Rɔmɛnje 11 - Dɔnɔn kə̂ Siki: Tar kə̂ aw arə təbbə

Lubba mbətə dəwje kə̂ Ijarayɛl ang

¹ M-ndiki ta gərə: Lubba turu gire arə dəwje laa ngaa wa? Ndɔ kâra ang! Mba əman kə dɔm njaa m-to ngonn Ijarayɛl tɔ, m-to ngonn-ka Abaraham, dəw kə̂ mə nuju tə̂ lə Bɛnjamɛn.

² Lubba turu gire arə dəwje laa kə̂ ne njaa n̂-mbərəde ləw baa le ang. Oleje məse dɔ nɔn tə̂ kə̂ Eli nɔn rɔɛ̂ mba Ijarayɛl kə̂ n̂-dda tarɛ̂ Makəturu tə̂ lə Lubba le wa? N̂-pa nan:

³ «Əbbəmje, ngann Ijarayɛlje le tɔlje njê-kilaje mbər tar ləi, n̂-tujuje bannje, əman kə karəm â m-nayn ngaâ n̂-ndikije ta tɔləm.»

⁴ A Lubba ilɛ̂ tə̂ nan: «Dingawje doro siri kə̂ poloje Baal ang, m-ngəmde mbam.»

⁵ Dɔ ndɔje tə̂ nəənn kara to tokə baann tɔ. Kəsə dəwje nayn tɛn be kə̂ Lubba mbərəde ddəw mə-maji tə̂ laa.

⁶ Lubba mbərəde ddəw mə-maji tə̂ laa bbo n̂-mbərəde mba marə kula kə̂ n̂-ddaje ang. Bbo baann ang a, mə-maji le a to mə-maji ang ngaa.

⁷ Yeenn pa nan ddi wa? Nɛ̂n kə̂ Ngann Ijarayɛlje aw sangəje le dingaje ang. A dede kə̂ Lubba mbərəde â dingaje nɛ̂n le. Lubba dda arə mə kəseje kətərə.

⁸ Ddəw kâra baa tokə n̂-dda tarɛ̂ makəturu tə̂ nan: «Lubba dda arə kəjə ləde ndol ang, kəmde oo lo ang, mbide oo tar ang. N̂-dda kə de tokə baann ndərəng bbokənɛn.»

⁹ Dabbiti pa tɔ nan: «Maji karə nɛ̂n-kusaje kə̂ maji kə̂ daw dusaje təlje to nɛ̂n-tuka-gɔl, təlje to bandə arə dosoje tə̂, təlje to nɛ̂n kə̂ a gangə sariya kə̂ gatə gatə dɔde tə̂!

¹⁰ Maji karə dooje lo kə majɛ̂ ang, maji karə kəmde tɔ. Maji karə ndɔ tɔyn njaa arə dulaje dunnde kə nangə̂ to kula dɔrɔ.»

¹¹ M-nduju ta gərə: Koso kə̂ dosoje le dâ kinje ang nyɔm wa? Baann ang! Mbal dɔ majang kə̂ n̂-ddaje â dəwje kə̂ gəlde toje to Jiipije ang ingaje nɛ̂n kaji. Lubba dda baann karə mə dda ngann Ijarayɛlje.

¹² Mbal dɔ majang kə̂ ngann Ijarayɛlje ddaje â dəwje kə̂ toje to Jiipije ang ingaje nɛ̂n nɛ̂n kə̂ maji ngaâ koso ləde dda arə dəwje kə̂ toje to Jiipije ang ingaje nɛ̂nje kə̂ maji. Bbo Jiipije tɔyn ooje məde tə̂ kə Jeju a, nɛ̂nje kə̂ maji kə̂ a ddeeje goe tə̂ a bo nya.

Tar kaji lə dəwje kə̂ toje to Jiipije ang

¹³ Tar kə̂ mâ ta pa karəse nəənn to mba sese kə̂ ə-toje to Jiipije ang. Mba əman le njaa m-to nje-kaw-kula lə dəwje kə̂ toje to Jiipije ang. Mba yeenn bba mɔsu gaji kula ləm le nya,

¹⁴ karə bbo ddəw to a, mə dda ngakɔnʼmje Jiipije bba karə marɛ̂je turuje məde arə Lubba ajide.

¹⁵ Lubba dda arə duninya ungu naan tə̂ saa kar tə̂ kə̂ n̂-turu gire narə ngann Ijarayɛlje. Ndɔ kə̂ n̂-təl nuwade kə rɔɛ̂ tə̂ a, nɛ̂n kə̂ a ddee goe tə̂ a to tokə lə dəwje kə̂ oyje bba təl isije kəm baa.

Gusu-tar dɔ kakə olibə tə̂ kə̂ mə kɔr tə̂ kə ye kə̂ mə ndɔɔ tə̂

¹⁶ Bbo dəw unn dɔ nɛ̂n kə̂ dɔngɔr arə Lubba to nɛ̂n-polo a, kəsə nɛ̂n le tɔyn to lə Lubba. Bbo dəw unn ngira kakə arə Lubba a, barkəm kakə le tɔyn toje to lə Lubba tɔ.

¹⁷ Ngann Ijarayɛlje toje tokə kakə olibə kə̂ maji kə̂ n̂-dubbu ndɔɔ̂, kə̂ n̂-tuka marə barkəmɛ̂je. A əi, ə-to tokə barkəm olibə kə̂ muû, kə̂ dunn dɔsu turu ye tə̂ kə̂ maji le. Bbasinɛn, nɛ̂nje kə̂ maji kə̂ ngann Ijarayɛlje aw ingaje, əi aw inga tɔ, tokə barkəm kakə kə̂ dɔsu kar marɛ̂ tə̂ aw inga singa ddəw ngira kakə tə̂ le.

