Rɔmɛnje 6 - Dɔnɔn kə̂ Siki: Tar kə̂ aw arə təbbə

Jisije kə təbbə kə Kristə

¹ Yeenn a, tar ddi bba ja paje wa? Ja paje nan, maji ta nayn mə majang tə̂ bba karə Lubba dda kə je mə-maji arə uta dɔɛ̂ wa?

² Baann ang! N-toje tokə dəwje kə̂ oyje mban arə majang ubba singa dɔje tə̂ ang. Yeenn a, ja kasəje ta nayn mə majang tə̂ bbay tokə baânn wa?

³ Ə-gərəje ang wa? Jeje tɔyn kə̂ jingaje batɛm n-ddeeje kâra baa kə Jeju-Kristə ngaâ joyje saa.

⁴ Ddəw batɛm tə̂ le, nayn to joyje ngaâ n̂-dubbuje kâra baa saa, mba karə kisi ləje kə̂ bbasinɛn to dang kə ye kə̂ ləw, tokə Kristə kə̂ oy ngaâ ndol ddəw singa-mɔngu tə̂ lə Bɔjeje Lubba kə̂ piti to laa le.

⁵ Yeenn bba, bbo n-ddeeje kâra baa saa ddəw koy tə̂ kə̂ joyje tokə laa le a, ja ddeeje kâra baa saa ddəw ndol tə̂ kə̂ joyje, a ja ndolje tokə laa le tɔ.

⁶ N-gərəje kə majɛ̂ to da-rɔ nɛ̂n-dda kə̂ maji ang le oy kə Kristə dɔ kakə-dəsə tə̂ mban. Yeenn a, bbo kə̂ da-rɔje tə̂ oy mban ngaa arə ja naynje to bbərəje le majang ang ngaa.

⁷ Mba dəw kə̂ oy tee mə bbərə tə̂ lə majang kə ddang mban.

⁸ A joyje kə Kristə mban arə n-gərəje to ja kisije kəm baa saa tɔ.

⁹ Mba n-gərəje tɔ to, Kristə kə̂ oy ngaâ ndol mban le a təl koy ang ngaa. Yo ubba singa dɔɛ̂ tə̂ ang ngaa.

¹⁰ Koy kə̂ noy le noy gɔl kâra baa njaa a bbayɛ̂, ta tee kə dəwje mə bbərə tə̂ lə majang kə ddang. A bbasinɛn kə̂ nisi kəm baa le nisi kəm baa mba Lubba.

¹¹ Yeenn a, sese njaa kara maji karə ooje rɔse to oyje mban arə majang ubba singa dɔse tə̂ ang ngaa, isije kəm baa mba Lubba ddəw tə̂ lə Jeju-Kristə.

¹² Yeenn a, arəje majang ɔn dɔ rɔse kə̂ a ta koy marə ndɔ le ang ngaa. Yeenn bba, â ddaje nɛ̂n ddəw bbo tə̂ kə̂ da-rɔse tə̂ le ang.

¹³ Unnje dəbbə rɔse kâra ilaje majang tə̂ ang ngaa, mba a təl to nɛ̂n-dda kula kə̂ gatə gatə ang. A unnje rɔse arəje Lubba tokə dəwje kə̂ oyje bba ndolje. Unnje rɔse tɔyn ilaje kula tə̂ lə Lubba karə rɔse le təl to nɛ̂n kə̂ ta dda nɛ̂n kula kə̂ gatə gatə.

¹⁴ Majang a təl kubba singa dɔse tə̂ ang ngaa. Mba eeje kɔ Ndu tə̂ ang, eeje kɔ mə-maji tə̂ lə Lubba.

Dəwje kə̂ aw ddaje nɛ̂nje kə̂ gatə gatə

¹⁵ Ddi wa? Jeeje kɔ mə-maji tə̂ lə Lubba bbo n-naynje kɔ Ndu tə̂ ang ngaa. Mba yeenn bba, ja ddaje majang wa? Baann ang!

¹⁶ Ə-gərəje ang wa? Bbo unnje rɔse to bbərə lə marə dəw ta koo tɛɛ̂ a, ə-ddeeje to bbərə lə dəw kə̂ aw ooje tɛɛ̂ le. Ddəw kâra baa, bbo unnje rɔse ilaje majang tə̂ a, majang le a kaw kə se karə oyje. A bbo unnje rɔse ta koo ta Lubba a, Lubba a dda karə ə-ddeeje to dəwje kə̂ gatə gatə.

¹⁷ A wooyo arə Lubba, mba sese kə̂ ləw ə-toje to bbərəje lə majang le bbasinɛn ə-ddaje kula kə mə-kâra ddəw nɛ̂n-tɔju tə̂ kə̂ maji kə̂ n̂-tɔjuse.

¹⁸ Lubba ɔruse ta nɛ̂n-dda tə̂ kə̂ maji ang mban ngaa arə ilaje rɔse kula nɛ̂n-dda tə̂ kə̂ gatə gatə.

¹⁹ Munn nɛ̂n-kɔju-marɛ̂ dɔ dəwje tə̂ bba maw pa nɛ̂n tar nəənn, mba ə-gərəje nɛ̂n tɔyn kə majɛ̂ ang bbay. Dɔngɔr, unnje rɔse tɔyn tokə lə bbərəje ə-ddaje nɛ̂n kula yərəw kə nɛ̂n kə ngabula. Nɛ̂njeenn le aw ddaje arə aw mbətəje ta Lubba. Yeenn a, bbasinɛn maji karə unnje rɔse tɔyn to bbərəje ə-ddaje nɛ̂n kula kə̂ gatə gatə bba karə isije to dəwje kə̂ ngəmje rɔde dang mba Lubba.

²⁰ Kar tə̂ kə̂ ə-naynje to bbərəje lə majang le tar nɛ̂n-dda kə̂ gatə gatə osose tə̂ ang.

²¹ Nɛ̂nje kə̂ ə-ddaje ləw arə to rɔ-kul ləse bbasinɛn nəənn le ddi â ingaje tə̂ wa? Nɛ̂njeenn le aw aw kə dəw karə inga yo.

²² A bbasinɛn, Lubba ɔruse bbərə tə̂ lə majang kə ddang arə ə-ddeeje to bbərəje laa. Nɛ̂n kə̂ goe tə̂ to rɔse kə̂ ə-ngəmje dang mba Lubba ngaa. Tee kɔnyɛ̂ tə̂ a, â kingaje təbbə kə̂ to kə ndɔ kə ndɔ.

²³ Mba kuka kə̂ dəw aw inga go majang tə̂ to yo. A mə-maji lə Lubba kə̂ to nɛ̂n-karə-baa le to təbbə kə̂ to kə ndɔ kə ndɔ ddəw ddee tə̂ kə̂ n-ddeeje kâra baa kə Əbbəjeje Jeju-Kristə.