Rɔmɛnje 13 - Dɔnɔn kə̂ Siki: Tar kə̂ aw arə təbbə

Maji ta koo ta njê-kɔn-bbeje

¹ Maji karə dəwje kâra kâra ooje ta njê kə̂ dundade to njê-kɔn-bbeje, mba kɔn-mbay tɔyn in rɔ Lubba tə̂. Lubba â unda njê-kɔn-bbeje lo-kiside tə̂.

² Yeenn bba bbo dəw aw dda dɔ-ngəng kə njê-kɔn-bbeje a, yeenn pa nan naw mbətə nɛ̂n kə̂ to kə dɔgɔlɛ̂ kə̂ Lubba gɔl. Sariya a to dɔ dəwje tə̂ kə̂ mbətəje ta koo ta njê-kɔn-bbeje le.

³ Bbo dəw dda maji a, nâ kayn njê-kɔn-bbeje ang ngaa, tokə n̂-dda majang bba nâ kaynde. Bbo ə-ndiki ta kayn njê-kɔn-bbeje ang a, ə-dda nɛ̂n kə̂ maji arə n̂-pitije.

⁴ Mba daw ddaje kula nɔn gɔl Lubba tə̂ ta karə isi nɛ̂n kə majɛ̂. A bbo ə-dda nɛ̂n kə̂ maji ang a, maji karə ə-bbəəl, mba Lubba arəde singa karə n̂-gangəje sariya dɔ dəwje tə̂. A daw gangəje sariya baa njaa baann ang. Daw ddaje kula nɔn gɔl Lubba tə̂ ta tɔju wungu laa dɔ dəwje tə̂ kə̂ ddaje nɛ̂n kə̂ maji ang.

⁵ Mba yeenn bba, to maji ta koo ta njê-kɔn-bbeje, mba tee nɛ̂n ta wungu tə̂ lə Lubba kə ddang ddəm karə kəjə ləje jɔkuje ang ddəm.

⁶ Mba yeenn tɔ â aw ukaje nɛ̂n lambo. Dəwje kə̂ aw ukaje lambo jide tə̂ le. Lubba â undade dɔ kula tə̂ənn le karə n̂-ddaje kə majɛ̂.

⁷ Maji karə ukaje bbangə nɛ̂n lə nje-marseje kâra kâra kə̂ to dɔseje tə̂. Ukaje lambo ji dəw tə̂ kə̂ to tar ləse ta kuka jia tə̂, ukaje dɔ nɛ̂n ji dəw kə̂ to tar ləse ta kuka dɔ nɛ̂n le jia tə̂. Ə-bbəəlje dəwje kə̂ to tar ləse ta bbəəlde, ə-walje dəwje kə̂ to tar ləse ta walde.

Tar ndiki dəwje

⁸ Arəje bbangə lə dəw to dɔse tə̂ ang. Maji karə ndiki kə̂ ta ndiki naan â to dɔse tə̂ to bbangə. Bbo dəw ndiki njê-marɛ̂je a, n̂-to dəw kə̂ dda nɛ̂n kə turu Ndu tɔyn mban.

⁹ Tɔkɔrɔ njaa, nduje kə̂ nan: «Ə-dda lo-to-majang ang, ə-tɔl dəw ang, ə-bboko ang, nɛ̂n kə̂ to ləi ang a, ə-dda bboe ang» kə kəsə nduje tɔyn le toje mə ndu tə̂ kə̂ kâra nəənn: «Maji karə ə-ndiki nje-mari tokə da-rɔi njaa.»

¹⁰ Bbo dəw ndiki nje-marɛ̂ mban a, nâ dda saa majang ang ngaa. Yeenn a, ndiki dəw to dda nɛ̂n kə turu Ndu tɔyn.

Maji ta gɔl rɔ mba təl lə Kristə

¹¹ Yeenn a, maji karə ə-ddaje tokə baann. Mba ə-gərəje kar kə̂ jee tə̂ nəənn kə majɛ̂. Bbasinɛn to kar kə̂ ta karə ə-ndolje, mba kar kə̂ Lubba a kaji nɛ̂n je le nayn ngɔsi baa nya kə je uta kar kə̂ jooje nɛ̂n məje tə̂.

¹² Ta lo-karɛ ngaa. Yeenn a, maji karə jinyaje nɛ̂n-ddaje kə̂ dəwje aw ddaje lo ndul tə̂ ta julaje nɛ̂n-ddɔje kə̂ dəwje aw ddaje nɛ̂n ddɔ dann karâ rɔje tə̂.

¹³ Maji karə pa-nja ləje to gatə gatə tokə dəwje kə̂ aw njaje dann karâ. Jusaje nɛ̂n wase jayje koto jarə uta dɔɛ̂ ang. Maji karə n-ddaje kaya ang ddəm n-ddaje nɛ̂n kə ngabula ang ddəm. Jinyaje kɔl-naan ddəm jundaje mə kə naan ang ddəm.

¹⁴ Maji karə ulaje Əbbəjeje Jeju-Kristə tokə nɛ̂n-ddɔ rɔse tə̂ ta inyaje arəje da-rɔse ndasəse arə ə-ddaje nɛ̂n kə̂ bboe ddɛɛ̂ ang.