¹⁸ Mba yeenn bba, to tar ləi ta kunda gui pa nan əi uta barkəm kakəje le ang! Ə-ndiki ta kunda gui wa? Əi â oto ngira kakə le dɔi tə̂ ang, ngira kakə le â otoi dɔɛ̂ tə̂.

¹⁹ A du ang, marə dəw horose tə̂ a pa nan: «N̂-tuka barkəm kakəje le karə m-taa turude.»

²⁰ Dɔgɔlɛ̂ njaa. Lubba tuka barkəmde mba dooje məde tə̂ saa ang, a əi ə-nayn aw tinya kakə tə̂ le mba oo məi tə̂ kə Lubba le. Yeenn a, maji karə bbəəl â ə-bbəəl bbo unda gui ang.

²¹ Mba, Jiipije kə̂ toje to barkəm kakə kə̂ tɔkɔrɔ le, Lubba tukade, a əi, bbo aa rɔi ang a, nâ tukai kə ddang tɔ

²² Maji karə ə-gərə to Lubba to nje-dda maji ddəm nje-gangə sariya kə̂ ngəng ddəm. N̂-gangə sariya kə̂ ngəng dɔ dəwje tə̂ kə̂ mbətəje ta koo məde tə̂ ngaâ n̂-dda səi mə-maji. Bbo ə-nayn ddəw mə-maji tə̂ le ang a, nâ kɔri kə guku tɔ.

²³ A bbo Jiipije le inyaje mə-kətərə ləde ngaâ ooje məde tə̂ a, Lubba a təl kə de lo turude tə̂ tɔ, mba Lubba ee kə singa ta təl kə de lo turude tə̂.

²⁴ Sese kə̂ ə-toje to Jiipije ang le ə-toje tokə barkəm kakə olibə kə̂ muû kə̂ n̂-tuka ngaâ tinya kar ye tə̂ kə̂ n̂-dubbu mə ndɔɔ tə̂. Yeenn to nɛ̂n kə̂ asə dda ang, a Lubba dda. Yeenn a, ta təl kə Jiipije kə̂ toje to barkəm olibə kə̂ n̂-dubbu ndɔɔ̂ le turude tə̂ a to nɛ̂n kə̂ ngəng ang.

Lubba a kaji ngann Ijarayɛlje tɔyn

²⁵ Ngakɔnʼmje, m-ndiki karə ə-gərəje marə nɛ̂n dɔ nɛ̂n tə̂ kə̂ Lubba əjə ta dda ngaâ nayn lo-kiyɛ̂ tə̂ bbay nəənn nan kin karə ooje rɔse to njê-kəm-karɛje. Marə dəbbə dəwje kə̂ Ijarayɛl məde aw kətərə ndərəng karə kɔr dəwje kə̂ toje to Jiipije ang le tɔyn ingaje kaji bba.

²⁶ Baann bba ngann Ijarayɛlje tɔyn a kingaje kaji tokə Makəturu lə Lubba pa tarɛ̂ nan: «Nje-kaji-dəwje a kin Sinyɔ bba a ddee, Nâ kɔru tar majang lə dəwje kə̂ gəl Jakobbo tə̂ dɔde tə̂.»

²⁷ Yeenn to dɔnɔn kə̂ mâ kɔsu kə de, kar tə̂ kə̂ mâ kɔru tar majang ləde dɔde tə̂ le.

²⁸ Jiipije toje to njê-baanje lə Lubba, mba n̂-mbətəje Tar kə̂ Maji. Baann bba karə Lubba dda mə-maji kə see dəwje kə̂ ə-toje to Jiipije ang. A Lubba mbərə Jiipije to dəwje laa ngaâ naw ndikide ɔju dɔ kadedeje.

²⁹ Mba bbo Lubba arə nɛ̂n dəw kə mə-maji laa a, təl taa ang ddəm Lubba bbar dəw a, təl mbəte ang ddəm.

³⁰ Ləw ə-mbətəje ta koo ta Lubba, a bbasinɛn Lubba oo kəm-to-ndoo ləse mba Jiipije kə̂ mbətəje ta koo tɛɛ̂.

³¹ Ddəw kâra baa, dede kara bbasinɛn n̂-mbətəje ta koo ta Lubba, mba kəm-to-ndoo ləje kə̂ Lubba oo. Yeenn a, Lubba a kasə koo kəm-to-ndoo lə Jiipije tɔ ngaa.

³² Lubba dda arə dəwje tɔyn toje tokə dəwje kə̂ eeje kəy-kula tə̂, mba n̂-mbətəje ndu Lubba. N̂-dda baann ta tɔju dəwje tɔyn to noo kəm-to-ndoo ləde.

Lubba to nje-tɔkə-mbangə

³³ Mə-maji lə Lubba bo nya! Kəm-karɛ laa kə nɛ̂n-gərə laa bo nya! Nân bba a kasə gərə gəl sariya kə̂ naw gangə wa? Nân bba a kasə gərə ddəw kə̂ naw dda nɛ̂n nɛ̂n wa?

³⁴ Makəturu lə Lubba pa nan: «Nân bba a kasə gərə kəjə lə Əbbə-dəwje wa? Nân to nje-karɛ̂ ndəjə wa?»

³⁵ «Nân bba arə nɛ̂n Lubba dɔngɔr bba karə Lubba təl nɛ̂n arɛ̂ wa?»

³⁶ Tɔkɔrɔ, nɛ̂nje tɔyn inje rɔɛ̂ tə̂, nɛ̂nje tɔyn toje to laa ngaâ nɛ̂nje tɔyn toje ddəw tə̂ laa. Maji karə piti to laa kə ndɔ kə ndɔ Amɛnn!