Pilipinyɛje 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl kə Timɔte kə̂ n-to bbərə-kulaje lə Jeju-Kristə n-dda makəturu nəənn jula nɛ̂n jarə dəwje tɔyn kə̂ isije Pilipi kə̂ toje to njê-mə-ndaje ddəw tə̂ lə Jeju-Kristə. Jula nɛ̂n jarə njê-kɔnje dɔ Egilisi kə diyakərəje tɔ.

² Maji karə Bɔjeje Lubba kə Əbbə-dəwje Jeju-Kristə n̂-ddaje kə se mə-maji ngaâ darə məse wul lɔm.

Tar wooyo lə Pɔl

³ Kar tɔyn njaa bbo maw məjə tar ləse a, maw marə wooyo Lubba ləm.

⁴ Kar tɔyn njaa bbo maw duju Lubba mba tar ləse tɔyn a, maw duje kə rɔ-nəəl nya,

⁵ mba kuman kə̂ aw umanʼmje ddəw kila mbər Tar tə̂ kə̂ Maji arəje aw kə kete kete, kunn-kute tə̂ nu ndərəng bbokənɛn.

⁶ Nɛ̂n kə̂ m-gərə â tokə be: Lubba kə̂ unn kutu kula kə̂ maji tɔyn nəənn ddəw tə̂ ləse a kaw nɛ̂n ndərəng karə tunga ndɔ tə̂ kə̂ Jeju-Kristə a təl.

⁷ To kə dɔgɔlɛ̂ karə kəjə ləm to dɔse tə̂ tokə baann njaa, mba m-ndikise. Əsese tɔyn njaa umanʼmje ddəw mə-maji tə̂ kə̂ Lubba dda səm kar tə̂ kə̂ mee nɛ̂n kəy-kula tə̂ bbasinɛn nəənn ddəm kar tə̂ kə̂ maw mɔru nɛ̂n naji Tar tə̂ kə̂ Maji marə ngəng le ddəm.

⁸ Tɔkɔrɔ Lubba kara gərə ndiki kə̂ m-dikise nya tokə Jeju-Kristə ndikise nya le tɔ.

⁹ Maw duju Lubba karə n̂-dda narə ndiki ləse aw kə kete kete, narə ə-gərəje nɛ̂n kə̂ gatə gatə ngaâ karə narə kəmse ɔru.

¹⁰ Yeenn bba â gərəje nɛ̂n kə̂ maji. Yeenn tɔ bba â toje kə majɛ̂ ddəm tar a to dɔse tə̂ ang ddəm ndɔ tə̂ kə̂ Kristə a təl.

¹¹ Jeju-Kristə a dda karə kulaje kə̂ gatə gatə dɔrɔ â ə-ddaje. Â kɔsuje gaji Lubba ngaâ â piteje ddəw nɛ̂nje tə̂ənn le.

Pɔl isi kə rɔ-nəəl kəy-kula tə̂

¹² Ngakɔnʼmje, m-ndiki karə ə-gərəje to nɛ̂n kə̂ ingam le təl dda arə Tar kə̂ Maji aw kə kete kete.

¹³ Mba dəwje tɔyn kə̂ aw ddaje kula kə̂y mbay tə̂ wase dəwje tɔyn kə lo lo gərəje to dilam kəy-kula tə̂ ɔju dɔ tar lə Kristə.

¹⁴ Ngakɔnjeje nya kə̂ oomje kəy-kula tə̂ ingaje singa nya ddəw tə̂ lə Əbbə-dəwje ta kila mbər tar lə Lubba kə bbəəl ang.

¹⁵ Tɔkɔrɔ njaa, marə dəwje aw ilaje mbər tar lə Kristə mba mə â aw ddade ddəm n̂-ndikije ta ngaan tam ddəm, a marɛ̂je aw ilaje mbər tar le kə kəjə kə̂ maji.

