Pilipinyɛje 2 - Dɔnɔn kə̂ Siki: Tar kə̂ aw arə təbbə

Kristə dda rɔɛ̂ tɛn baa

¹ Mə-kâra kə̂ ə-ddaje kə Kristə le dda arə ingaje singa, ndiki kə̂ n̂-ndikise le dda arə rɔse ndɔɔ, ə-ddaje mə-kâra kə Ndil-mə-nda, ə-ndikije naan ddəm ə-ddaje mə-maji kə̂ naan ddəm.

² Yeenn a, maji karə ə-ddaje arə minga rɔ-nəəl nya ddəw koo-ta-naan tə̂ ləse. Arəje ndiki ləse to kâra baa, məse to kâra baa ngaâ kəjə ləse to kâra baa.

³ Ə-ddaje nɛ̂n to nɛ̂n-dda kuta nɛ̂n naan ang ddəm to nɛ̂n-kɔsu rɔ ang ddəm. A maji karə ooje rɔse ngaji ta ooje njê-marəseje to dəwje kə̂ utajese.

⁴ Maji karə dəw kâra kâra sangə nɛ̂n mba kisi maji laa njaa ang. A n̂-sangə nɛ̂n mba kisi maji lə njê-marɛ̂je tɔ.

⁵ Maji karə pa-nja ləse horo naan tə̂ to ddəw kâra baa kə pa-nja lə Jeju-Kristə:

⁶ N̂-to to Lubba njaa, a n̂-nar ddəw ta nayn kisi to Lubba le dɔrɔ ang.

⁷ Ninya nɛ̂nje tɔyn ər kâra tə̂ kə mə-ndiki laa njaa, n̂-dda rɔɛ̂ to nje-kula, n̂-ddee to dəw horo dəwje tə̂, ngaâ dəwje ooeje a, n̂-to tokə lə dəw.

⁸ N̂-dda rɔɛ̂ ngaji baa. Noo ndu Lubba ndərəng, noy nɛ̂n yo kə̂ dɔ kakə-dəsə tə̂.

⁹ Mba yeenn a, Lubba unnɛ̂ undɛ̂ lo tə̂ kə̂ bo ngaâ unda ri kə̂ uta rije tɔyn dɔɛ̂ tə̂.

¹⁰ Baann bba dəwje kə̂ isije mə dara tə̂ wase dede kə̂ disije dɔ nangə tə̂ kə kɔ nangə tə̂ dâ kɔsuje məkəjə-gɔlde nangə̂ nɔn Jeju tə̂ le ta kɔsu nɛ̂n gaji ria,

¹¹ ngaâ karə dəwje tɔyn paje kə tade nan Jeju-Kristə to Əbbə-dəwje mba kɔsu nɛ̂n gaji Lubba kə̂ Bɔ.

Maji karə ə-ndokoje to puru-ngeel dɔ nangə tə̂

¹² Yeenn a, ngakɔnʼmje kə̂ m-dikise nya, ooje ta Lubba kə majɛ̂ njaa, kar tə̂ kə̂ mee nɛ̂n horose tə̂. A maji karə ooje tɛɛ̂ uta nya bbay, kar tə̂ kə̂ bbasinɛn nəənn kə̂ m-goto horose tə̂ le. Maji karə ə-ddaje kula kaji kə̂ ingaje le kə bbəəl ddəm rɔ-kisa ddəm.

¹³ Mba Lubba njaa a kila bbo kula məse tə̂ ddəm nâ karəse singa dda kula le ddəm ddəw kâra baa kə nɛ̂n kə̂ n̂-gɔl ta dda kə mə-ndiki laa.

¹⁴ Nɛ̂n tɔyn njaa kə̂ aw ddaje a, maji karə ə-ddaje ddəw kəm-rɔ tə̂ ang ddəm ddəw mayn-tar tə̂ ang ddəm.

