Pilemɔn 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl kə̂ dilam kəy-kula tə̂ mba tar lə Jeju-Kristə, əman kə ngokɔnje Timɔte, n-dda makəturu nəənn jari, əi Pilemɔn kə̂ ə-to nje-kula marəje kə̂ n-ndikii nya,

² jula nɛ̂n jarə kɔn-nannje Apiya kə Arəsipə kə̂ to nje-buwa-ddɔ ləje kə njê-mə-kunnje kə̂ aw mbɔnje naan mə kəy tə̂ ləi tɔ.

³ Maji karə Bɔjeje Lubba, ne kə Əbbə-dəwje Jeju-Kristə, n̂-ddaje kə se mə-maji ddəm darəje məse wul lɔm ddəm.

Tar ndiki kə tar mə-kunn lə Pilemɔn

⁴ Kar kə̂ maw duju Lubba a, maw mila rii tə̂ ngaâ maw marɛ̂ wooyo mbai kə ndɔ tɔyn.

⁵ Mba maw moo tam ndiki kə̂ aw ndiki njê-mə-kunnje ddəm məi kə̂ unn arə Əbbə-dəwje Jeju ngaâ ə-nayn ddəwe tə̂ le ddəm.

⁶ M-duju Lubba karə mə-kunn kə̂ kâra baa kə̂ əman je səi jee nɛ̂n le dda kula ngaâ dda arə dəwje gərəje nɛ̂nje tɔyn kə̂ maji kə̂ jasə ta dda mba Kristə.

⁷ Ngokɔnʼm, rɔm nəələm ngaâ minga singa mba ndiki kə̂ aw ndiki njê-mə-kunnje ngaâ ə-dda arə məde oso pɔn le.

Pɔl duju marə nɛ̂n mba Onejim

⁸ Ddəw mə-kâra tə̂ kə̂ n-dda kə Kristə le, masə ta kunn ndu karə ə-dda marə nɛ̂n.

⁹ A moo maji ta duji karə ə-dda nɛ̂n le ddəw ndiki tə̂. Əman Pɔl kə̂ m-to bbuka ngaâ bbasinɛn m-to kəy-kula tə̂ mba Jeju-Kristə le.

¹⁰ M-wali nya mba Onejim. N̂-ddee to ngonnəm mə kəy-kula tə̂ nəənn.

¹¹ Kete, inga marə nɛ̂n ddəw tə̂ laa ang, a bbasinɛn əman je səi jaw jinga nɛ̂n ddəw tə̂ laa.

¹² Mâ karə n̂-təl rɔi tə̂, ne kə̂ n̂-nayn to dəbbə rɔm njaa le.

¹³ M-ndiki nya ta ngəmɛ̂ rɔm tə̂ be karə n̂-dda kula narəm turi tə̂ mə kəy-kula tə̂ nəənn kə̂ m-to tə̂ mba Tar kə̂ Maji le.

¹⁴ A m-ndiki ta kinyai dda marə nɛ̂n kə dɔm baa ang. M-ndiki ta kuwai kə singa bba karə ə-dda marə nɛ̂n arəm ang. Maji karə ə-dda nɛ̂n le kə mə-ndiki ləi njaa.

¹⁵ A du ang, Onejim inyai mba gɔju kar, a â təl kingɛ̂ karə n̂-nayn səi nyɔm.

¹⁶ Mba bbasinɛn nəənn, n̂-to bbərə baa ang ngaa. Nuta bbərə ngaa, n̂-to ngokɔnje kə̂ n-ndike nya. Əman m-ndike nya. A əi, maji karə ə-ndiki utam bbay, ə-ndike to dəw njaa ddəm to dəw kə unn məɛ̂ arə Əbbə-dəwje ddəm.

¹⁷ Mba yeenn bba, bbo əjə to m-to nami a, ə-tɛɛ̂ kə rɔi tə̂ tokə əman â ə-taam kə rɔi tə̂.

¹⁸ Â bbo n̂-dda səi marə nɛ̂n kə dɔgɔlɛ̂ ang wase marə nɛ̂n ləi to dɔɛ̂ tə̂ a, unda tarɛ̂ dɔm tə̂.

¹⁹ Əman Pɔl njaa m-dda tar nəənn makəturu tə̂ kə jim: Əman njaa mâ kuka. Əi njaa kara ə-gərə to təbbə ləi nayn to bbangə ləm dɔi tə̂.

²⁰ Yeenn a, ngokɔnʼm, maji karə ə-dda nɛ̂ɛnn arəm mba Əbbə-dəwje. Maji karə ə-wul məm ddəw tə̂ lə Kristə.

²¹ Makəturu kə̂ maw dda mari nəənn, m-gərə to â dda nɛ̂n kə̂ maw duji le ngaâ m-gərə to â dda kuta ye kə̂ m-duji bbay.

²² Maji karə ə-gɔl lo-to arəm tɔ, mba munda məm to, ddəw duju tə̂ kə̂ aw dujuje Lubba le mbɔr ang a, nâ təl səm rɔse tə̂.

Dɔbɔyn lapiya

²³ Epaparas kə̂ dilaje əman je saa kəy-kula tə̂ mba Jeju-Kristə ddai lapiya.

²⁴ Markə kə Aristarkə kə Demas de kə Luku kə̂ daw dumanʼmje kula tə̂, n̂-ddaije lapiya tɔ.

²⁵ Maji karə mə-maji lə Əbbə-dəwje Jeju-Kristə nayn kə se.