dɔɛ̂ tə̂ənn tɔyn, maji karə joleje məje dɔ Rebeka tə̂ tɔ. Nuju ngannje kə̂ dingaw joo, bɔdede kâra baa kə̂ to kajeje Ijakə.

^11-12 Lubba njaa gɔl ddəw kə̂ naw mbərə nɛ̂n dəwje. N̂-mbərə dəwje mba bbar kə̂ n̂-bbarde bbo mba kula-ddade ang. Ta tɔju dəwje to n̂-to gatə gatə ddəw nɛ̂n tə̂ kə̂ n̂-gɔl ta dda le, Lubba le pa arə Rebeka kar tə̂ kə̂ n̂-nayn nuju nɛ̂n ang bbay ngaâ ngannɛ̂ le nayn ddaje maji wase majang ang bbay nan: «Ne kə̂ tɔkə nâ to nje-kula lə ne kə̂ mbatə.»

¹³ Ddəw kâra baa tokə Makəturu lə Lubba pa nan: «M-ndiki Jakobbo, a m-mbətə Ejawu.»

¹⁴ Yeenn pa nan ddi wa? Lubba to gatə gatə ang wa? Baann ang.

¹⁵ Mba Lubba pa arə Mɔyijə nan: «Maw moo kəm-to-ndoo lə dəw kə̂ m-ndiki ta koo kəm-to-ndoo laa, ngaâ maw dda mə-maji kə dəw kə̂ m-ndiki ta dda saa mə-maji.»

¹⁶ Yeenn a, nɛ̂ɛnn le ddee ddəw tə̂ lə Lubba kə̂ aw oo kəm-to-ndoo lə dəwje bbo ddee ddəw mə-ndiki tə̂ lə dəw ang ddəm ddəw singa tə̂ kə̂ dəw aw dda dɔ rɔɛ̂ tə̂ ang ddəm.

¹⁷ Lubba pa mə Makəturu tə̂ laa arə Parawɔn nan: «Mula mbay dɔi tə̂ ta tɔju singa-mɔngu ləm dɔi tə̂ ngaâ ta dda karə rim bbar tee dɔ nangə tə̂ tɔyn.»

¹⁸ Yeenn a, Lubba aw oo kəm-to-ndoo lə dəw kə̂ n̂-ndiki ta koo kəm-to-ndoo laa, dəw kə̂ n̂-ndiki ta dda karə məɛ̂ kətərə a, n̂-dda narə məɛ̂ kətərə.

Lubba aw dda wungu ddəm aw oo kəm-to-ndoo lə dəw ddəm

¹⁹ A du ang, â dujum pa nan: «Bbo baann â Lubba aw mbərə nɛ̂n dəwje a, mba ddi tɔ bbay bba naw nunda tar dɔje tə̂ wa? Nân bba a kasə mbətə nɛ̂n kə̂ mə Lubba ndiki wa?»

²⁰ Əi, ə-to nân bba a kasə ta mayn tar kə Lubba wa? Jo kə̂ dubba to kubba a kasə ta pa karə nje-kubbɛ̂ le nan: «Mba ddi bba ubbam tokə be wa?» Baann ang.

²¹ Nje-kubba jo asə dda nɛ̂n kə̂ məɛ̂ ndiki. Anjə kə̂ kâra baa njaa nâ kasə kubba nɛ̂n jo kə̂ ta wal nɛ̂n dəwje ndɔ kusu tə̂ ddəm jo dda kula kə̂ baa ddəm.

²² Lubba ndiki ta tɔju wungu laa ngaâ ta dda karə dəwje gərəje singa-mɔngu laa. A dəwje kə̂ asə karə n̂-dda wungu kə̂ de ngaâ asə karə dingaje yo le n̂-tɔ wure narəde nya.

²³ Lubba ndiki ta tɔju piti laa kə̂ bo nya kəsə dəwje, dede kə̂ noo kəm-to-ndoo ləde kə̂ n̂-gɔlde tokə kete mba karə dingaje piti saa.

²⁴ Dəwjeenn le toje to jeje kə̂ Lubba mbərəje. N̂-mbərəje horo Jiipije tə̂ kə karəde baa ang, horo dəwje tə̂ kə̂ toje to Jiipije ang tɔ.

²⁵ Ye a Lubba pa tarɛ̂ makəturu tə̂ lə Oje nan: «Dəwje kə̂ toje to dəwje ləm ang, mâ bbarde to dəwje ləm. Gəl-dəwje kə̂ ləw m-ndikide ang, mâ bbarde to gəl-dəwje kə̂ m-ndikide.

²⁶ Lo kə̂ daw pa darəde tə̂ nan: ‹Ə-toje to dəwje ləm ang!› Dâ bbarde to ngann lə Lubba kə̂ nje-kisi kəm baa.»

²⁷ Ejayi kara ila mbər dɔ ngann Ijarayɛlje tə̂ nan: «Le ngann Ijarayɛlje banyaje tokə ənangara ta-ba kara, dede kə̂ Lubba mbərəde â dâ kingaje kaji.

²⁸ Mba Əbbə-dəwje a dda nɛ̂n tɔyn kə̂ ndue pa le njangə baa dɔ nangə tə̂.»

²⁹ Ejayi le njaa pa ləw tɔ nan: «Bbo Əbbə-dəwje kə̂ Nje-singa-mɔngu inya marə dəwje kə̂ gəlje tə̂ ang a, ja koyje tɔyn tokə dəwje kə̂ Sɔdɔm kə Gɔmɔr.»

Dəw ddee gatə gatə kəm Lubba tə̂ ddəw mə-kunn tə̂

³⁰ Yeenn a, ja paje nan ddi wa? Dəwje kə̂ toje to Jiipije ang kə̂ aw sangəje ddəw ta ddee gatə gatə kəm Lubba tə̂ ang ddəm â Lubba oode to dəwje kə̂ gatə gatə kəmɛ̂ tə̂, mba dooje məde tə̂ saa.

³¹ A ngann Ijarayɛlje kə̂ aw sangəje ddəw ta ddee gatə gatə kəm Lubba tə̂ ddəw Ndu tə̂ le umanje nɛ̂n pin.

³² Mba ddi wa? Mba dəjəje to dâ ddeeje gatə gatə ddəw kula-ddade tə̂ bbo ddəw mə-kunn tə̂ ang. N̂-tukaje gɔlde ər tə̂ kə̂ dəwje aw tukaje gɔlde tə̂ aw osoje,

³³ tokə Makəturu lə Lubba pa nan: «Ooje, mila marə ər kə̂ dəwje a tukaje gɔlde tə̂ tɔkə bbe tə̂ kə̂ Sinyɔ, tɔkə ər kə̂ a dda karə dəwje tosoje, dəw kə̂ unn məɛ̂ arɛ̂ a, rɔ-kul a kɔru kəmɛ̂ ang.»