Rɔmɛnje 7 - Dɔnɔn kə̂ Siki: Tar kə̂ aw arə təbbə

Ndu ubba singa dɔje tə̂ ang ngaa

¹ Ngakɔnʼmje, maw pa tar nəənn marəse, sese kə̂ ə-toje to dəwje kə̂ gərəje Ndu kə majɛ̂ mban. Ə-gərəje to dəw isi kəm baa bba Ndu ubba singa dɔɛ̂ tə̂.

² Nɛ̂n-kɔju-marɛ̂, bbo dɛnɛ̂n ta ngaw a, ndu tɔɛ̂ naan tə̂ kə ngawɛ̂je kar tə̂ kə̂ ngawɛ̂je le isi nɛ̂n kəm baa bbay. A bbo ngawɛ̂je le oy a, ndu kə̂ tɔɛ̂ naan tə̂ kə ngawɛ̂je le ɔru dɔɛ̂ tə̂ ngaa.

³ Bbo n̂-taa marə dingaw kə̂ dang kar tə̂ kə̂ ngawɛ̂je le isi nɛ̂n kəm baa a, dəwje a kooeje to dɛnɛ̂n kə̂ nje-dda lo-to-majang. A bbo ngawɛ̂je le oy bba n̂-taa marɛ̂ a, ndu ɔru dɔɛ̂ tə̂ ngaa. Nee kə ddəw ta taa marə ngaw, dəwje a kooeje to nje-dda lo-to-majang ang.

⁴ Ngakɔnʼmje, nɛ̂ɛnn le to ddəw kâra baa mba tar ləse tɔ. Ə-toje tokə dəwje kə̂ oyje arə Ndu ubba singa dɔse tə̂ ang, mba ə-ddeeje kâra baa kə Kristə. Yeenn a, ə-toje to dəwje laa, ne kə̂ noy ngaâ n̂-ndol le. Baann bba ja kasəje ta dda nɛ̂n kə̂ maji kəm Lubba tə̂.

⁵ Ləw kə̂ jaw ddaje nɛ̂nje kə̂ məje ndiki le Ndu dda arə bbo kə̂ da-rɔje tə̂ ndasəje arə n-ddaje majang kə̂ aw aw kə̂ je karə jinga yo.

⁶ A bbasinɛn, n-teeje kɔ Ndu tə̂ kə ddang mban, mba n-toje tokə lə dəwje kə̂ oyje mban arə Ndu kə̂ uwaje bbərə tə̂ le ee kə singa dɔje tə̂ ang ngaa. Yeenn a, ja kasəje ta dda kə Lubba kə ddəw kə̂ siki kə̂ Ndil aw tɔjuje, bbo ta dda kə ddəw kə̂ ləw ang ngaa. Ddəw kə̂ ləw le to dda nɛ̂n kə turu Ndu kə̂ n̂-dda makəturu tə̂.

Tar Ndu kə tar majang

⁷ Yeenn a, ja paje nan ddi wa? Ja paje nan Ndu to majang wa? Baann ang! Ndu â tɔjum majang arə m-gərə. N̂-dda makəturu tə̂ lə Lubba nan: «Maji karə unda kəm-nda ang» Yeenn a bbo ndu goto a, mâ gərə nɛ̂n kə̂ to kunda kəm-nda le ang.

⁸ Majang inga ddəw kə̂ Ndu ɔru arɛ̂ le ngaâ ula bbo nɛ̂nje kə̂ maji ang dang dang məm tə̂. Yeenn bba bbo ndu goto a, majang to nɛ̂n kə̂ oy mban.

⁹ Ləw kə̂ Ndu goto le misi kə təbbə. A kar kə̂ Ndu tee a, majang ndol.

¹⁰ A əman le moy. Ndu kə̂ to nɛ̂n kə̂ a kaw səm karə minga təbbə le təl to nɛ̂n kə̂ aw aw səm karə minga yo.

¹¹ Mba ddəw tə̂ lə Ndu â majang inga ddəw ərəm ngaâ tɔləm.

¹² Tɔkɔrɔ, Ndu maji tɔyn. Ndu lə Lubba maji tɔyn, to gatə gatə ddəm maji ddəm.

¹³ Nɛ̂n kə̂ maji le njaa təl to nɛ̂n kə̂ a ta tɔləm wa? Baann ang! Majang njaa unn nɛ̂n kə̂ maji le ta tɔləm nɛ̂n. Ndu dda baann ta tɔju to majang to nɛ̂n kə̂ maji ang nya.

Majang ɔn dɔ dəw

¹⁴ N-gərə to Ndu to nɛ̂n lə Ndil. A əman m-to dəw baa, n̂-labbəm kə majang to bbərə laa.

¹⁵ M-gərə dɔm nɛ̂n tə̂ kə̂ maw dda ang. Nɛ̂n kə̂ m-ndiki ta dda a, m-dda ang. A nɛ̂n kə̂ m-ndiki ta dda ang njaa â maw dda.

¹⁶ Bbo nɛ̂n kə̂ m-ndiki ang le njaa â m-dda a, m-gərə to Ndu to nɛ̂n kə̂ maji.

¹⁷ Yeenn a, əman njaa maw dda nɛ̂ɛnn le ang, majang kə̂ dda bbe rɔm tə̂ â aw dda nɛ̂ɛnn le.

¹⁸ Mba m-gərə to marə nɛ̂n kə̂ maji goto rɔm tə̂, rɔm əman tə̂ kə̂ mubba singa ang nəənn. Tɔkɔrɔ, bbo dda nɛ̂n kə̂ maji to məm tə̂ njaa. A mubba singa kə̂ ta dda nɛ̂n nɛ̂n le ang.

¹⁹ Nɛ̂n kə̂ maji kə̂ m-ndiki ta dda le m-dda ang. A nɛ̂n kə̂ maji ang kə̂ m-ndiki ta dda ang le â m-dda.

²⁰ Bbo m-dda nɛ̂n kə̂ m-ndiki ang a, yeenn to əman â m-dda nɛ̂ɛnn le ang, majang kə̂ dda bbe rɔm tə̂ le â dda nɛ̂ɛnn le.

²¹ Yeenn a, moo a, marə ndu to: Kar tɔyn kə̂ m-ndiki ta dda nɛ̂n kə̂ maji a, nɛ̂n kə̂ maji ang dɔrɔ â to nɔnʼm tə̂.

²² Mba məm tə̂ nu, Ndu lə Lubba dɔrɔ â aw arəm rɔ-nəəl.

²³ A moo marə ndu kə̂ dang da-rɔm tə̂ kə̂ aw dda ddɔ kə nɛ̂n kə̂ nɛ̂n-gərə ləm tɔjum arə m-ndiki tə̂. Nɛ̂n le ddam arə m-ddee to bbərə lə singa-mɔngu lə majang kə̂ to məm tə̂.

²⁴ To ndoo nya arəm. Nân bba a taam ta da-rɔm tə̂ kə̂ aw aw səm kə̂ ta yo tə̂ nəənn wa?

²⁵ Wooyo arə Lubba ddəw tə̂ lə Əbbəjeje Jeju-Kristə! Yeenn a, ddəw nɛ̂n-gərə tə̂ ləm, m-to bbərə lə Ndu lə Lubba, a ddəw da-rɔ tə̂, m-to bbərə lə singa-mɔngu lə majang.