Rɔmɛnje 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl kə̂ m-to bbərə-kula lə Jeju-Kristə, Lubba bbarəm undam dang to nje-kaw-kula karə mila mbər Tar kə̂ Maji laa marə dəwje.

² Lubba unn ndue ləw baa, ddəw tə̂ lə njê-kilaje mbər tar laa makəturu tə̂ laa ta karə Tar kə̂ Maji nəənn dəwje.

³ Tar kə̂ Maji le to tar lə Ngonnɛ̂. Ddəw kuju tə̂, n̂-to ngonn-ka tɔkə mbay Dabbiti.

⁴ A ddəw tə̂ lə Ndil-mə-nda, Lubba undɛ̂ to Ngonnɛ̂ kə̂ narɛ̂ singa-mɔngu ddəw ndol tə̂ kə̂ noy a, n̂-ndole. N̂-to Əbbəjeje Jeju-Kristə.

⁵ Ddəw tə̂ lə Jeju le, Lubba dda səm mə-maji karə m-ddee to nje-kaw-kula, ta dda karə kəsə gəl-dəwje tɔyn ooje məde tə̂ saa ngaâ ta dooje tɛɛ̂ mba ri Kristə.

⁶ Sese kara eeje horo dəwje tə̂ənn tɔ. Sese kə̂ Lubba bbarse arə ə-ddeeje to dəwje lə Jeju-Kristə le.

⁷ M-dda makəturu nəənn marə sese kə̂ eeje Rɔm, sese tɔyn kə̂ Lubba ndikise ngaâ bbarse arə ə-ddeeje to dəwje laa. Maji karə Bɔjeje Lubba kə Əbbə-dəwje Jeju-Kristə, n̂-ddaje kə se mə-maji ngaâ darəje məse wul lɔm.

Pɔl ndiki ta kaw koo njê-mə-kunnje kə̂ Rɔm

⁸ Dɔngɔr nɛ̂n, marə wooyo Lubba ləm ddəw tə̂ lə Jeju-Kristə mbase tɔyn, mba dəwje kə̂ dɔ nangə tə̂ tɔyn aw paje tar mə-kunn ləse.

⁹ Lubba gərə to tar kə̂ tɔkɔrɔ njaa maw pa nəənn. Ne Lubba kə̂ maw pole kə kəjə ləm tɔyn ddəw mbər Tar tə̂ kə̂ Maji kə̂ dɔ Ngonnɛ̂ tə̂ kə̂ maw mila. N̂-gərə to kar tɔyn kə̂ maw duje, maw mila rise məɛ tə̂.

¹⁰ Maw duju karə ndərəng a, ddəw mə-ndiki tə̂ laa, nɔru ddəw narə maw rɔse tə̂ ngaa.

¹¹ Mba maal koose ddam nya, ta kaw karə ingaje marə gusuje kə̂ Ndil-mə-nda aw arə bba karə ingaje singa.

¹² Uta tɔyn, m-ndiki ta tee horose tə̂ mba karə mə-kunn ləse ddəm ləm ddəm arəjeje singa kə yo kə nəənn.

¹³ Ngakɔnʼmje, m-ndiki ta karə ə-gərəje to m-gɔl məm tə̂ gɔl banya nya ta kaw rɔse tə̂. A minga ddəw ang ndərəng bbokənɛn. M-ndiki karə kula ləm dda arə ə-sangəje nya bbe ləse, tokə kula ləm kə̂ dda arə kəsə gəl-dəwje sangəje le.

¹⁴ To tar ləm ta kaw rɔ dəwje tə̂ tɔyn, Gɛrɛkəje kə njê kə̂ kəmde ɔru ang, njê kə̂ gərəje nɛ̂n kə njê kə̂ gərəje nɛ̂n ang.

¹⁵ Mba yeenn bba, mee kə bbo ta kila mbər Tar kə̂ Maji nəənn karəse, sese kə̂ eeje Rɔm tɔ.

Tar kə̂ Maji kə singa-mɔngu

¹⁶ Rɔ-kul kila mbər Tar kə̂ Maji le ddam ang. Mba to singa-mɔngu lə Lubba kə̂ aw aji nɛ̂n dəwje tɔyn kə̂ ooje məde tə̂, Jiipije dɔngɔr, goe tə̂ a, Gɛrɛkəje.

¹⁷ Tar kə̂ Maji le tɔju ddəw kə̂ Lubba aw dda arə dəwje aw ddeeje nɛ̂n gatə gatə kəmɛ̂ tə̂ kə ddaka: Ddəw mə-kunn tə̂ kâra baa, kunn-kutu nɛ̂n tə̂ ndərəng kɔnyɛ̂ tə̂. Ddəw kâra baa tokə makəturu lə Lubba pa nan: «Dəw kə̂ ddee gatə gatə ddəw mə-kunn tə̂ a kisi kə təbbə.»

Dəwje tɔyn ddaje majang

¹⁸ Wungu ɔn Lubba darâ nu dɔ dəwje tə̂ mba majangje ləde tɔyn kə nɛ̂n-ddaje ləde kə̂ gatə gatə ang kə̂ ore dɔ tar kə̂ tɔkɔrɔ kə nangə̂.

