Rɔmɛnje 10 - Dɔnɔn kə̂ Siki: Tar kə̂ aw arə təbbə

Əbbə-dəwje kâra baa

¹ Ngakɔnʼmje, nɛ̂n kə̂ m-ndiki nya ngaâ maw duju Lubba mbɛɛ̂, to karə ngann Ijarayɛlje ingaje kaji.

² Tɔkɔrɔ, masə kɔru naji ləm, mba bbo dda kula lə Lubba to məde tə̂ nya njaa, a n̂-ddaje kula le ddəw nɛ̂n-gərə tə̂ ang.

³ Mba n̂-gərəje ddəw kə̂ ta ddee nɛ̂n gatə gatə kəm Lubba tə̂ ang. Dede njaa n̂-gɔlje ddəw ləde mba ddee nɛ̂n gatə gatə kəmɛ̂ tə̂. Yeenn bba n̂-mbətəje ddəw kə̂ Lubba gɔl karə dəwje ddeeje nɛ̂n gatə gatə le.

⁴ Mba Kristə dda arə Ndu lə Mɔyijə ɔsu kɔyn mban. Baann bba karə dəw kə̂ unn məɛ̂ a, ddee gatə gatə kəm Lubba tə̂.

Kaji to mba dəwje tɔyn kə̂ unnje məde

⁵ Mɔyijə dda tar ddee gatə gatə kəm Lubba tə̂ le Makəturu tə̂ nan: «Dəw kə̂ dda nɛ̂n kə turu Ndu a kisi kə təbbə ɔju dɔ Ndu le.»

⁶ A ta ddee gatə gatə ddəw mə-kunn tə̂ le, n̂-pa tarɛ̂ nan: Maji karə ə-pa tar nəənn məi tə̂ ang: «Nân bba a kin kaw darâ wa?» Bbo ə-pa baann a, nayn to a ta kaw kuwa Kristə darâ ddee saa nangə̂.

⁷ Maji karə ə-pa tar nəənn ang tɔ: «Nân bba a ddisi mə tɔkə buwa tə̂ kə̂ sunrɛ̂ goto wa?» Bbo ə-pa baann a, nayn to kuwa Kristə horo dəwje tə̂ kə̂ oyje tee saa.

⁸ A tar le nan ddi wa? Tar le nan: «Tar le to mbɔri tə̂ ngɔsi baa, to tai tə̂ ngaâ to məi tə̂ tɔ.» Tar le to tar mə-kunn kə̂ jaw jila mbəre.

⁹ Bbo əi njaa ə-pa kə tai kəm dəwje tə̂ tɔyn nan Jeju to Əbbə-dəwje ngaâ ə-ndiki tə̂ məi tə̂ to noy ngaâ Lubba ndole a, â kinga kaji.

¹⁰ Mba bbo dəw unn məɛ̂ a, Lubba ooe to dəw kə̂ gatə gatə. Ngaâ bbo dəw le pa tarɛ̂ kə ddaka a, Lubba ajɛ̂.

¹¹ Makəturu lə Lubba pa nan: «Dəw kə̂ unn məɛ̂ arɛ̂ a, rɔ-kul a kɔru kəmɛ̂ ang.»

¹² Yeenn a, Jiipije kə Gɛrɛkəje toje to dəwje kə̂ kâra baa. Əbbədede kâra baa, naw narə nɛ̂nje kə̂ maji dəwje tɔyn kə̂ aw bbarɛ̂je.

¹³ Mba yeenn bba Makəturu lə Lubba pa nan: «Dəw kə̂ bbar Əbbə-dəwje a, a kinga kaji.»

¹⁴ Bbo dəwje ooje məde tə̂ kə Əbbə-dəwje ang a, dâ bbarɛ̂je tokə baânn wa? Bbo dəw ila mbər tar laa arə dooje ang a, dâ kunnje məde tokə baânn wa? Ngaâ bbo nje-pa tar laa karəde goto a, dâ kooje tar laa tokə baânn wa?

¹⁵ Bbo dula dəw karə ila mbər tar laa ang a, dəw le a pa tar laa tokə baânn wa? Ddəw kâra baa tokə Makəturu lə Lubba pa tɔ nan: To nɛ̂n kə̂ kura nya ta koo dəwje kə̂ ddeeje kə Tar kə̂ Maji.

¹⁶ A dəwje tɔyn â taaje Tar kə̂ Maji le ang. Ddəw kâra baa tokə Ejayi pa nan: «Əbbəmje, nân bba ndiki tə̂ kə tar kə̂ jila mbəre le wa?»

¹⁷ Yeenn a, mə-kunn ddee ddəw tar tə̂ kə̂ dəw aw oo, tar le to tar lə Kristə.

¹⁸ Yeenn a, m-duju ta koo: Jiipije le ooje tar kə̂ dila mbəre le ang wa? Dooje tar le njaa. Makəturu lə Lubba pa nan: «Dəwje ooje ndu njê-kilaje mbər le dɔ nangə tə̂ tɔyn, dəwje kə̂ eeje kɔyn nangə tə̂ kara ooje tar le tɔ.»

¹⁹ M-duju ta koo bbay: Ngann Ijarayɛlje gərəje kandə tar le ang wa? Mɔyijə pa kete nan: «Mâ dda karə mə ddase dɔ dəwje tə̂ kə̂ toje to gəl-dəwje kə̂ tɔkɔrɔ ang. Mâ dda karə wungu ɔnse dɔ gəl-dəwje tə̂ kə̂ gərəje nɛ̂n ang.»

²⁰ Ejayi kara pa tar lə Lubba le kə bbəəl ang. N̂-pa nan: «Dəwje kə̂ sangəmje ang â ingamje. Dəwje kə̂ dujumje nɛ̂n ang ddəm â m-tɔju rɔm marəde.»

²¹ A Lubba pa tar dɔ ngann Ijarayɛlje tə̂ nan: «Kə ndɔ tɔyn njaa m-sangə ddəw pin ta kungu naan tə̂ kə dəwje nəənn, a dooje tam ang, n̂-toje to njê-dɔ-kətərəje.»