Rɔmɛnje 3 - Dɔnɔn kə̂ Siki: Tar kə̂ aw arə təbbə

Dəw kâra kə̂ to gatə gatə goto

¹ Yeenn a, bbo dəw to Jiipi a, ddi kə̂ maji â nuta nɛ̂n kəsə dəwje wa? Ddi kə̂ maji â to kuja ganja tə̂ wa?

² Nɛ̂n kə̂ maji to mə nɛ̂nje tə̂ nya njaa. Dɔngɔr njaa kara, Jiipije â Lubba inya tarje laa mə jide tə̂.

³ Tɔkɔrɔ njaa, marɛ̂je horode tə̂ ngəmje mə-kunn ləde ang. A yeenn â, a dda karə Lubba tusu nɛ̂n nɛ̂n kə̂ nunn ndue ta dda le ninya wa?

⁴ Baann ang! Maji karə dəwje gərəjə kə majɛ̂ to Lubba aw pa tar kə̂ tɔkɔrɔ. A dəwje tɔyn aw ərəje ngəm. Mba yeenn bba Makəturu lə Lubba pa nan: «Maji karə dəwje gərəje to ə-to gatə gatə ddəw tar tə̂ kə̂ aw pa. Ta bbo dâ ta gangə sariya dɔi tə̂ a, tar uwai ang.»

⁵ Majang kə̂ jaw dda â dəwje gərəje nɛ̂n to Lubba to gatə gatə. Yeenn a, tar ddi â ja paje wa? Ja pa nan Lubba to gatə gatə ang mba kunda kə̂ naw nundaje kə ndəy mba majang ləje wa? (Tar-pa lə dəwje â maw pa nəənn.)

⁶ Ndɔ kâra ang, mba bbo Lubba to gatə gatə ang a, nâ kasə gangə sariya dɔ dəwje tə̂ kə̂ duninya tə̂ tokə baânn wa?

⁷ A bbo ngəm kə̂ maw mərə â dəwje gərəje nɛ̂n to tar lə Lubba to tar kə̂ tɔkɔrɔ ngaâ dəwje aw ɔsuje nɛ̂n gajɛ̂ a, dâ gangə sariya dɔm tə̂ tokə nje-nɛ̂n-dda kə̂ maji ang mba ddi wa?

⁸ Yeenn a, mba ddi â n-pa tokə marɛ̂je kə̂ aw paje nan: «Maji karə n-ddaje majang jarə nɛ̂n kə̂ maji ddee ddəwe tə̂» ang wa? Marɛ̂je kə̂ ndikije ta tuju rim paje nan əman njaa m-pa tarjeenn. Dedeenn le, dasəje karə Lubba gangə sariya dɔde tə̂.

⁹ Ddi wa? Jee Jiipije juta kəsə dəwje wa? Baann ang! M-tɔju kə ddaka mban to Jiipije ddəm Gɛrɛkəje ddəm dede tɔyn njaa majang ɔn dɔde.

¹⁰ Ddəw kâra baa tokə Makəturu lə Lubba pa nan: «Dəw kə̂ gatə gatə goto, kâra njaa kara goto.

¹¹ Dəw kâra kə̂ gərə nɛ̂n goto, Dəw kâra kə̂ sangə ddəw lə Lubba goto.

¹² Dəwje tɔyn inyaje ddəw kə̂ maji, dede tɔyn njaa n̂-tuju rɔde. Dəw kə̂ dda nɛ̂n kə̂ maji goto, kâra njaa kara goto.

¹³ Ddəw-gɔsude tokə buwa-yo kə̂ n̂-tula tɛɛ̂ ang, Ndɔnde to ənga kərə dəwje, Tar kə̂ tade tə̂ tokə maann-ta li.

¹⁴ Tar kə̂ tade tə̂ to yo-kɔru dɔrɔ, tar le aw ti wur dəw to ti.

¹⁵ Gɔlde ɔlɛ pel pel ta kaw tɔl dəw.

¹⁶ Lo tɔyn kə̂ n̂-ndayje tə̂, daw tujuje nɛ̂n ngaâ daw dulaje kəm dəwje ndoo tə̂.

