Rɔmɛnje 8 - Dɔnɔn kə̂ Siki: Tar kə̂ aw arə təbbə

Dəw kə̂ aw nja ddəw tə̂ lə Ndil-mə-nda

¹ Bbasinɛn nəənn, dəwje kə̂ ddaje mə-kâra kə Jeju-Kristə, sariya to dɔde tə̂ ang ngaa.

² Mba Ndu lə Ndil kə̂ aw arə təbbə dəw ddəw mə-kâra tə̂ n̂-dda kə Jeju-Kristə le ɔrɛ̂ ji Ndu tə̂ lə majang ddəm yo tə̂ ddəm mban.

³ Lubba dda nɛ̂n kə̂ ndu lə Mɔyijə asə ta dda ang, mba da-rɔ dəw kə̂ ubba singa ang dda arə Ndu le dda kula ang. Nɛ̂n kə̂ Lubba dda le to Ngonnɛ̂ njaa kə̂ nulɛ̂ narə unn da-rɔ kə̂ to tokə da-rɔ dəw kə̂ to nje-nɛ̂n-dda kə̂ maji ang, mba kɔru nɛ̂n dəwje mə majang tə̂. Ddəw tə̂ənn le. Lubba gangə sariya dɔ majang tə̂ kə̂ to mə da-rɔ dəwje tə̂.

⁴ Lubba dda nɛ̂ɛnn le karə n-ddeeje to dəwje kə̂ asə ta dda nɛ̂n kə̂ Ndu dujuje karə n-ddaje le, jeje kə̂ jaw njaje ddəw tə̂ lə Ndil-mə-nda bbo ddəw da-rɔ tə̂ ang.

⁵ Dəwje kə̂ aw njaje ddəw da-rɔ tə̂, kəjə ləde tɔyn to kə dɔ bbo kə̂ da-rɔde tə̂. A dəwje kə̂ aw njaje ddəw tə̂ lə Ndil-mə-nda, kəjə ləde tɔyn to kə̂ dɔ nɛ̂n tə̂ kə̂ mə Ndil-mə-nda ndiki.

⁶ Dəw kə̂ kəjə laa to kə dɔ bboje tə̂ kə̂ da-rɔ tə̂ a kinga yo. A dəw kə̂ kəjə laa to kə̂ dɔ nɛ̂n tə̂ kə̂ Ndil-mə-nda ndiki a kinga təbbə kə mə-wul-lɔm.

⁷ Dəwje kə̂ kəjə ləde to kə dɔ bboje tə̂ kə̂ da-rɔ tə̂ toje to njê-baanje lə Lubba. N̂-mbətəje ta dda nɛ̂n kə turu Ndu lə Lubba, dasəje ang njaa nyɔm.

⁸ Dəwje kə̂ aw njaje ddəw bbo kə̂ da-rɔde tə̂ a kasəje ta nəəl kəm Lubba tə̂ ang.

⁹ A sese, aw njaje ddəw bbo tə̂ kə̂ da-rɔse tə̂ ang. Aw njaje ddəw tə̂ lə Ndil-mə-nda, mba Ndil lə Lubba dda bbe məse tə̂. Dəw kə̂ Ndil lə Kristə to məɛ̂ tə̂ ang, to dəw laa ang.

¹⁰ Bbo Kristə to məse tə̂ a, tɔkɔrɔ da-rɔse a koy mba majang. A Lubba arə ə-ddeeje to dəwje kə̂ gatə gatə kəmɛ̂ tə̂. Mba yeenn bba, Ndil-mə-nda arəse təbbə.

¹¹ Bbo Ndil lə Lubba kə̂ ndol Jeju kə̂ oy le dda bbe məse tə̂ a, da-rɔse le a koy njaa. A Lubba kə̂ ndol Kristə kə̂ oy le a karə təbbə da-rɔse le ddəw Ndil tə̂ laa kə̂ dda bbe məse tə̂.

¹² Yeenn a, ngakɔnʼmje, to tar ləse ta dda marə nɛ̂nje njaa. A da-rɔje a kuwaje kə singa karə n-ddaje nɛ̂n kə̂ məɛ̂ ndiki ang.

