Rɔmɛnje 5 - Dɔnɔn kə̂ Siki: Tar kə̂ aw arə təbbə

Jisije kə mə-wul-lɔm kə Lubba

¹ Yeenn a, n-ddeeje gatə gatə kəm Lubba tə̂ mban mba məje kə̂ junn jarə Əbbəjeje Jeju-Kristə arə məje wul lɔm kə Lubba ddəw tə̂ laa ngaa.

² Ddəw tə̂ lə Jeju kə̂ junnje məje jarɛ̂ le â Lubba dda nɛ̂n kə je mə-maji ngaâ n-naynje ddəwe tə̂. Yeenn bba, jaw ddaje rɔ-nəəl, mba jundaje məje to jeje kara ja kingaje piti lə Lubba.

³ Dɔ ye tə̂ənn, mə nɛ̂n kəm-to-ndooje tə̂ kə̂ aw ingaje kara jaw ddaje rɔ-nəəl, mba n-gərəje to nɛ̂n kəm-to-ndoo aw dda arə jaw tɔje wurje.

⁴ Tɔ-wur ləje le aw dda arə jaw juwaje jarə ngəng mə nɛ̂n-nan tə̂. Ngaâ kuwa kə̂ jaw juwaje jarə ngəng le dda arə jaw jundaje məje dɔ Lubba tə̂.

⁵ Məje kə̂ jundaje dɔ Lubba tə̂ le a dda karə rɔje wul ang, mba Lubba arə Ndil-mə-nda kə̂ narəje le ula ndiki laa məje tə̂ tokə bo.

⁶ Tɔkɔrɔ, ləw kə̂ ddəw goto bbay le, kar kə̂ Lubba ɔju asə a, Kristə oy mba njê-nɛ̂n-ddaje kə̂ maji ang.

⁷ Ta karə dəw oy mba dəw kə̂ gatə gatə to nɛ̂n ndam ang. A du ang, marə dəw a ndiki ta koy mba dəw kə̂ to nje-nɛ̂n-dda kə̂ maji.

⁸ A Lubba tɔjuje ndiki kə̂ n̂-ndikije tokə be: Kar tə̂ kə̂ n-naynje mə nɛ̂n-ddaje tə̂ kə̂ maji ang bbay le, Kristə oy mba tar ləje.

⁹ Bbasinɛn, Lubba dda arə n-ddeeje gatə gatə kəmɛ̂ tə̂ ddəw məsə Jeju tə̂. Yeenn a, ddi bba a kɔku ddəw Jeju le karə ajije ta wungu tə̂ kə̂ Lubba dda kə je wa?

¹⁰ Kar tə̂ kə̂ n-toje nɛ̂n to njê-baanje lə Lubba le, Lubba təl unguje naan tə̂ saa ddəw koy tə̂ lə Ngonnɛ̂. Yeenn a, bbasinɛn kə̂ nunguje naan tə̂ saa mban le, ddi bba a kɔkɛ̂ ddəw karə najije ddəw təbbə tə̂ lə Ngonnɛ̂ le wa?

¹¹ Uta yeenn bbay, jaw ddaje rɔ-nəəl nɔn Lubba tə̂ ləje ddəw tə̂ lə Əbbəjeje Jeju-Kristə, mba ne â n̂-dda narə junguje naan tə̂ kə Lubba bbasinɛn.

Adam kə Kristə

¹² Majang ddee duninya tə̂ ddəw tə̂ lə dəw kâra kə̂ ria nan Adam. Ngaâ majang le ddee kə yo. Yeenn bba yo aw tɔl dəwje tɔyn, mba dəwje tɔyn ddaje majang.

¹³ Kete bba karə Lubba tee kə Ndu arə Mɔyijə le, majang to duninya tə̂ mban. A Lubba aa lo kə majang tə̂ ang, mba Ndu goto bbay.

¹⁴ A unn kute dɔ ndɔ tə̂ lə Adam ndərəng dɔ ndɔ tə̂ lə Mɔyijə, yo ubba singa dɔ dəwje tə̂. Adam aal ta Lubba, a njê kə̂ ddaje majang tokə laa ang njaa kara yo ubba singa dɔde tə̂ tɔ. Adam le to tokə Jeju kə̂ a ddee.

¹⁵ A mə-maji kə̂ Lubba dda to nɛ̂n-karə-baa kə̂ to dang kə nɛ̂n kə̂ to kə dɔgɔlɛ̂ ang kə̂ Adam dda. Tɔkɔrɔ, dəwje nya oyje mba majang kə̂ dəw kə̂ kâra baa nəənn dda le. A nɛ̂n kə̂ bo uta nya to mə-maji kə̂ Lubba dda kə dəwje ngaâ arəde nɛ̂n baa ddəw tə̂ lə dəw kâra kə̂ to Jeju-Kristə.

¹⁶ Nɛ̂n-karə-baa lə Lubba le dda kula kə̂ to dang kə majang lə Adam le. Majang lə dəw kâra le dda arə Lubba gangə sariya dɔ dəwje tə̂ tɔyn. A mə-maji lə Lubba dda arə dəwje kə̂ ddaje majang nya ddeeje gatə gatə kəmɛ̂ tə̂.

¹⁷ Tɔkɔrɔ, yo aw ubba singa dɔ dəwje tə̂ mba dəw kâra kə majang lə dəw kâra. A ddəw tə̂ lə dəw kâra kə̂ to Jeju-Kristə, dəwje ingaje nɛ̂n uta dɔɛ̂. Bbo baann a, ddi bba a kɔku ddəw karə dede tɔyn kə̂ Lubba dda kə de mə-maji nya ddəm dda arə n̂-ddeeje gatə gatə kəmɛ̂ tə̂ ddəm, disije kə təbbə ngaâ dɔnje mbay ddəw tə̂ lə Kristə wa?

¹⁸ Yeenn a, majang lə dəw kâra kə̂ to Adam dda arə Lubba gangə sariya dɔ dəwje tə̂ tɔyn. Ddəw kâra baa, kula kə̂ gatə gatə lə dəw kâra kə̂ to Jeju-Kristə a dda karə dəwje tɔyn ddeeje gatə gatə ngaâ isije kə təbbə.

¹⁹ Dəwje nya ddeeje to njê-nɛ̂n-ddaje kə̂ maji ang ddəw tə̂ lə dəw kâra kə̂ aal ta Lubba. Ddəw kâra baa, dəwje nya ddeeje gatə gatə kəm Lubba tə̂ ddəw tə̂ lə dəw kâra kə̂ oo ta Lubba.

²⁰ Ndu ddee mba karə majangje ddeeje tokə banya. A lo kə̂ majang banya tə̂, mə-maji lə Lubba bo tə̂ kə kete kete bbay tɔ.

²¹ Ddəw kâra baa tokə majang ee kə singa ta kaw kə dəwje karə ingaje yo le, mə-maji lə Lubba ee kə singa mba dda karə dəwje ddeeje gatə gatə kəmɛ̂ tə̂, ta karə dingaje təbbə kə̂ to kə ndɔ kə ndɔ ddəw tə̂ lə Əbbəjeje Jeju-Kristə.