¹⁷ N̂-gərəje ddəw kə̂ ta kisi nɛ̂n kə mə-wul-lɔm kə dəwje ang.

¹⁸ Bbəəl lə Lubba goto məde tə̂.»

¹⁹ A n-gərə to nɛ̂n tɔyn kə̂ Ndu lə Lubba pa le, n̂-pa mba dəwje kə̂ Ndu ɔn dɔde le. Yeenn bba karə dəw kâra oo tar ta pa ang ngaâ karə dəwje tɔyn gərəje to sariya lə Lubba to dɔ dəwje tə̂ tɔyn kə̂ duninya tə̂.

²⁰ Mba yeenn bba, dəw kâra kə̂ a dda nɛ̂n kə turu Ndu ta to nɛ̂n gatə gatə kəm Lubba tə̂ goto. Tɔkɔrɔ, Ndu arə ddəw dəw ta gərə majang laa njaa, a bbayɛ̂.

Gusu kə̂ Lubba dda arə dəwje ddeeje nɛ̂n gatə gatə

²¹ A bbasinɛn, Lubba tɔju gusu kə̂ n̂-dda narə dəwje ddeeje nɛ̂n gatə gatə kəmɛ̂ tə̂. Gusu le to ddəw Ndu tə̂ ang. Ndu kə makəturu lə njê-kilaje mbər tar lə Lubba tɔjuje nɛ̂ɛnn le mban.

²² Lubba dda arə dəwje ddeeje gatə gatə kəmɛ̂ tə̂ mba məde kə̂ dunnje darə Jeju-Kristə. N̂-dda baann mba dəwje tɔyn kə̂ unnje məde arə Kristə, mba Lubba ɔru kəm dəw ang.

²³ Dəwje tɔyn ddaje majang arə dasəje piti lə Lubba ang.

²⁴ Dəwje ukaje marə nɛ̂n ang ddəm a ddəw mə-maji tə̂ lə Lubba, n̂-dda narə n̂-ddeeje gatə gatə ddəw tə̂ lə Jeju-Kristə kə̂ ɔrude mə majang tə̂ kə ddang.

^25-26 Lubba unn Kristə le to nɛ̂n-polo. Yeenn bba ddəw koy tə̂ laa, narɛ̂ ddəw karə tar majang ɔru dɔ dəwje tə̂ kə̂ ooje məde tə̂ saa. Baann â Lubba tɔju nɛ̂n to n̂-nayn naw to gatə gatə kə ndɔ tɔyn. Ləw, n̂-to tokə baann, n̂-gangə sariya dɔde tə̂ mba majang ləde ang. N̂-tɔ wure. Bbokənɛn kara n̂-nayn naw to gatə gatə, mba n̂-ndiki ta nayn gatə gatə ddəm ta dda karə dəwje kə̂ ooje məde tə̂ kə Jeju ddeeje gatə gatə ddəm.

²⁷ Yeenn a, marə nɛ̂n-kɔsu gaji rɔ to bbay wa? Nɛ̂n kâra goto. Mba ddi wa? Mba dda nɛ̂n kə turu Ndu arə ddəw dəw ta kunda gue ang. Nɛ̂n kə̂ ngəng â to mə-kunn.

²⁸ Tɔkɔrɔ n-pa nan: Dəw ddee gatə gatə mba mə-kunn, bbo mba ngəm kə̂ dəw le ngəm Ndu ang.

²⁹ Bbo baann ang a, Lubba a to Lubba lə Jiipije kə karəde baa wa? N̂-to Lubba lə kəsə dəwje tɔ,

³⁰ mba Lubba kâra baa. Jiipije wase kəsə dəwje kara, ne â nâ dda karə n̂-ddeeje gatə gatə ɔju dɔ mə-kunn ləde.

³¹ Yeenn a, bbo jooje məje tə̂ a, Ndu ddee to marə nɛ̂n ang ngaa wa? Baann ang. Yeenn dda arə Ndu təl ddee to nɛ̂n kə̂ maji nya kəm dəwje tə̂.