¹³ Mba bbo ə-njaje ddəw da-rɔ tə̂ a, â koyje. A bbo ə-njaje ddəw tə̂ lə Ndil-mə-nda ngaâ arəje nɛ̂n-ddaje kə̂ maji ang kə̂ rɔse tə̂ oyje a, â kisije kə təbbə.

¹⁴ Mba dəwje tɔyn kə̂ aw njaje ddəw tə̂ lə Ndil lə Lubba toje to ngann lə Lubba.

¹⁵ Mba Ndil kə̂ Lubba arəse le to Ndil kə̂ aw ddase bbərə tə̂ ang ddəm aw ula bbəəl məse tə̂ ang ddəm. To Ndil-mə-nda kə̂ ddase to ngannje lə Lubba ngaâ arəje ddəw karə juru əkii kə rɔ Lubba tə̂ nan: «Aba! Bɔy!»

¹⁶ Ndil lə Lubba le njaa pa arə ndil kə̂ to rɔje tə̂ nan n-toje to ngann lə Lubba.

¹⁷ Yeenn a, bbo n-toje to ngannɛ̂ a, ja kingaje nɛ̂nje kə̂ maji kə̂ Lubba unn ndue ta karə dəwje laa. Ja kingaje nɛ̂nje le naan tə̂ kâra baa kə Kristə. Mba bbo jaw jooje ndoo saa a, ja kingaje piti saa tɔ.

Piti lə Lubba

¹⁸ Moo a, piti kə̂ Lubba a tɔjuje kə ddaka ndɔ tə̂ kə̂ aw ddee a kuta ndoo kə̂ jaw jooje bbokənɛn nəənn.

¹⁹ Nɛ̂nje tɔyn kə̂ Lubba dda aw nginanje kar kə̂ Lubba a tɔju nɛ̂n ngannɛ̂ kə̂ ddaka.

²⁰ Mba nɛ̂nje kə̂ Lubba dda ddeeje to nɛ̂nje kə̂ baa. Nɛ̂nje le njaa ndikije tə̂ baann ang. Lubba njaa ndiki tə̂ tokə baann. A nɛ̂nje le a kasəje ta kunda məde dɔ marə nɛ̂n tə̂ bbay.

²¹ Marə ndɔ a, Lubba a kɔru nɛ̂nje kə̂ n̂-dda le ji nɛ̂nje tə̂ kə̂ aw ddade bbərə tə̂ arə n̂-tujuje le. Yeenn ngaâ dâ kingaje piti tokə ngann lə Lubba kə̂ teeje mə bbərə tə̂ le.

²² N-gərəje to bbasinɛn nəənn njaa kara nɛ̂nje tɔyn kə̂ Lubba dda aw nɔnje rɔde ngaâ aw ooje ndoo tokə lə dɛnɛ̂n kə̂ aw nduru ndo.

²³ Nɛ̂nje tɔyn kə̂ Lubba dda kə karəde baa njaa aw nɔnje rɔde ang. Jeje kə̂ jingaje Ndil-mə-nda to dɔngɔr nɛ̂n-karə-baa lə Lubba njaa kara jaw nɔnje rɔje məje tə̂ tɔ. Jaw nginanje karə Lubba arə n-ddeeje to ngannɛ̂ ngaâ karə naji da-rɔje tɔ.

²⁴ Mba Lubba ajije njaa, arə jaw jundaje məje dɔɛ̂ tə̂. A bbo dəw oo nɛ̂n kə̂ naw nunda məɛ̂ dɔɛ̂ tə̂ kə kəmɛ̂ mban a, nâ təl kunda məɛ̂ dɔɛ̂ tə̂ to kunda ang ngaa. Nân bba a kunda məɛ̂ dɔ nɛ̂n tə̂ kə̂ noo kə kəmɛ̂ mban wa?

²⁵ A bbo jooje nɛ̂n kə kəmje ang bbay bba jaw jundaje məje dɔɛ̂ tə̂ a, jilaje məje pɔn jaw nginanje nɛ̂n nɛ̂ɛnn le.

