Matiye 27 - Dɔnɔn kə̂ Siki: Tar kə̂ aw arə təbbə

Daw kə Jeju nɔn Pilatə tə̂

¹ Kə əndɔɔ baa njaa, mbayje lə njê-poloje Lubba kə tɔkəje lə Jiipije tɔyn unnje ndude karə n̂-tɔl Jeju.

² Duwɛ̂je n̂-tɔɛ̂je ngaâ n̂-ddeeje saa dulɛ̂je ji ngonn mbay Pilatə tə̂.

Tar yo lə Judas

³ Judas kə̂ ila Jeju ji dəwje tə̂ le oo tar sariya-yo kə̂ n̂-gangə dɔ Jeju tə̂ le a, kəjə laa jɔkɛ̂ nya. N̂-təl kə kandə narɛ kə̂ dɔmota le narə mbayje lə njê-poloje Lubba kə tɔkəje lə Jiipije le.

⁴ N̂-pa narəde nan: «M-dda nɛ̂n kə̂ maji ang, mba mila dəw kə̂ dda nɛ̂n kə̂ maji ang kâra ang ji dəwje tə̂ karə n̂-tɔlɛ̂.» Dilɛ̂je tə̂ nan: «Osoje tə̂ ang. Yeenn ooi.»

⁵ Judas sanrɛ narɛ le mə kəy-polo Lubba tə̂ ngaâ aw ila kula.

⁶ Mbayje lə njê-poloje Lubba le ndekeje narɛ le ngaâ paje nan: «Ndu arə ddəw ta ngəm narɛ kə̂ be nəənn lo ngəm narɛ tə̂ kə̂ mə kəy-polo Lubba tə̂ ang, mba to narɛ məsə.»

⁷ Duwaje dɔ naan ngaâ dunnje narɛ le n̂-ndokoje nɛ̂n ndɔɔ lə marə nje-kubba jo ta dda to lo dubbu yo njê-mbaje.

⁸ Mba yeenn bba daw bbar nɛ̂n ndɔɔ le nan «ndɔɔ-məsə» ndərəng bbokənɛn.

⁹ Yeenn bba tar lə Lubba kə̂ Jeremi kə to nje-kila mbər tar laa pa le ddee to tar kə̂ tɔkɔrɔ. Tar le nan: «N̂-taaje kandə narɛ dɔmota. Yeenn to gatə dəw kə̂ ngann Ijarayɛlje ɔju le.

¹⁰ Darəje narɛ le mba ndoko nɛ̂n ndɔɔ lə nje-kubba jo kə turu ndu kə̂ Əbbə-dəwje unn arəm.»

Pilatə duju tar Jeju

¹¹ Daw kə Jeju nɔn ngonn mbay Pilatə tə̂. Ngonn mbay le duje nan: «Ə-to tɔkə mbay lə Jiipije wa?» Jeju ilɛ̂ tə̂ nan: «Əi njaa ə-pa mban.»

¹² Mbayje lə njê-poloje Lubba kə tɔkəje lə Jiipije aw undaje tar dɔɛ̂ tə̂ a, nilade tə̂ kâra ang.

¹³ Yeenn ngaâ Pilatə duje nan: «Oo tarje tɔyn kə̂ daw dunda dɔi tə̂ nəənn ang wa?»

¹⁴ A nilɛ̂ marə tar tə̂ kâra ang. To nɛ̂n kə̂ dum dɔ Pilatə le.

N̂-gangə sariya-yo dɔ Jeju tə̂

¹⁵ Ndɔ kusu Pakə tə̂ kâra kâra tɔyn, ngonn mbay le aw ɔru marə dəw kəy-kula tə̂. To dəw kə̂ dəwje kə̂ banya ndikije karə nɔrɛ̂ bba.

¹⁶ A karɛ tə̂ənn, marə dəw kə̂ ria bbar nya ee kəy-kula tə̂ le. Ria nan Jeju Barabas.

¹⁷ Pilatə duju dəwje kə̂ banya kə̂ mbɔnje naan le nan: «Nân bba ə-ndikije karə mɔrɛ̂ marəse wa? Barabas wase Jeju kə̂ daw bbarɛ̂ nan Kristə le wa?»

¹⁸ Mba Pilatə gərə kə majɛ̂ to mə â dunda kə Jeju bba duwɛ̂je dulɛ̂je jia tə̂.

¹⁹ Kar tə̂ kə̂ Pilatə isi ngende-gangə sariya tə̂ le bbay a, dɛnɛ̂n laa ula pa arɛ̂ nan: «Ula tai tar tə̂ lə dəw kə̂ gatə gatə nəənn ang. Mba til tə̂ nəənn, moo ndoo nya mə nin tə̂ mbɛɛ̂.»

²⁰ A mbayje lə njê-poloje Lubba kə tɔkəje lə Jiipije tulaje dəwje kə̂ banya le karə n̂-dujeje darə nɔru Barabas a ta n̂-tɔl Jeju.