¹⁵ Yeenn bba â toje to dəwje kə̂ tar a to dɔde tə̂ ang, dəwje kə̂ nɛ̂n-yərəw ɔrude ang. A toje to ngannje lə Lubba kə̂ majang ɔrude ang, horo dəwje tə̂ kə̂ bbasinɛn nəənn kə̂ toje gatə gatə ang ddəm majije ang ddəm. Maji karə ə-ndokoje horode tə̂ tokə lə puru-ngeel dɔ nangə tə̂,

¹⁶ sese kə̂ aw paje tar kə̂ aw arə təbbə arəjede le. Yeenn bba ndɔ kə̂ Kristə təl a, mâ kunda gum mbase. Nɛ̂ɛnn le a tɔju to m-dda kula m-tuju nɛ̂n singam baa ang ddəm moo nɛ̂n ndoo baa ang ddəm.

¹⁷ Le mə-kunn ləse aw dda arə aw ddaje kula arəje Lubba to nɛ̂n-polo njaa kara, əman, bbo n̂-tɔləm a, rɔm a nəələm, mba məsəm a to nɛ̂n-polo dɔ marɛ̂ tə̂ ləse ngaâ mâ dda rɔ-nəəl kə se.

¹⁸ Maji karə sese kara rɔse nəəlse ta isije kə rɔ-nəəl səm tɔ.

Tar lə Epaporoditə de kə Timɔte

¹⁹ Munda məm to Əbbə-dəwje Jeju a karəm ddəw karə mula Timɔte rɔse tə̂ mə ndɔje tə̂ nəənn, karə n̂-pa tar ləse narə moo bba mâ kinga singa.

²⁰ Ne kə karɛ̂ baa njaa naw nəjə dɔse tə̂. Marə dəw dang kə̂ kəjə laa to tokə ləm goto.

²¹ Kəsə dəwje tɔyn aw əjəje kə dɔ nɛ̂nje tə̂ ləde njaa bbo dəjəje dɔ nɛ̂nje tə̂ lə Jeju-Kristə ang.

²² A ne Timɔte le ə-gərəje pa-nja laa kə majɛ̂. Nunn rɔɛ̂ nila kula tɔju Tar kə̂ Maji tə̂ səm tokə lə ngonn kə̂ aw uman bɔɛ̂je.

²³ Ne â munda məm ta bbo moo gəl tar ləm le kə majɛ̂ a, mâ kulɛ̂ karəse kə ngɔru.

²⁴ M-gərə to ddəw tə̂ lə Əbbəjeje, əman njaa kara, mbɔr ang a, mâ tee horose tə̂ tɔ.

²⁵ A moo maji tɔ ta təl kula Epaporoditə rɔse tə̂. Ne kə̂ n̂-to ngokɔnʼm ddəm nje-kula marəm ddəm nje-ddɔ marəm mba Lubba ddəm. Ne â n̂-to nje-kaw-kula kə̂ ulɛ̂je arəmje kar tə̂ kə̂ m-ndiki karə marə dəw ddee umanʼm le.

²⁶ N̂-dda bbo nya ta təl kaw koose tɔyn ddəm n̂-jɔku rɔɛ̂ nya mba tar rɔ-to laa kə̂ ooje le ddəm.

²⁷ Tɔkɔrɔ njaa, rɔɛ̂ toe ngɔsi kə yo, a Lubba oo kəm-to-ndoo laa. Noo kəm-to-ndoo laa kə karɛ̂ baa ang, noo kəm-to-ndoo ləm tɔ, yeenn bba karə nɛ̂n kəm-to-ndoo təl ddee dɔ marɛ̂ tə̂ bbay ang.

²⁸ Yeenn a, mulɛ̂ kə ngɔru marəse karə ta ooeje a, isije kə rɔ-nəəl ngaâ karə əman kara wurum oso nangə̂ bbəəl.

²⁹ Maji karə ə-tɛɛ̂je kə rɔse tə̂ kə rɔ-nəəl ddəw mə-kâra tə̂ kə n-dda kə Əbbə-dəwje. Maji karə ə-walje dəwje kə̂ toje tokə laa nəənn,

³⁰ mba nayn tɛn baa a noy mba kula lə Kristə. Nila rɔɛ̂ kɔrɔ̂ mba kumanʼm kula tə̂ kə̂ sese njaa ingaje ddəw ta kumanʼm tə̂ ang.