²⁶ Ddəw kâra baa, Ndil-mə-nda kara aw umanje ddəw singaje tə̂ kə̂ goto le tɔ. Mba n-gərəje nɛ̂n kə̂ to maji ta duju Lubba ang. A Ndil-mə-nda njaa aw duju Lubba mba tar ləje tokə lə dəw kə̂ aw tila məɛ̂, marə tila-mə kə̂ nya dəw karə pa to pa.

²⁷ A Lubba kə̂ gərə mə dəw, gərə nɛ̂n kə̂ Ndil-mə-nda ndiki ta duju le. Mba Ndil-mə-nda aw duju Lubba mba tar lə dəwje lə Lubba kə ddəw kə̂ Lubba ndiki.

²⁸ N-gərəje to nɛ̂nje tɔyn aw mbɔnje naan ta dda maji kə dəwje kə̂ ndikije Lubba, dede kə̂ Lubba bbarde ddəw nɛ̂n tə̂ kə̂ n̂-gɔl tokə kete.

²⁹ Mba Lubba gərəde ngaâ undade dang tokə kete karə n̂-ddeeje tokə lə Ngonnɛ̂, mba karə Ngonnɛ̂ le təl to Ngonn-dərə horo njê-mə-kunnje tə̂ kə̂ banya.

³⁰ Njê kə̂ Lubba undade dang tokə kete le n̂-bbarde tɔ. Njê kə̂ n̂-bbarde le narə n̂-ddeeje gatə gatə kəmɛ̂ tə̂. Njê kə̂ narə ddeeje gatə gatə kəmɛ̂ tə̂ le narə dingaje piti laa tɔ.

Marə nɛ̂n kə̂ tin dəw kə ndiki lə Lubba goto

³¹ Ja paje nan ddi bbay wa? Bbo Lubba ee kə je a, nân njaa a kasə ta mbətəje wa?

³² Lubba kə̂ ɔku Ngonnɛ̂ ang, a unnɛ̂ ulɛ̂ ji dəwje tə̂ arə tɔlɛ̂ mba tar ləje tɔyn le a karəje nɛ̂n tɔyn kâra baa kə ngonnɛ̂ le ang tokə baânn wa?

³³ Nân bba a kunda tar dɔ dəwje tə̂ kə̂ Lubba mbərəde wa? Dəw kâra ang, mba Lubba njaa arə n̂-ddeeje gatə gatə kəmɛ̂ tə̂.

³⁴ Nân bba a gangə sariya dɔde tə̂ wa? Dəw kâra ang, mba Jeju-Kristə njaa oy. Uta tɔyn, n̂-təl n̂-ndol, nisi dɔ ji-kɔl Lubba tə̂ ngaâ naw duju Lubba mba tar ləje.

³⁵ Nân bba a tinje kə ndiki lə Kristə wa? Nɛ̂n-wungu wase kəjə-tar, nɛ̂n-singa kə̂ dəwje aw ddaje kə je, bbo, ndoo, nɛ̂n-bbəəl wase yo wa?

³⁶ Ddəw kâra baa tokə n̂-dda tarɛ̂ Makəturu tə̂ lə Lubba nan: «Kar tɔyn njaa jaw jaw ngɔsi kə yo mbai, dəwje aw oojeje tokə lə batəje kə̂ daw duja gɔsude.»

³⁷ A mə nɛ̂nje tə̂ənn tɔyn n-tətə ddɔ ddəw tə̂ lə Jeju kə̂ ndikije le.

³⁸ Tɔkɔrɔ, m-gərə kə majɛ̂ to marə nɛ̂n kə̂ a tinje kə ndiki laa goto. Yo ang ddəm təbbə ang ddəm anjəje ang ddəm marə ndilje kə̂ maji ang kə̂ darâ kə̂ ɔn dɔ dəwje ang ddəm nɛ̂n kə̂ bbokənɛn nəənn ang ddəm nɛ̂n kə̂ mə ndɔje tə̂ kə̂ aw ddee ang ddəm

³⁹ singa-mɔnguje kə̂ darâ ang ddəm singa-mɔnguje kə̂ nangə̂ ang ddəm marə nɛ̂n kə̂ Lubba dda to dda ang ddəm. Marə nɛ̂n kâra kə̂ a tinje kə ndiki lə Lubba goto. N̂-tɔjuje ndiki laa le ddəw tə̂ lə Əbbəjeje Jeju-Kristə.