Rɔmɛnje 12 - Dɔnɔn kə̂ Siki: Tar kə̂ aw arə təbbə

Pa-nja kə̂ siki

¹ Ngakɔnʼmje, Lubba tɔju maji laa kə̂ n̂-dda kə je. Yeenn bba, m-walse nya karə unnje da-rɔse njaa arəje Lubba tokə nɛ̂n-polo kə̂ to kəm baa, nɛ̂n kə̂ dunda dang ngaâ maji kəm Lubba tə̂. Yeenn â to gusu kə̂ tɔkɔrɔ kə̂ ta polo nɛ̂n Lubba.

² Maji karə ə-ndajije nɛ̂n-ddaje lə dəwje kə̂ duninya tə̂ nəənn ang, a inyaje ddəw arəje Lubba turu kəjə ləse. Baann bba â kasəje ta gərə nɛ̂n kə̂ Lubba ndiki, nɛ̂n kə̂ maji, nɛ̂n kə̂ nəəl kəmɛ̂ tə̂ kə nɛ̂n kə̂ maji tɔyn.

³ Lubba dda səm mə-maji nya. Mba yeenn bba, m-ndəjəse kâra kâra tɔyn karə ooje rɔse bo uta dɔɛ̂ ang. A, maji karə dəw oo rɔɛ̂ ngaji baa asə kəm mə-kunn kə̂ Lubba arə dəw kâra kâra.

⁴ Da-rɔ dəw kâra baa, a barkəm-rɔɛ̂ banya nya ngaâ kula kə̂ kâra baa â daw ddaje ang.

⁵ Jeje kara n-toje tokə baann tɔ. N-toje tokə banya nya njaa, a n-ddeeje to da-rɔ kə̂ kâra baa ddəw mə-kâra tə̂ kə̂ n-ddaje kə Kristə arə n-ddeeje kâra baa tokə barkəm-rɔ kə̂ kâra baa tɔ.

⁶ Lubba arəje gusuje dang dang ddəw mə-maji tə̂ laa kə̂ n̂-dda kə je. Dəw kə̂ Lubba arɛ̂ gusu karə ila nɛ̂n mbər tar lə Lubba a, maji karə dda kula laa le ddəw mə-kunn tə̂.

⁷ Dəw kə̂ Lubba arɛ̂ gusu karə uman dəwje a, maji karə numande. Dəw kə̂ Lubba arɛ̂ gusu karə n̂-tɔju nɛ̂n dəwje a, maji karə n̂-tɔju nɛ̂n dəwje.

⁸ Dəw kə̂ Lubba arɛ̂ gusu karə n̂-ndəjə dəwje a, maji karə n̂-ndəjə dəwje. Maji karə dəw kə̂ to nje-nɛ̂n-karə, arə nɛ̂n kə mə-kâra. Maji karə dəw kə̂ nje-tɔju ddəw dəwje, tɔju kə dɔgɔlɛ̂, dəw kə̂ aw dda maji kə dəwje, dda kə rɔ-nəəl.

⁹ Maji karə ə-ndikije dəwje kə mə-kâra. Maji karə ə-mbətəje nɛ̂n kə̂ maji ang, nɛ̂n kə̂ maji dɔrɔ â ə-ddaje.

¹⁰ Nɛ̂n kə̂ ɔju dɔ ndiki naan, maji karə ə-ndikije naan tokə ngakɔn-naan njaa. Maji karə ə-walje naan.

¹¹ Maji karə bbo kula lə Əbbə-dəwje ddase nya, bbo ə-dabbəje ang, undaje kəjə ləse kula tə̂ le kə mə-kâra.

¹² Maji karə ə-ddaje rɔ-nəəl mba nɛ̂n kə̂ aw undaje məse dɔɛ̂ tə̂. Maji karə ə-tɔje wurse mə nɛ̂n kəm-to-ndooje tə̂ kə̂ aw ingajese, ə-dujuje Lubba kə ndɔ tɔyn.

¹³ Maji karə umanje njê-mə-kunnje kə̂ nɛ̂n dude, ə-taaje njê-mbaje kə̂ awje rɔse tə̂ kə rɔ-nəəl.

¹⁴ Maji karə ə-bbarje tar kə̂ maji dɔ dəwje tə̂ kə̂ aw ulaje kəmse ndoo tə̂. Ə-bbarje tar kə̂ maji dɔ dəwje tə̂, bbo ə-ndɔɔljede ang.

¹⁵ Maji karə ə-ddaje rɔ-nəəl kə njê kə̂ aw ddaje rɔ-nəəl, ə-nɔnje kə njê kə̂ aw nɔnje.

¹⁶ Maji karə ooje ta naan. Lo kula kə̂ bo dɔrɔ â ə-sangəje ang. Ngonn kula kara ə-ddaje. Ooje rɔse to kəmse arɛ̂ nya uta nje-marse ang.

¹⁷ Nɛ̂n kə̂ maji ang kə̂ dəw dda kə se a, ə-ddaje saa tɔ ang. Ə-sangəje ddəw ta dda nɛ̂n kə̂ maji kəm dəwje tə̂ tɔyn.

¹⁸ Bbo ddəw to a, arəje mə-wul-lɔm to horose tə̂ kə dəwje tɔyn.

¹⁹ «Ngakɔnʼmje kə̂ m-ndikise nya, sese njaa ilaje barə ang, a inyaje arə wungu lə Lubba â dda kula. Mba Əbbəjeje pa Makəturu tə̂ laa nan: Əman â mâ kila barə! Əman â mâ kuka dəw kâra kâra asə kula-ddɛɛ̂.»

²⁰ N̂-pa tɔ nan: «Bbo nje-baan ləi bbo ddɛɛ̂ a, arɛ̂ nɛ̂n nusa, kunda ɔɛ̂n a, arɛ̂ maann nay. Bbo ə-dda baann a, nayn tokə lə yəl-puru â aw ungu dɔɛ̂ tə̂.»

²¹ Arəje nɛ̂n-dda kə̂ maji ang tɔɔy dɔse ang. Ə-ddaje nɛ̂n-dda kə̂ maji ə-tɔɔyje nɛ̂n dɔ nɛ̂n-dda kə̂ maji ang.