Rɔmɛnje 4 - Dɔnɔn kə̂ Siki: Tar kə̂ aw arə təbbə

Abaraham to nɛ̂n-kɔju-marɛ̂

¹ Bbasinɛn nəənn, tar ddi bba ja paje dɔ kajeje Abaraham tə̂ wa? Ddi â ninga kə dɔ rɔɛ̂ njaa wa?

² Bbo Lubba oo Abaraham to dəw kə̂ gatə gatə mba nɛ̂n kə̂ n̂-dda a, nasə ta kɔsu gaji rɔɛ̂. A nâ kɔsu gaji rɔɛ̂ le kəm Lubba tə̂ ang.

³ Mba Makəturu lə Lubba pa nan: «Abaraham unn məɛ̂ arə Lubba, yeenn bba Lubba ooe to dəw kə̂ gatə gatə mba mə-kunn laa le.»

⁴ Dəw dda kula a, a kinga kuka laa. To mə-maji â n̂-dda saa ang. To kuka kə̂ asə karə ninga njaa.

⁵ Bbo dəw kə̂ dda marə kula kâra ang unn məɛ̂ arə Lubba kə̂ aw dda arə nje-nɛ̂n-dda kə̂ maji ang ddee gatə gatə a, Lubba a koo mə-kunn laa ngaâ nâ ddee to dəw kə̂ gatə gatə.

⁶ Ddəw kâra baa, Dabbiti piti rɔ-nəəl lə dəw kə̂ Lubba ooe to dəw kə̂ gatə gatə, a aa lo kə kula-ddɛɛ̂ tə̂ ang. N̂-pa nan:

⁷ Maji arəde, de dəwje kə̂ Lubba ɔru tar majang ləde dɔde tə̂, ngaâ ɔru majang ləde kə ddang.

⁸ Maji arɛ̂, ne dəw kə̂ Əbbə-dəwje aa lo kə majang tə̂ laa ang!

⁹ Tar kisi maji le to mba dəwje kə̂ ujaje ganja kə karəde baa wase to mba dəwje kə̂ uja ganja ang tɔ wa? Mba n-paje nan ddəw mə-kunn tə̂ lə Abaraham â Lubba ooe nɛ̂n to dəw kə̂ gatə gatə.

¹⁰ A dɔ ndɔ tə̂ kə̂ dda bba nooe nɛ̂n to dəw kə̂ gatə gatə le wa? Lubba ooe to dəw kə̂ gatə gatə kete bba nuja ganja wase go ganja tə̂ kə̂ nuja wa? Kete bba nuja ganja, bbo goe tə̂ ang.

¹¹ Kete bba karə Abaraham uja ganja le, Lubba ooe to dəw kə̂ gatə gatə, mba noo məɛ̂ tə̂ saa. Goe tə̂ guku bba nuja ganja to marə əndaji kə̂ tɔju to Lubba ooe to dəw kə̂ gatə gatə ɔju dɔ mə-kunn laa. Mba yeenn bba, n̂-ddee nɛ̂n to bɔ dəwje tɔyn kə̂ ujaje ganja ang, a ooje məde tə̂. Lubba oode to dəwje kə̂ gatə gatə.

¹² N̂-ddee to bɔ dəwje kə̂ ujaje ganja tɔ, yeenn pa nan dede kə̂ daaje lo kə ganja tə̂ ləde kâra baa ang, a daw ndajije mə-kunn lə bɔjeje Abaraham le kə̂ unn məɛ̂ kete bba uja ganja le.

Lubba unn ndue ta karə nɛ̂n njê-mə-kunnje tɔyn

¹³ Lubba pa arə Abaraham kə ngakɛɛ̂jê nan, na karəde nangə nəənn to ləde. Mba nɛ̂n kə̂ Abaraham dda kə turu Ndu Lubba bba Lubba unn nɛ̂n ndue baann ang. Nunn ndue baann mba mə-kunn lə Abaraham. Mba yeenn bba, Lubba ooe nɛ̂n to dəw kə̂ gatə gatə.

¹⁴ Bbo ta karə dəwje kə̂ aw ngəmje Ndu bba ingaje nɛ̂nje kə̂ Lubba unn ndue ta karə le a, mə-kunn a to nɛ̂n kə̂ baa ngaâ ndu kə̂ Lubba unn le a to nɛ̂n kə̂ baa tɔ.

¹⁵ Mba Ndu dda arə wungu dɔrɔ â aw ɔn Lubba. A lo kə̂ Ndu goto tə̂, nje-mbətə Ndu goto tə̂ tɔ.

¹⁶ Yeenn a, Lubba a karə dəwje nɛ̂nje kə̂ nunn ndue ta karə le ddəw mə-kunn tə̂. Baann bba nɛ̂n le a to nɛ̂n kə̂ dinga baa ddəw mə-maji tə̂ laa. N̂-ndiki ta karə nɛ̂n le ngaka Abaraham tɔyn. Nɛ̂n le to mba dəwje kə̂ eeje kɔ Ndu tə̂ kə karəde baa ang. To mba dəwje tɔyn kə̂ ooje məde tə̂ saa tokə Abaraham kə̂ oo məɛ̂ tə̂ le. Abaraham to bɔjeje tɔyn,

¹⁷ tokə Lubba pa tarɛ̂ Makəturu tə̂ laa nan: «Mundai to bɔ gəl-dəwje kə̂ banya.» Kəm Lubba tə̂ kə̂ noo məɛ̂ tə̂ saa le, Abaraham to bɔjeje. Lubba kə̂ arə təbbə dəwje kə̂ oyje ngaâ aw dda arə nɛ̂nje kə̂ toje ang bbay toje.

¹⁸ Abaraham le unda məɛ̂ dɔ Lubba tə̂ nyɔm. Noo məɛ̂ tə̂ ngaâ n̂-ddee to bɔ gəl-dəwje kə̂ banya nya tokə Lubba pa arɛ̂ nan: «Ngakai a banya tokə baann» le.

¹⁹ Bbal Abaraham aw ngɔsi kə kɔr kâra, a mə-kunn laa əngə ang. Noo rɔɛ̂ to dəw kə̂ oy mban ngaâ dɛnɛ̂n laa Sara aw katə.

²⁰ N̂-gərə məɛ̂ tə̂ to nâ kinga nɛ̂n kə̂ Lubba unn ndue mbɛɛ̂ le arə nəjə tar ang. A məɛ̂ kə̂ nunda dɔ Lubba tə̂ dda arə ninga singa ddəm nɔsu gaji Lubba ddəm.

²¹ N̂-gərə kə majɛ̂ to nɛ̂n kə̂ Lubba unn ndue ta dda le nee kə singa ta dda njaa.

²² Mba yeenn bba, Lubba ooe to dəw kə̂ gatə gatə.

²³ A tar kə̂ n̂-dda Makəturu tə̂ lə Lubba nan: «Lubba ooe to dəw kə̂ gatə gatə» le to mba Abaraham kə karɛ̂ ang.

²⁴ Tar le to mba jeje tɔ, jeje kə̂ Lubba ooje to dəwje kə̂ gatə gatə, mba jooje məje tə̂ kə Əbbəjeje Jeju kə̂ oy, a ndol le.

²⁵ Jeju le, dilɛ̂ ji dəwje tə̂ darə n̂-tɔlɛ̂je mba majang ləje ngaâ Lubba arə n̂-ndol bba karə Lubba oo nɛ̂n je to dəwje kə̂ gatə gatə.