Rɔmɛnje 2 - Dɔnɔn kə̂ Siki: Tar kə̂ aw arə təbbə

Sariya lə Lubba

¹ A əi kə̂ aw gangə sariya dɔ njê-marije tə̂ le, ə-to nân wa kara tar a kɔru dɔi tə̂ ang. Sariya kə̂ aw gangə dɔ njê-marije tə̂ le, nayn to əi njaa aw gangə sariya dɔi tə̂ənn, mba əi kara aw dda nɛ̂n tokə lə njê-marije le tɔ.

² Mba n-gərə to Lubba aw gangə sariya ddəw tar tə̂ kə̂ tɔkɔrɔ dɔ dəwje tə̂ kə̂ aw ddaje nɛ̂n kə̂ baann.

³ Əi aw gangə sariya dɔ dəwje tə̂ kə̂ aw ddaje nɛ̂nje kə̂ baann kə̂ əi kara aw dda tɔ. A əi, əjə to â tee ta sariya tə̂ lə Lubba wa?

⁴ Lubba aw dda maji səi nya. N̂-ndiki ta gangə sariya dɔi tə̂ kə tɔkɛ̂ ang. Naw nooi kə kəmɛ̂, a oo nɛ̂njeenn to nɛ̂n kə̂ baa wa? Ə-gərə to Lubba aw dda səi mə-maji baann karə ə-turu məi ang wa?

⁵ A məi kətərə arə ə-ndiki ta turu ddəw ləi ang. Aw mbɔn wungu lə Lubba dɔi tə̂ mba nginan nɛ̂n ndɔ kə̂ Lubba a gangə nɛ̂n sariya laa kə̂ gatə gatə dɔ dəwje tə̂.

⁶ Nâ kuka dəw kâra kâra asə kula-ddɛɛ̂.

⁷ Marə dəwje sangəje ddəw ta dda maji kə ndɔ tɔyn mba karə Lubba pitide, karə n̂-walde ngaâ karə narəde təbbə kə̂ a tuju ang. Lubba a karəde təbbə kə̂ to kə ndɔ kə ndɔ.

⁸ A njê kə̂ ddaje dɔ-kətərə saa, mbətəje tar kə̂ tɔkɔrɔ ngaâ aw ddaje bbərə lə nɛ̂n kə̂ gatə gatə ang, Lubba a karə wungu laa kə̂ to bbəəl nya oso dɔde tə̂.

⁹ Nɛ̂n kəm-to-ndoo kə nɛ̂n-bbəəl a koso dɔ dəwje tə̂ tɔyn kə̂ ddaje majang, a kunn-kute dɔ Jiipije tə̂ dɔngɔr bba a tee dɔ Gɛrɛkəje tə̂.

¹⁰ A dəwje tɔyn kə̂ aw ddaje maji, Lubba a kɔsu gajide, nâ walde, nâ karə məde wul lɔm, a kunn-kute dɔ Jiipije tə̂ dɔngɔr bba a tee dɔ Gɛrɛkəje tə̂.

¹¹ Mba Lubba ɔru kəm dəw ang.

¹² Dəwje tɔyn kə̂ gərəje Ndu lə Mɔyijə ang ngaâ aw ddaje majang, n̂-gərəje Ndu lə Mɔyijə le ang njaa, a dâ koyje. A dəwje tɔyn kə̂ gərəje Ndu le kə majɛ̂, a aw ddaje majang, dâ gangə sariya dɔde tə̂ ddəw Ndu tə̂ lə Mɔyijə le.

¹³ Mba dəwje kə̂ ooje Ndu lə Mɔyijə kə mbide to koo baa toje gatə gatə kəm Lubba tə̂ ang. Njê kə̂ ddaje nɛ̂n kə turu Ndu le bba Lubba a karə n̂-ddeeje gatə gatə kəmɛ̂ tə̂.

¹⁴ A bbo marə dəwje kə̂ toje to Jiipije ang kə̂ gərəje Ndu lə Mɔyijə ang aw ddaje nɛ̂n kə turu Ndu le kə dɔde baa njaa a, yeenn tɔju to, Ndu le to məde tə̂ nu.

¹⁵ N̂-tɔjuje to nɛ̂n kə̂ Ndu duju ta dda to məde tə̂ ngaâ kəjə ləde aw ɔru najɛ̂. Marə nɛ̂n kə̂ aw tɔju nɛ̂ɛnn tɔ to, dede njaa, marɛ̂jeenn a, kəjə ləde aw tɔjude to daw ddaje majang. Marɛ̂jeenn a, kəjə ləde aw tɔjude to daw ddaje nɛ̂n kə̂ maji.

