Rɔmɛnje 16 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ M-dujuse karə ə-taaje kɔn-nannje Poebe kə rɔse tə̂, mba naw dda kula Egilisi tə̂ kə̂ Sankere.

² Ə-tɛɛ̂je kə rɔse tə̂ kə ri Əbbə-dəwje tokə njê-mə-kunnje aw ddaje le. Nɛ̂n tɔyn kə̂ n̂-dujuse karə umɛ̂nje tə̂ a, umɛ̂nje tə̂. Mba numan dəwje nya ddəm əman njaa kara numanʼm ddəm.

³ Ə-ddaje lapiya Pirisil de kə Akilas kə̂ toje to njê-kula marəmje kula tə̂ lə Jeju-Kristə.

⁴ Dunnje rɔde dilaje kɔrɔ̂ bba n̂-teeje səm ta yo tə̂. Marəde wooyo kə karəm baa ang, Egilisije lə dəwje tɔyn kə̂ toje to Jiipije ang kara arəde wooyo tɔ.

⁵ Ə-ddaje lapiya Egilisi kə̂ to mə kəyje tə̂ ləde le tɔ. Ə-ddaje lapiya Əpaynɛtə ngokɔnʼm kə̂ m-ndike nya, kə̂ to dɔngɔr dəw kə̂ Aji tə̂ kə̂ unn məɛ̂ arə Kristə.

⁶ Ə-ddaje lapiya Mari arəmje. N̂-dda kula mbase nya.

⁷ Ə-ddaje lapiya Andronikus de kə Juniyas. N̂-toje to nujuje ləm ddəm njê-buwa to kəy-kula tə̂ marəmje ddəm. N̂-toje to marə njê-kaw-kulaje kə̂ dəwje gərəjede nya. Dunnje məde darə Kristə kete darəm.

⁸ Ə-ddaje lapiya Ampiliyatus ngokɔnʼm kə̂ m-ndike nya ddəw mə-kâra tə̂ kə̂ n-dda kə Əbbə-dəwje.

⁹ Ə-ddaje lapiya Urbɛn kə̂ to nje-kula-marəje kula tə̂ lə Kristə, ne kə Estakis kə̂ m-ndike nya.

¹⁰ Ə-ddaje lapiya Apelɛs kə̂ pa-nja laa tɔju to nunn məɛ̂ tɔkɔrɔ narə Kristə, ə-ddaje lapiya dəwje kə̂ mə kəy tə̂ lə Aristobul.

¹¹ Ə-ddaje lapiya Erodiyɔn kə̂ to nuju ləm kə dəwje kə̂ mə kəy tə̂ lə Narsis kə̂ ooje məde tə̂ kə Əbbə-dəwje.

¹² Ə-ddaje lapiya Tripɛnn de kə Tripoje. N̂-ddaje kula nya mba Əbbə-dəwje. Ə-ddaje lapiya Pɛrsidə kə̂ to kɔn-nannje kə̂ m-ndike nya. Ne kara n̂-dda kula nya mba Əbbə-dəwje.

¹³ Ə-ddaje lapiya Rupus kə̂ Əbbə-dəwje mbəre de kə kɔɛ̂nje kə̂ nayn to kɔnʼmje tɔ.

¹⁴ Ə-ddaje lapiya Asɛnkritə, de kə Pelegɔn kə Ɛrmɛs, Patrobas, Ermas kə njê-mə-kunnje kə̂ isije kə de.

¹⁵ Ə-ddaje lapiya Pilologə, Juli kə Nere de kə kɔn-nannɛ̂ kə Olɛmpas kə njê-mə-kunnje tɔyn kə̂ isije kə de.

¹⁶ Ə-toje mbi naan ə-ddaje nɛ̂n naan lapiya to lapiya kə̂ maji tɔyn. Egilisije lə Kristə tɔyn ddase lapiya.

Pɔl ndɔru mbi njê-mə-kunnje

¹⁷ Ngakɔnʼmje, nɛ̂n kə̂ mâ dujuse â nəənn: Aaje rɔse rɔ dəwje tə̂ kə̂ aw ddaje arə njê-mə-kunnje aw tinje naan. Dâ paje tar kə̂ to dang kə nɛ̂n-tɔju kə̂ n-tɔjuse ngaâ dâ ddaje karə njê-mə-kunnje osoje mə majang tə̂. Aynjede,

¹⁸ mba dəwje kə̂ baann toje to bbərə-kulaje lə Əbbəjeje Kristə ang. A daw dəjəje kə dɔ məde tə̂ njaa. Daw dərəje dəwje kə̂ kəmde ɔru ang ddəw tarje tə̂ kə̂ tade tə̂ kə̂ rii to rii ddəm tarje kə̂ daw dərəje nɛ̂n kəm dəwje ddəm.

¹⁹ Tɔkɔrɔ njaa, dəwje tɔyn gərəje to aw ooje ta Əbbə-dəwje kə majɛ̂. Yeenn bba, rɔm nəələm nya mbase. A m-ndiki karə kəm-karɛ ddususe bba karə ə-ddaje nɛ̂n kə̂ maji, karə ə-ngəmje rɔse, karə aynje nɛ̂n kə̂ maji ang.

²⁰ Mbɔr ang a, Lubba kə̂ nje-karə mə-wul-lɔm a rii Satan nangə̂ kɔ gɔlse tə̂. Maji karə mə-maji lə Əbbəjeje Jeju nayn kə se.

²¹ Timɔte kə̂ to nje-kula marəm ddase lapiya. Lusiyus kə Jajɔn de kə Sosipatɛr kə̂ n̂-toje to nujuje ləm, n̂-ddase lapiya tɔ.

²² Əman Tɛrtiwus kə̂ m-to nje-kuja makəturu nəənn, m-ddase lapiya kə ri Əbbəjeje.

²³ Əman Pɔl m-pa marəse, Gayus kə̂ m-to kəy laa kə Egilisi kə̂ to kəy laa ddase lapiya. Erastə kə̂ to nje-ngəm narɛ kə̂ bbe tə̂ le ddase lapiya. Ngokɔnje Kartus ddase lapiya tɔ. [

²⁴ Maji karə mə-maji lə Əbbəjeje nayn kə se tɔyn. Amɛnn.]

Piti to lə Lubba!

²⁵ Piti to lə Lubba kə̂ asə ta dda karə ubbaje singa ddəw mə-kunn tə̂, ddəw Tar kə̂ Maji tə̂ lə Jeju-Kristə kə̂ m-ddee mila mbəre marəse le. Ddəw Tar kə̂ Maji tə̂ le bba Lubba dda arə n-gərəje nɛ̂n nɛ̂n kə̂ to lo-kiyɛ̂ tə̂ ləw baa.

²⁶ Nɛ̂n kə̂ to lo-kiyɛ̂ tə̂ le bbasinɛn tee lo-karɛ tə̂ ddəw makəturuje tə̂ lə njê-kilaje mbər tar lə Lubba. Lubba kə̂ nje-kisi kə ndɔ kə ndɔ unn ndu tokə baann karə gəl-dəwje tɔyn ooje məde tə̂ saa ngaâ ooje tɛɛ̂.

²⁷ Lubba kâra baa â to nje-kəm-karɛ, piti to laa ddəw tə̂ lə Jeju-Kristə kə ndɔ kə ndɔ! Amɛnn!