Rɔmɛnje 15 - Dɔnɔn kə̂ Siki: Tar kə̂ aw arə təbbə

Maji ta dda nɛ̂n tokə lə Kristə

¹ Jeje kə̂ jubbaje singa, maji karə n-gərəje tar yɔɔ lə dəwje kə̂ ubbaje singa ang bba ta nɛ̂n kə̂ nəəlje jeje dɔrɔ â n-sangəje ang.

² Maji karə jeje kâra kâra n-sangəje ddəw ta nəəl kəm ngakɔnje tə̂ mba kisi maji ləde. Yeenn bba ja ddaje karə njê-mə-kunnje sangəje kə kete ddəw mə-kunn tə̂.

³ Mba Kristə le, nɛ̂n kə̂ nəəle â sangə ang. A Makəturu lə Lubba pa nan: «Nɛ̂n-tajije kə̂ dəwje aw tajije oso dɔm tə̂.»

⁴ Tɔkɔrɔ njaa, tarje tɔyn kə̂ n̂-dda ləw Makəturu tə̂ lə Lubba le, n̂-dda mba tɔju nɛ̂n je nɛ̂n bba karə wurje kə̂ jaw tɔje le ddəm singa kə̂ jaw jingaje ddəwe tə̂ le ddəm dda arə jundaje məje dɔ nɛ̂n tə̂ kə̂ Lubba pa tarɛ̂.

⁵ Maji karə Lubba kə̂ to nje-dda karə dəwje aw tɔje wurde ddəm nje-karə singa dəwje le ddəm dda arə asəje ta koo-ta-naan horose tə̂ tokə Jeju-Kristə tɔjuse.

⁶ Yeenn bba, məse a to kâra baa ngaâ â mbɔnje tase mba kɔsu nɛ̂n gaji Lubba kə̂ to Bɔ Əbbəjeje Jeju-Kristə.

⁷ Maji karə ə-taaje naan kə rɔ naan tə̂ mba kɔsu nɛ̂n gaji Lubba tokə Kristə kə̂ taase kə rɔɛ̂ tə̂ le.

⁸ M-pa marəse, Lubba aw dda nɛ̂n kə turu ndue. Mba yeenn bba Kristə ddee nɛ̂n to nje-kula lə Jiipije bba karə ndu Lubba kə̂ unn arə kajejedede ddee nɛ̂n to nɛ̂n kə̂ tɔkɔrɔ.

⁹ Kristə ddee tɔ bba karə dəwje kə̂ toje to Jiipije ang kara ɔsuje gaji Lubba mba maji laa. Ddəw kâra baa tokə Makəturu lə Lubba pa nan: «Mba yeenn bba, mâ kɔsu gajii horo gəl-dəwje tə̂, ngaa mâ kɔsu pa wal nɛ̂n rii.»

¹⁰ Makəturu lə Lubba pa bbay nan: «See gəl-dəwje, ə-ddaje rɔ-nəəl kə dəwje lə Lubba.»

¹¹ «See gəl-dəwje tɔyn, Ɔsuje gaji Əbbə-dəwje, see dəwje kə̂ bbeje tə̂ tɔyn, ə-piteje.»

¹² Ejayi pa tɔ nan: «Marə ngonn-ka Jese a ddee. Nâ kin ta kɔn dɔ gəl-dəwje, ngaâ nɛ̂n â dəwje le a kundaje məde dɔɛ̂ tə̂.»

¹³ Maji karə Lubba kə̂ aw dda bba dəwje aw undaje məde dɔ marə nɛ̂n tə̂ arə rɔ-nəəl kə mə-wul-lɔm ddusu məse ddəw mə-kunn tə̂. Baann bba â kundaje məse nya dɔ nɛ̂n tə̂ənn le ddəw singa-mɔngu tə̂ lə Ndil-mə-nda.

Kulaje lə Pɔl

¹⁴ Ngakɔnʼmje, əman njaa m-gərə to isije kə bbo nya ta dda nɛ̂n kə̂ maji. Ə-gərəje nɛ̂nje tɔyn kə̂ to tar ləse ta gərə mban ngaâ asəje ta karə naan ndəjə.

¹⁵ Muwa rɔm to dingaw bba m-dda makəturu nəənn mba kole nɛ̂n məse dɔ nɛ̂nje tə̂ kə ə-ndoje mban. M-dda tokə baann, mba Lubba dda səm mə-maji

¹⁶ karə m-ddee to nje-kula lə Jeju-Kristə horo dəwje tə̂ kə̂ toje to Jiipije ang. Nundam dang karə mila mbər Tar kə̂ Maji. Yeenn bba dəwje kə̂ toje to Jiipije ang a ddeeje tokə nɛ̂n-karə-baa kə̂ maji kəm Lubba tə̂. Ndil-mə-nda â dda arə nɛ̂n-karə-baa le maji tɔyn.