¹⁶ Nɛ̂ɛnn a tee kə ddaka kəm dəwje tə̂ dɔ ndɔ tə̂ kə̂ Lubba a karə Jeju-Kristə gangə sariya dɔ nɛ̂nje tə̂ kə̂ dəwje aw ddaje lo-kiyɛ̂ tə̂ tokə Tar kə̂ Maji kə̂ maw mila mbəre pa.

Jiipije kə Ndu lə Mɔyijə

¹⁷ Əi kə̂ ə-pa nan ə-to Jiipi kə̂ unda məi dɔ Ndu tə̂ lə Mɔyijə ngaâ aw unda gui kə Lubba ləi.

¹⁸ Əi kə̂ ə-gərə nɛ̂n kə̂ mə Lubba ndiki ngaâ Ndu aw tɔji nɛ̂n karə ə-gərə nɛ̂n kə̂ maji.

¹⁹ Əi kə̂ oo rɔi to nje-kila kakə ji njê-kəm-tɔje tə̂ ngaâ ə-to puru-ngeel kə̂ dəwje kə̂ eeje lo ndul tə̂ aw ooje nɛ̂n lo.

²⁰ Oo rɔi to nje-tɔju nɛ̂n dəwje kə̂ gərəje nɛ̂n ang ddəm nje-tɔju nɛ̂n ngannje kə̂ ngaji ddəm. Tɔkɔrɔ oo to Ndu unn ddəw arə ə-gərə nɛ̂n ddəm ə-gərə tar kə̂ tɔkɔrɔ ddəm mban.

²¹ Ya! Əi kə̂ aw tɔju nɛ̂n njê-marije le, əi njaa ə-tɔju rɔi nɛ̂n ang wa? Aw ila mbər arə dəwje ə-pa nan, maji karə dəw bboko ang, a əi aw bboko tokə baânn wa?

²² Ə-pa nan maji karə dəw dda lo-to-majang ang, a əi aw dda lo-to-majang tokə baânn wa? Məi mbətə kɔrje, a aw bboko nɛ̂nje kə̂ mə kəy-polo kɔrje tə̂ le tokə baânn wa?

²³ Aw unda gui mba Ndu, a aw dda nɛ̂n kə turu Ndu le ang tokə baânn wa? Yeenn le to tuju ri Lubba.

²⁴ Mba yeenn bba, Makəturu lə Lubba pa nan: «Kəsə gəl-dəwje aw tajije ri Lubba ɔju dɔse.»

²⁵ Tɔkɔrɔ, bbo əi Jiipi aw dda nɛ̂n kə̂ Ndu duju a, ganja kə̂ dujai to nɛ̂n kə̂ maji. A bbo dujai ganja bba ə-dda nɛ̂n kə̂ Ndu duju ang a, ə-to ddəw kâra baa kə dəw kə̂ dujɛ̂ ganja ang.

²⁶ A bbo dəw kə̂ dujɛ̂ ganja ang bbəəl Ndu lə Lubba a, Lubba a kooe to dəw kə̂ dujɛ̂ ganja ngaa ang wa?

²⁷ Dəw kə̂ dujɛ̂ ganja ang ngaâ aw bbəəl Ndu le a gangə sariya dɔi tə̂, əi kə̂ ee kə Ndu ngaâ dujai ganja, a ə-bbəəl Ndu le ang.

²⁸ Nɛ̂n kə̂ dəw aw oo rɔ dəw tə̂ kə kəmɛ̂ tokə koro do ganja kə̂ rɔ dəw tə̂, nɛ̂njeenn â aw tɔju to dəw le to Jiipi kə̂ tɔkɔrɔ njaa ang. Kuja ganja kə̂ tɔkɔrɔ to kuja ganja kə̂ da-rɔ tə̂ ang.

²⁹ Dəw kə̂ to Jiipi məɛ̂ tə̂ nu â to Jiipi kə̂ tɔkɔrɔ. Kuja ganja kə̂ tɔkɔrɔ to ye kə̂ mə dəw tə̂, ddəw tə̂ lə Ndil lə Lubba bbo ddəw Ndu tə̂ kə̂ n̂-dda makəturu tə̂ ang. Jiipi kə̂ tɔkɔrɔ, Lubba â aw pite bbo dəwje â aw piteje ang.