Pilipinyɛje 4 - Dɔnɔn kə̂ Siki: Tar kə̂ aw arə təbbə

Pɔl arə ndəjəje

¹ Yeenn a, ngakɔnʼmje kə̂ m-dikise nya, sese kə̂ m-ndiki nya ta təl koose bbay, sese kə̂ ə-ddaje arə misi kə rɔ-nəəl, sese â minga nɛ̂n piti. Ngakɔnʼmje kə̂ m-dikise nya, maji karə ə-naynje ddəw mə-kâra tə̂ kə̂ ə-ddaje kə Əbbə-dəwje le arəje ngəng.

² Əi Ebodi kə Sɛntis, m-dujuse nya karə ooje ta naan ddəw mə-kâra tə̂ kə̂ aw ddaje kə Əbbə-dəwje.

³ A əi, kə̂ ə-to nje-buwa-kula marəm kə̂ tɔkɔrɔ, m-duji karə uman dɛnɛ̂nje nəənn le. Mba dumanʼmje darə n-dda ddɔ n-tɔju nɛ̂n Tar kə̂ Maji jarə dəwje, dede kə Kleman kə marə njê-kula marəmje kə ride to makəturu təbbə tə̂.

⁴ Maji karə ə-ddaje rɔ-nəəl kə ndɔ tɔyn, mba ə-toje to dəwje lə Əbbə-dəwje. M-təl m-pa bbay, ə-ddaje rɔ-nəəl.

⁵ Maji karə dəwje tɔyn gərəje mə-maji ləse. Əbbə-dəwje a təl ngɔsi baa.

⁶ Maji karə əjəje tar mba marə nɛ̂n kâra ang. A mə nɛ̂nje tə̂ tɔyn, ə-dujuje Lubba nɛ̂n kə̂ ə-ndikije. A duju tə̂ kə̂ aw dujeje le arɛ̂je wooyo tɔ.

⁷ Baann a, mə-wul-lɔm lə Lubba kə̂ uta nɛ̂n-gərə lə dəwje tɔyn a ngəm məse ddəm kəjə ləse ddəm mba ə-ddaje mə-kâra kə Jeju-Kristə.

⁸ Ngakɔnʼmje, tar kə̂ mâ kutu nɛ̂n dɔɛ̂ â nəənn: undaje kəjə ləse kə dɔ nɛ̂nje tə̂ kə̂ tɔkɔrɔ, nɛ̂n kə̂ asə karə dəwje ooje to nɛ̂n kə̂ ngəng kəmde tə̂, nɛ̂n kə̂ gatə gatə, nɛ̂n kə̂ to nɛ̂n-yərəw ang, nɛ̂n kə̂ asə karə dəw ndiki, nɛ̂n kə̂ maji kə̂ dəwje asəje ta piti, nɛ̂n tɔyn kə̂ maji, nɛ̂n kə̂ asə ta kɔsu gajɛ̂.

⁹ Nɛ̂n kə̂ m-ndose, nɛ̂n kə̂ ingaje wase nɛ̂n kə̂ m-dda kə̂ ooje tarɛ̂ kə mbise ddəm kəmse ddəm le, maji karə ə-ddaje. Lubba kə̂ Nje-mə-wul-lɔm a nayn kə se.

Pɔl arə wooyo njê-mə-kunnje kə̂ Pilipi

¹⁰ Rɔm nəələm nya ddəw tə̂ lə Əbbə-dəwje, mba məse to dɔm tə̂ bbay. Məse le to dɔm tə̂ njaa, a ddəw kə̂ ta tɔjum nɛ̂n məse le â ingaje ang bbay.

¹¹ Maw pa tar baann mba nɛ̂n â dum wa? Baann ang. M-gərə ta kunda məm kə dɔ nɛ̂n tə̂ kə̂ to jim tə̂ njaa.

¹² M-gərə ta kisi dann ndoo tə̂ ddəm dann nɛ̂n-kinga tə̂ ddəm. Kə kar tɔyn, mə nɛ̂nje tə̂ tɔyn, bbo musa nɛ̂n məm ndann wase bbo ddam, minga nɛ̂n uta dɔm wase nɛ̂n dum njaa kara osom tə̂ ang.

¹³ Masə ta dda nɛ̂n tɔyn ddəw tə̂ lə Kristə kə̂ aw arəm singa.

¹⁴ A ə-ddaje nɛ̂n maji, mba otoje səm dəbbə nɛ̂n kəm-to-ndoo kə̂ ingam.

¹⁵ Pilipinyɛje, sese njaa kara ə-gərəje kə majɛ̂. Kar tə̂ kə̂ mɔtu Maseduwann kunn-kutu kila mbər Tar kə̂ Maji tə̂, Egilisi ləse kâra baa njaa aw arəm nɛ̂n, mba kumanʼm nɛ̂n kula tə̂ kə̂ maw dda.

¹⁶ Mba kar kə̂ m-nayn Tesalonikə bbay a, ulaje kə nɛ̂n arəje umanʼm gɔl banya nya.

¹⁷ Maw sangə ddəw ta kinga nɛ̂n jise tə̂ ang. Nɛ̂n kə̂ maw sangə to karə Lubba ila nɛ̂n dɔ marə tə̂ arəse.

¹⁸ Minga nɛ̂n tɔyn jim tə̂ asə loe mban. M-təl minga uta dɔɛ̂ bbay. Nɛ̂n kə̂ arəje Epaporoditə ddee nɛ̂n arəm le minga kə majɛ̂. Nɛ̂n dum ang ngaa. Nɛ̂n kə̂ arəmje le to tokə yambo kə̂ ətə maji nya wase nɛ̂n-polo kə̂ maji kəm Lubba tə̂ ddəm nəəle ddəm.

¹⁹ Lubba le a karəse nɛ̂nje tɔyn kə̂ ə-ndikije ddəw tə̂ lə Jeju-Kristə, mba nɛ̂n-kinga laa to baa kə nangə̂.

²⁰ Maji karə n-pitije Lubba kə̂ to Bɔjeje nyɔm kə ləw. Amɛnn.

Dɔbɔyn lapiya lə Pɔl

²¹ Maji karə ə-ddaje lapiya njê-mə-kunnje kâra kâra tɔyn kə ri Jeju-Kristə. Ngakɔnjeje kə̂ eeje səm nəənn ddase lapiya.

²² Njê-mə-kunnje tɔyn ddase lapiya, uta tɔyn dede kə̂ daw ddaje kula mə kəy tə̂ lə tɔkə mbay kə̂ Rɔm n̂-ddase lapiya.

²³ Maji karə mə-maji lə Əbbə-dəwje Jeju-Kristə nayn kə se tɔyn!