Rɔmɛnje 14 - Dɔnɔn kə̂ Siki: Tar kə̂ aw arə təbbə

Tar nɛ̂n-kusa

¹ Dəw kə̂ mə-kunn laa sangə ang bbay, maji karə uwɛ̂je kə rɔse tə̂ ta kəjəje kə̂ məɛ̂ tə̂ ooje to kəjəje kə̂ maji ang ang.

² Junnje nɛ̂n-kɔju-marɛ̂: Marə dəw a kəjə to nasə ta kusa nɛ̂nje tɔyn, a marə dəw kə̂ mə-kunn laa sangə ang bbay, kam-naynje njaa dɔrɔ â aw usa.

³ Maji karə ne kə̂ naw nusa nɛ̂n tɔyn n̂-yabbə ne kə̂ naw sangə marə nɛ̂n-kusaje le ang. Ngaâ, ne kə̂ naw nusa nɛ̂n tɔyn, maji karə ne kə̂ naw sangə marə nɛ̂n-kusaje n̂-yabbɛ̂ ang tɔ, mba ne kara Lubba tɛɛ̂ kə rɔɛ̂ tə̂ mban.

⁴ Əi kə̂ aw gangə sariya dɔ nje-kula tə̂ lə marə dəw nəənn le, ə-to nân wa? Bbo nje-kula le nayn aw dda kula kə majɛ̂ bbay wase n̂-dda kə majɛ̂ ang kara, to tar lə əbbeeje njaa. A nâ dda kə majɛ̂ njaa, mba Əbbə-dəwje ee kə singa ta dda karə n̂-dda kə majɛ̂.

⁵ Marə dəw əjə to marə ndɔje utaje marɛ̂je, a marə dəw əjə to ndɔje tɔyn njaa asəje naan. Maji karə dəw kâra kâra gərə to tar kə̂ naw nəjə məɛ̂ tə̂ le to kə dɔgɔlɛ̂ njaa bba.

⁶ Dəw kə̂ əjə to ndɔje asəje naan ang, əjə baann mba wal nɛ̂n Əbbə-dəwje. Dəw kə̂ usa nɛ̂n tɔyn, usa mba wal nɛ̂n Əbbə-dəwje, mba narə wooyo Lubba mba nɛ̂n-kusa le. A dəw kə̂ usa nɛ̂n tɔyn ang, usa ang mba wal nɛ̂n Əbbə-dəwje ngaâ ne kara narə wooyo Lubba tɔ.

⁷ Dəw kâra horoje tə̂ aw isi kəm baa mba tar laa njaa ang ddəm dəw kâra aw oy mba tar laa njaa ang ddəm.

⁸ Bbo jaw jisije kəm baa a, jaw jisije kəm baa mba Əbbə-dəwje. Le joyje njaa kara, joyje mba Əbbə-dəwje. Yeenn a, le jisije kəm baa wase joyje njaa kara n-toje to ənga Əbbə-dəwje.

⁹ Mba Kristə oy ngaâ təl isi kəm baa, baann bba nâ to Əbbə dəwje kə̂ oyje ddəm Əbbə dəwje kə̂ isije kəm baa ddəm.

¹⁰ A əi, aw gangə sariya dɔ ngokɔin tə̂ mba ddi wa? Aw mbətə ngokɔin mba ddi wa? Jeje tɔyn njaa ja karje nɔn sariya tə̂ lə Lubba.

¹¹ N̂-dda Makəturu tə̂ lə Lubba nan: «Əman Əbbə-dəwje kə̂ misi kəm baa, munda yo m-pa nan: Dəwje tɔyn a kunguje məkəjə-gɔlde nangə̂ nɔnʼm tə̂ ngaâ dede tɔyn dâ kɔsuje gajim.»

¹² Yeenn a, jeje kâra kâra tɔyn ja kɔruje naji nɛ̂nje kə̂ n-ddaje, nɔn gɔl Lubba tə̂.

Maji ta dda karə ngokɔin oso mə majang tə̂ ang

¹³ Yeenn a, maji karə n-gangəje sariya dɔ naan tə̂ ang. A nɛ̂n kə̂ maji ta dda â nəənn: Maji karə ila marə nɛ̂n kə̂ nayn to jiki nɔn ngokɔin tə̂ arə n̂-tuka gɔlɛ̂ tə̂ noso ang.

¹⁴ Ddəw mə-kâra tə̂ kə̂ m-dda kə Əbbə-dəwje Jeju le m-gərə kə majɛ̂ to marə nɛ̂n kə̂ to nɛ̂n-yərəw kâra goto. A bbo dəw əjə to marə nɛ̂n to nɛ̂n-yərəw a, nɛ̂n le ddee to nɛ̂n-yərəw mba tar laa njaa.

¹⁵ Bbo ə-dda arə rɔ ngokɔin nəəle ang mba nɛ̂n kə̂ naw nusa a, yeenn tɔju to aw dda nɛ̂n ddəw ndiki tə̂ ang ngaa. Maji karə ə-dda arə ngokɔin kə̂ Kristə oy mba tar laa tuju mba nɛ̂n-kusa ang.

¹⁶ Nɛ̂n kə̂ ooje kəmse tə̂ to nɛ̂n kə̂ maji, maji karə ə-ddaje arəje kəsə dəwje tuju rise mbɛɛ̂ ang.

¹⁷ Tɔkɔrɔ tə̂, tar Bbe-kɔn lə Lubba to tar nɛ̂n-kusa ang ddəm to tar nɛ̂n-kay ang ddəm. Bbe-kɔn lə Lubba to tar nɛ̂n-dda kə̂ gatə gatə, to mə-wul-lɔm, to rɔ-nəəl kə̂ Ndil-mə-nda aw arə dəwje.

¹⁸ Dəw kə̂ dda kə Kristə kə ddəw kə̂ tokə baann a, nəəl kəm Lubba tə̂ ddəm dəwje piteje ddəm.

¹⁹ Yeenn a, maji karə n-sangəje nɛ̂n kə̂ aw ddee kə mə-wul-lɔm jarə njê-mə-kunnje kâra kâra tɔyn ddaje arə njê-marədeje sangəje ddəw mə-kunn tə̂.

²⁰ Maji karə ə-tuju kula lə Lubba mba tar nɛ̂n-kusa ang. Tɔkɔrɔ njaa, nɛ̂n-kusa tɔyn njaa maji. A ta kusa nɛ̂n kə̂ a dda karə kəsə dəwje ddaje majang to nɛ̂n kə̂ maji ang.

²¹ Nɛ̂n kə̂ maji â to kusa taal-da ang, kay koto ang, mbətə nɛ̂n tɔyn kə̂ asə dda karə ngokɔin oso mə majang tə̂.

²² Mə-kunn ləi le ə-ngəm to ləi njaa hori tə̂ kə Lubba. Maji arɛ̂, ne dəw kə̂ nunn rɔɛ̂ ta dda marə nɛ̂n a, kəjə laa unda tar dɔɛ̂ tə̂ ang.

²³ A dəw kə̂ aw əjə tar mba nɛ̂n kə̂ nusa, sariya to dɔɛ̂ tə̂ mban. Mba n̂-dda nɛ̂n le ddəw mə-kunn tə̂ laa ang. Mba nɛ̂n tɔyn kə̂ dəw dda ddəw mə-kunn tə̂ ang to majang.