Pilipinyɛje 3 - Dɔnɔn kə̂ Siki: Tar kə̂ aw arə təbbə

Pɔl inya rɔɛ̂ mə ji Lubba tə̂

¹ Bbasinɛn ngakɔnʼmje, maji karə ə-ddaje rɔ-nəəl, mba ə-ddaje mə-kâra kə Əbbə-dəwje. Ta karə muja tar kə̂ m-pa kete mban le makəturu tə̂ marəse bbay jɔkəm ang, mba a dda karə nɛ̂n yəkəse ang.

² Maji karə aaje rɔse rɔ dəwje tə̂ kə aw ddaje majang. Aaje rɔse rɔ dəwje tə̂ kə̂ toje tokə lə bisije baann. Dujaje ganja kə̂ tɔkɔrɔ ang.

³ Jeje â juja ganja kə̂ tɔkɔrɔ, mba jaw poloje Lubba ddəw Ndil tə̂ laa, jaw junda guje ddəw tə̂ lə Jeju-Kristə ngaâ junda məje kə dɔ rɔje tə̂ njaa ang.

⁴ A əman njaa kara mee kə ddəw ta kunda məm kə dɔ rɔm tə̂ njaa tɔ. A bbo marə dəw əjə to naw nunda məɛ̂ kə dɔ rɔɛ̂ tə̂ njaa a, mâ kasə dda yeenn kutɛ̂.

⁵ Dujum ngaâ m-dda ndɔ jijoo a, dujam ganja. M-to dəw kə̂ Ijarayɛl, dəw kə̂ gəl Bɛnjamɛn tə̂. M-to Ebərə, njê-kujumje to Ebərəje. Maw ngəm ndu lə Mɔyijə tokə Parijinyɛ njaa.

⁶ Bbo dda kula lə Lubba to məm tə̂ nya arə m-dda singa kə Egilisi nya. Tar to dɔm tə̂ ang, mba maw dda nɛ̂nje kə̂ gatə gatə ddəw ndu tə̂.

⁷ Məjə to nɛ̂njeenn toje to nɛ̂n-kingaje kə̂ bo nya. A bbasinɛn nɛ̂njeenn moo to nɛ̂n kə̂ baa kəmʼm tə̂ ɔju dɔ Kristə.

⁸ Tɔkɔrɔ, moo nɛ̂njeenn le tɔyn to nɛ̂n kə̂ baa. Tɔkə nɛ̂n-kinga â to ta gərə Əbbəmje Jeju-Kristə. Minya nɛ̂nje tɔyn ɔju dɔ Kristə ngaâ moo nɛ̂n tɔyn tokə lə yərəw mba kinga Kristə le

⁹ ngaâ m-dda mə-kâra saa. M-ddee gatə gatə mba məm kə̂ munn marə Kristə bbo mba ngəm kə̂ m-ngəm ndu lə Mɔyijə le ang. Lubba â to nje-karə ddəw dəw karə ddee to dəw kə̂ gatə gatə, tokə dəw le unn məɛ̂ arɛ̂.

¹⁰ Nɛ̂n kə̂ m-ndiki kâra baa njaa to gərə Kristə kə gərə singa-mɔngu kə̂ noy, a ndole, ta koo ndoo saa ngaâ ta ddee tokə laa ddəw yo tə̂ kə̂ noy.

¹¹ Yeenn bba munda məm to əman njaa kara moy a, mâ ndol tɔ.

Pɔl ayn ngɔru ta tee kɔnyɛ̂ tə̂

¹² Məjə to minga nɛ̂n kə̂ m-ndiki le mban ang wase məjə to m-ddee maji tɔyn mban ang. A maw mayn ngɔru bbay, maw nar rɔm ta kuwa nɛ̂n le kə jim, mba əman njaa kara Jeju-Kristə uwam mban.

¹³ Ngakɔnʼmje, m-gərə to əman njaa kara m-nayn muwa nɛ̂n le kə jim ang bbay. A nɛ̂n kə̂ uwa wurum a nəənn: mɔru məm dɔ nɛ̂n tə̂ kə̂ nday mban, a munda kəmʼm kə nɛ̂n tə̂ kə̂ to nɔnʼm tə̂.

¹⁴ Yeenn bba, maw mayn ngɔru ta tee kɔnyɛ̂ tə̂, mba kinga kuka kə̂ Lubba bbarje karə jinga darâ ddəw tə̂ lə Jeju-Kristə.

¹⁵ Jeje kə̂ n-tɔkəje ddəw Ndil tə̂ lə Lubba mban, maji karə kəjə ləse to tokə baann. A bbo kəjə ləm to dang dɔ marə nɛ̂n tə̂ a, Lubba a kilaje ddəw-boô.

¹⁶ Mə nɛ̂n tə̂ tɔyn, ddəw kə̂ junnje ndərəng bbokənɛn nəənn le, maji karə yeenn njaa jawje nɛ̂n nyɔm.

¹⁷ Ngakɔnʼmje, maji karə sese tɔyn njaa ə-ndajije kula ddam. Jeje n-toje to nɛ̂n-kɔju-marɛ̂. Yeenn a, arəje kəmse to kə dɔ dəwje tə̂ kə̂ pa-nja ləde to tokə pa-nja ləm kə̂ n-nja nɛ̂n.

¹⁸ M-pa marəse gɔl banya nya mban. A, m-təl ta pa karəse bbokənɛn kə maann-nɔn kəmʼm tə̂: dəwje nya aw njaje tokə dəwje kə̂ mbətəje tar koy lə Kristə kə̂ oy dɔ kakə-dəsə tə̂.

¹⁹ Dunnje ddəw yo, mba məde â to lubba ləde. Daw dɔsuje rɔde mba nɛ̂n-rɔ-kul ləde. Kəjə ləde to kə dɔ nɛ̂nje tə̂ kə̂ nangə̂ dɔrɔ.

²⁰ A jeje, bbe ləje to darâ. Jeje jaw ngəbbə Əbbə-dəwje Jeju-Kristə kə̂ to Nje-kajije kə̂ a kin darâ ddee.

²¹ Ne â nâ turu da-rɔje kə̂ to ndoo karə unn da-rɔɛ̂ kə̂ to nɛ̂n-piti. Nâ dda baann ddəw singa-mɔngu tə̂ kə̂ nee nɛ̂n mba kɔn nɛ̂n dɔ nɛ̂nje tɔyn.