¹⁷ Mba yeenn bba, masə ta kunda gum kə kula kə̂ m-dda mba Lubba, ddəw mə-kâra tə̂ kə̂ m-dda kə Jeju-Kristə.

¹⁸ Mba mâ tay pa marə tar dang ang, tar nɛ̂n kə̂ Kristə dda ddəw tə̂ ləm â mâ pa. Ddəw tə̂ ləm, n̂-dda narə dəwje kə̂ toje to Jiipije ang ddaje nɛ̂n kə turu ndu Lubba. N̂-dda nɛ̂ɛnn le ddəw tarje tə̂ ddəm, ddəw kulaje tə̂ ddəm,

¹⁹ ddəw nɛ̂n-mɔri tə̂, ddəw nɛ̂nje tə̂ kə̂ dum dɔ koo, ddəw singa-mɔngu tə̂ lə Ndil-mə-nda. Yeenn bba, unn kute Jerujalɛm ndərəng Iliri, mila mbər Tar kə̂ Maji lə Kristə kə nangə̂ baa.

²⁰ Nɛ̂n kə̂ nəələm to lo kə̂ dəwje gərəje Kristə tə̂ ang bba m-ndiki ta kila mbər Tar kə̂ Maji le tə̂, mba m-ndiki ta kunn ta kula kə̂ dəw kə̂ dang â unda gɔlɛ̂ nangə̂ ang.

²¹ Mba yeenn bba, m-dda nɛ̂n kə turu ndu Makəturu lə Lubba kə̂ pa nan: «Dəwje kə̂ dila mbər tar laa darəde ang a kooeje, njê kə̂ ooje tar dɔɛ̂ tə̂ kâra ang a gərəje tar laa.»

Njaje lə Pɔl

²² Nɛ̂ɛnn le njaa â ɔkum ddəw nya karə maw rɔse tə̂.

²³ A bbasinɛn nəənn, kula ləm tunga nangəje tə̂ənn ngaa. A bbal banya nya njaa, maal kaw bbeê ləse ddam arə

²⁴ bbo kaw ləm kə Ɛspanyə a, mâ tee rɔse tə̂. M-ndiki ta koose karə asəm ngaji bba ta nday kaw ddəm munda məm ta karə umanʼmje kaw tə̂ ləm le ddəm.

²⁵ A kə bbasinɛn nəənn, maw maw kə Jerujalɛm ta kuman njê-mə-kunnje.

²⁶ Mba njê-mə-kunnje kə̂ Maseduwann ddəm njê kə̂ Akay ddəm ndikije ta mbɔn nɛ̂n kuman nɛ̂n njê-mə-kunnje kə̂ Jerujalɛm kə̂ toje to njê-ndooje.

²⁷ Dede njaa n̂-ndikije ta kumande, mba to nɛ̂n kə̂ to tar ləde ta dda. Mba bbo dede le kə̂ n̂-toje to Jiipije ang le dingaje nɛ̂nje lə Lubba kə̂ maji naan tə̂ kâra baa kə Jiipije a, to maji karə dede kara n-kaynje nɛ̂n-kingaje ləde dumanje nɛ̂n Jiipije le tɔ.

²⁸ Bbo m-dda nɛ̂njeenn le tɔyn, a bbo marəde nɛ̂n-mbɔn le a, mâ tee rɔse tə̂ bba mâ nday kaw Ɛspanyə.

²⁹ A m-gərə to bbo maw bbeê ləse a, Kristə a bbar tar kə̂ maji nya nya dɔse tə̂.

³⁰ Ngakɔnʼmje, m-walse kə ri Əbbəjeje Jeju-Kristə ddəm ddəw tə̂ lə Ndil-mə-nda kə̂ aw dda arə jaw ndikije naan ddəm karə umanʼmje ddɔ tə̂, ddəw duju Lubba tə̂ mbam

³¹ bba karə moso mə ji dəwje tə̂ kə̂ Jude kə̂ mbətəje Kristə le ang. Ə-dujuje Lubba arə njê-mə-kunnje taaje nɛ̂n kə̂ maw nɛ̂n kə Jerujalɛm ta karəde nəənn le kə rɔ-nəəl.

³² Yeenn bba bbo Lubba ndiki a, mâ tee rɔse tə̂ kə rɔ-nəəl ngaâ mâ kuwa rɔm rɔse tə̂ ngaji.

³³ Maji karə Lubba kə̂ nje-karə mə-wul-lɔm isi kə se tɔyn. Amɛnn!