Matiye 28 - Dɔnɔn kə̂ Siki: Tar kə̂ aw arə təbbə

Jeju kə̂ oy le ndol

¹ Go ndɔ-kuwa-rɔ tə̂ lə Jiipije kə̂ to dɔngɔr ndɔ a ta kunn-kute a, kə əndɔɔ baa, Mari kə̂ Magədala kə Mari kə̂ kâra dawje ta koo buwa-yo le.

² A ta koo a, nangə yəkə kə singa. Marə anjə lə Əbbə-dəwje in darâ ddee ndubbu ər le kə ddang ngaâ isi dɔɛ̂ tə̂.

³ N̂-ndɔnrɛn tokə ndi kə̂ təəl ngaâ kubbu laa nda tokə lə nɛyn.

⁴ Njê-ngəmje buwa-yo le bbəəlje nya ngaâ isaje. Disije tokə lə dəwje kə̂ oyje.

⁵ A anjə le pa arə dɛnɛ̂nje le nan: «Sese, ə-bbəəlje ang, mba m-gərə to aw sangəje Jeju kə̂ n̂-tɔlɛ̂ kakə-dəsə tə̂ le.

⁶ Nee nəənn ang, n̂-ndol tokə n̂-pa le. Ə-ddee ooje lo kə̂ dilɛ̂ tə̂ le.

⁷ Awje njangə aw paje arə njê-njaje goe tə̂, ə-paje nan: ‹N̂-ndol ngaâ naw ta nginanse kete Galile. A kooeje nunn.› Tarɛ̂ njaa m-pa marəse mban nəənn.»

⁸ Dɛnɛ̂nje lə ɔtuje buwa-yo tə̂ le kə ngɔru. Bbəəl uta dɔde ddəm rɔde nəəlde nya ddəm ngaâ daw paje tar le darə njê-njaje go Jeju tə̂.

⁹ A ta koo a, Jeju tee nɔnde tə̂ aw tila kəmde ngaâ pa arəde nan: «Lapiya ləse!» Dɛnɛ̂nje le ddeeje ngɔsi saa ngaâ dɔsuje məkəjə-gɔlde nɔɛ̂n tə̂, duwaje gɔlɛ̂ n̂-walɛ̂je nɛ̂n.

¹⁰ Yeenn ngaâ Jeju pa arəde nan: «Ə-bbəəlje ang, aw paje arəje ngakɔnʼmje arəje dawje Galile. Lo kə̂ nunn â dâ koomje tə̂.»

Tar lə njê-ngəmje ta buwa-yo kə̂ paje

¹¹ Dɛnɛ̂nje le naynje ddəw-boô bbay a, marə dəwje kə̂ ngəmje ta buwa-yo le təlje awje tɔkə bbe tə̂ aw ɔruje gəl nɛ̂nje tɔyn kə̂ toje le arəje mbayje lə njê-poloje Lubba.

¹² Tɔkə njê-poloje Lubba le mbɔnje naan kə tɔkəje lə Jiipije ngaâ dooje ta naan. Goe tə̂ a, darəje njê kə̂ ngəmje ta buwa-yo le narɛ kə̂ bo,

¹³ n̂-paje darəde nan: «Ta ə-paje nan: ‹Kar kə̂ n-nayn jaw tibbi bbay â njê-njaje go Jeju tə̂ le ddeeje til tə̂ ddee bbokoje niinnɛ̂.›

¹⁴ Bbo Pilatə oo tarɛ̂ a, ja gərə gusu kə̂ ta pa nɛ̂n karə n̂-ndiki tə̂. A sese â kingaje tar ang.»

¹⁵ Njê-ngəmje ta buwa-yo le taaje narɛ le ngaâ ddaje nɛ̂n le kə turu ndu kə̂ darəde le. Tar nəənn le nja horo Jiipije tə̂ ndərəng bbokənɛn.

Jeju ula njê-njaje goe tə̂

¹⁶ Njê-njaje go Jeju tə̂ kə̂ naynje dɔku gire kâra le awje Galile dɔ ddingiri tə̂ kə̂ n̂-tɔjude le.

¹⁷ Dooeje a, dɔsuje məkəjə-gɔlde nangə̂. A marɛ̂je aw maynje tar bbay.

¹⁸ Jeju ddee ngɔsi kə de, pa arəde nan: «Lubba arəm singa tɔyn darâ ddəm nangə̂ ddəm.

¹⁹ Yeenn a, awje rɔ gəl-dəwje tə̂ tɔyn kə̂ dɔ nangə tə̂. Ə-ddajede to njê-njaje gom tə̂ ta ə-ddajede batɛm kə ri Bɔ, ri Ngonn kə ri Ndil-mə-nda.

²⁰ Ə-tɔjujede arəje n̂-ddaje nɛ̂n kə turu nduje tɔyn kə̂ munn marəse. Ooje, mâ nayn kə se kə ndɔ tɔyn ndərəng ddutu ndɔ tə̂.»