¹⁶ Dedeenn le ndiki to məde tə̂ bba daw tɔjuje nɛ̂n tar lə Kristə le, mba n̂-gərəje to mee nəənn ta kayn ngɔru-ddɔ Tar kə̂ Maji le.

¹⁷ Kəsəje unnje mbər tar lə Kristə le to nɛ̂n ta-naan. N̂-ddaje kə kəjə kə̂ maji ang, mba dəjəje to n̂-ddaje baann bba kəm-to-ndoo ləm a kaw kə kete kete kəy-kula tə̂.

¹⁸ Yeenn dda nɛ̂n ang. Le daw tɔjuje tar lə Kristə le kə̂ kəjə kə̂ maji ang wase ddəw tar tə̂ kə̂ tɔkɔrɔ ang njaa kara nayn to dila mbər tar lə Kristə darə dəwje mban, minga rɔ-nəəl ddəwe tə̂. Rɔm a nəələm nya ddəwe tə̂ kə ləw.

¹⁹ Mba m-gərə to nɛ̂ɛnn a dda karə m-tee ta yo tə̂ ddəw duju Lubba tə̂ kə̂ aw dujuje mbam kə Ndil lə Jeju-Kristə kə̂ aw umanʼm le.

²⁰ Nɛ̂n kə̂ maw ngəbbə kə̂ munda məm dɔɛ̂ tə̂ nya dda arə rɔm a wul ang. A unn kute bbokənɛn nyɔm kə ləw, bbo misi kəm baa wase moy kara, pa-nja ləm a tɔju to Kristə le to nje-tɔkə-mbangə.

²¹ Mba kə̂ kəjə tə̂ ləm, kisi kə təbbə to Kristə, a koy to kinga nɛ̂n.

²² A bbo, nayn ləm kəm baa a kunn ddəw karə m-dda kulaje kə̂ a dda dəwje maji a, m-gərə tar kə̂ mâ pa ang.

²³ Kəjə ləm ee joo joo: M-ndiki ta kinya nangə nəənn ta kaw kisi kə Kristə. Yeenn bba a maji nya.

²⁴ A nayn ləm dɔ nangə tə̂ a dda kə se maji nya bbay.

²⁵ A m-gərə maji to mâ nayn kəm baa ta kisi mbɔrse tə̂ tɔyn mba kumanse karə kula le nja kə kete ddəm mba karə ingaje rɔ-nəəl ddəw mə-kunn tə̂ le ddəm.

²⁶ Yeenn bba kar kə̂ m-təl horose tə̂ a, ddəw tə̂ ləm, rɔse nəəlse nya mba Jeju-Kristə.

Maji ta dda ddɔ mba Tar kə̂ Maji

²⁷ A maji karə pa-nja ləse dda mə-kâra kə Tar kə̂ Maji lə Kristə le. Baann bba karə bbo m-ddee ta koose wase mee horose tə̂ ang njaa kara, moo tamse. Maji karə dəwje paje arəm nan aw uwaje arəje ngəng ddəw kəjə tə̂ kə kâra baa. Ngaâ məse to kâra baa bba aw ddaje nɛ̂n ddɔ tokə dəwje kə̂ kâra baa, mba mə-kunn kə̂ ddee ddəw Tar tə̂ kə̂ Maji le.

²⁸ Ə-bbəəlje njê-baanje le ang. Yeenn bba a tɔjujede to dunnje ddəw yo, a sese unnje ddəw kaji, mba nɛ̂ɛnn le in rɔ Lubba tə̂.

²⁹ Mba Lubba dda kə se mə-maji karə ooje məse tə̂ kə Kristə njaa a bbayɛ̂ ang, n̂-dda kə se mə-maji karə ooje ndoo mbɛɛ̂ tɔ.

³⁰ Ndoo le to ddɔ kə̂ aw ddaje tokə m-dda le ngaâ m-nayn tɛɛ̂ tə̂ baa bbay arə aw ooje tarɛ̂ le.