¹⁹ N̂-gərəje nɛ̂nje tɔyn kə̂ dəw asə gərə dɔ Lubba tə̂, mba Lubba njaa tɔjude kə majɛ̂.

²⁰ Marə nɛ̂nje lə Lubba kə̂ dəw oo ang toje. Nɛ̂nje tokə singa-mɔngu laa kə̂ to kə ndɔ kə ndɔ kə kisi laa kə̂ nisi to Lubba le dəwje aw ooje ləw baa, kunn-kute tə̂ kə̂ Lubba dda duninya. Nɛ̂njeenn, dəwje aw ooje ddəw nɛ̂nje tə̂ kə̂ n̂-dda ngaâ n̂-gərəje kə majɛ̂. Mba yeenn bba, Lubba a kɔru tar dɔ dəwje tə̂ ang.

²¹ Mba n̂-gərəje Lubba kə majɛ̂ njaa. A n̂-walɛ̂je ang ngaâ darɛ̂je wooyo to Lubba ang. Kəjə ləde təl to kə dɔgɔlɛ̂ ang, n̂-gərəje nɛ̂n ang ngaâ n̂-naynje lo ndul tə̂.

²² Dooje rɔde to njê-kəm-karɛje, a kə̂ tɔkɔrɔ, n̂-toje to njê-wooyje.

²³ Dinyaje ta polo Lubba kə̂ asə piti kə ndɔ kə ndɔ, a kɔrje kə̂ n̂-dda darə unn da-rɔ dəwje kə̂ a toje kə ndɔ kə ndɔ ang kə əəlje kə daje kə̂ gɔlde sɔ kə nɛ̂nje kə̂ aw akəje â n̂-polojede.

²⁴ Mba yeenn bba, Lubba tusude inyade arə daw ddaje kula yərəw kə̂ məde ndiki. Yeenn bba, dede njaa n̂-ddaje kula yərəw kə da-rɔde njaa horo naan tə̂ arə to nɛ̂n-rɔ-kul.

²⁵ Dunnje nɛ̂n kə̂ tɔkɔrɔ ang dilaje turu nɛ̂n kə̂ tɔkɔrɔ tə̂ lə Lubba. N̂-poloje nɛ̂n kə̂ Lubba dda kə jia ngaâ n̂-ddaje kula darə nɛ̂njeenn le. A dinyaje ta polo Lubba kə̂ asə karə dəwje ɔsuje gajɛ̂ kə bbal kə bbal. Amɛnn!

²⁶ Mba yeenn bba, Lubba tusude inyade arə n̂-ddaje nɛ̂nje kə̂ bboe uta dɔde kə̂ aw arəde rɔ-kul. Dɛnɛ̂nje ləde inyaje dingawje, a dɛnɛ̂n marədeje â aw ddaje lo-to-majang kə de. Yeenn to nɛ̂nje kə̂ dəw asə ta dda ang.

²⁷ Dingawje kara aw ddaje tokə baann tɔ. Dinyaje dɛnɛ̂nje, a dingaw marədeje â daw ddaje bbo nya ta dda lo-to-majang kə de. Dede njaa daw ddaje nɛ̂n rɔ-kul kə naan. Yeenn a, dede njaa, kuka nɛ̂n-dda kə̂ maji ang ləde le â dingaje.

²⁸ Mba n̂-mbətəje ta gərə Lubba le ngaâ n̂-tusude ninyade narə n̂-naynje kə kəjəje ləde kə̂ maji ang karə ta n̂-ddaje nɛ̂n kə̂ dəw asə dda ang.

²⁹ Nɛ̂nje kə̂ gatə gatə ang, majang, mə-majang kə kəm-nda uta dɔde. Mə uta dɔde, n̂-toje to njê-tɔlje dəwje, n̂-toje to dəwje kə̂ ndikije kɔl. N̂-toje to njê-kərəje njê-marədeje, daw ddaje nɛ̂n to ngar, daw paje tar kə̂ ddəkərə dɔ njê-marədeje tə̂.

³⁰ Daw nanɛnje kə njê-marədeje. N̂-toje to njê-baanje lə Lubba. Daw dilaje ta-bbar dɔ njê-marədeje tə̂, dooje rɔde bo, n̂-toje to njê-boroje. Gusu dda majang uta dɔde. Dooje ta njê-kujudeje ang.

³¹ N̂-toje to njê-dɔ-gotoje, nɛ̂n kə̂ dunnje ndude ta dda, a n̂-ddaje ang. Nɛ̂n kâra njaa osode tə̂ ang, dooje kəm-to-ndoo lə dəw ang.

³² N̂-gərəje sariya-yo kə̂ Lubba aw gangə dɔ dəwje tə̂ kə̂ baann kə majɛ̂, a daw ddaje nɛ̂njeenn le ddəm n̂-ndikije tə̂ kə dəwje kə̂ aw ddaje nɛ̂njeenn le ddəm.