²¹ Ngonn mbay le təl dujude nan: «Horo dəwje tə̂ kə̂ joo nəənn, nân bba ə-ndikije karə mɔrɛ̂ marəse wa?» A dilɛ̂je tə̂ nan: «Barabas!»

²² Pilatə dujude bbay nan: «Ddi â mâ dda kə Jeju kə̂ daw bbarɛ̂ nan Kristə le wa?» Dede tɔyn njaa dilɛ̂je tə̂ nan: «Arə n̂-tɔlɛ̂ kakə-dəsə tə̂!»

²³ Pilatə dujude nan: «Majang ddi â n̂-dda wa?» A dunnje kutu kuru əkii kə singa bbay nan: «Arə n̂-tɔlɛ̂ kakə-dəsə tə̂!»

²⁴ Pilatə oo to nâ kasə dda marə nɛ̂n dang ang ngaâ dəwje le aw yəkəje lo kə kete kete a, nunn maann n̂-toko nɛ̂n jia kəm dəwje tə̂ kə̂ banya le n̂-pa nan: «Tar yo lə dingaw nəənn a kuwa dɔm ang. Oose.»

²⁵ Dəwje kə̂ banya le tɔyn ilɛ̂je tə̂ nan: «Maji karə tar yo laa le oso dɔje tə̂ kə dɔ ngannje tə̂.»

²⁶ Yeenn ngaâ Pilatə ɔru Barabas arəde. Narə n̂-tunda Jeju kə ndəy ngaâ nulɛ̂ jide tə̂ karə n̂-tɔlɛ̂ kakə-dəsə tə̂.

Mbambaje ɔjuje Jeju kokoje nɛ̂n

²⁷ Mbambaje lə Pilatə awje kə Jeju lo gangə sariya tə̂ laa ngaâ kəsə mbambaje le tɔyn mbɔnje naan dɔɛ̂ tə̂.

²⁸ N̂-tɔruje kubbuje laa rɔɛ̂ tə̂ ngaâ dulɛ̂je kubbu kə̂ ngal kə̂ kasɛ.

²⁹ N̂-peteje kula kə̂ to konn to əjɔkudɔ dundaje dɔɛ̂ tə̂. Dulaje marə kârə mu jia tə̂ kə̂ kɔl ngaâ dɔsuje məkəjə-gɔlde nangə̂ nɔɛ̂n tə̂, n̂-kokeje n̂-paje nan: «Lapiya, tɔkə mbay lə Jiipije!»

³⁰ N̂-tije wənrə dɔɛ̂ tə̂ ngaâ n̂-taaje kârə mu le dunda nɛ̂n dɔɛ̂.

³¹ Dɔjɛ̂je n̂-kokoje nɛ̂n n̂-tunga a, dɔruje kubbu kə̂ kasɛ kə̂ rɔɛ̂ tə̂ le ngaâ n̂-təlje dulɛ̂je kubbuje laa. Goe tə̂ a, n̂-teeje saa ta kaw tɔlɛ̂ kakə-dəsə tə̂.

N̂-bbərə Jeju kakə-dəsə tə̂

³² Mbambaje le inje mə bbe tə̂ le aw teeje saa kə ddaka a, dingaje marə dingaw kə̂ bbe tə̂ kə̂ Sirɛnn, ria nan Simɔn. Duwɛ̂je darə noto kakə-dəsə lə Jeju le.

³³ Daw teeje lo tə̂ kə̂ daw bbar nan Gɔlogota kə̂ kandɛ̂ nan: «Lo ka-dɔ-dəw je» a,

³⁴ darəje Jeju bɛn kə̂ dungu nɛ̂n kə̂ maji ang məɛ tə̂ karə nay. A Jeju le nan oo a, mbətə ta kay.

³⁵ N̂-bbəreje kakə-dəsə tə̂ le ngaâ n̂-ddɔje mbari n̂-kaynje nɛ̂n naan kubbuje laa.

³⁶ Goe tə̂ a, disije lo tə̂ənn ta ngəmɛ̂.

³⁷ N̂-dda marə makəturu n̂-bbərə ər dɔɛ̂ tə̂ ta tɔju nɛ̂n gəl nɛ̂n kə̂ n̂-gangə nɛ̂n sariya dɔɛ̂ tə̂ le nan: «Dəw nəənn to Jeju, tɔkə mbay lə Jiipije.»

³⁸ N̂-bbərə njê-bbokoje joo kakə-dəsəje tə̂ mbɔrɛ̂ tə̂ tɔ. Marɛ̂ kâra ər kɔl, a marɛ̂ kâra ər gəl.

³⁹ Dəwje kə̂ aw ndayje lo tə̂ənn tukaje dɔde tajɛ̂je nɛ̂n.

⁴⁰ N̂-paje darɛ̂je nan: «Əi kə̂ ə-ndiki ta tɔ kəy-polo Lubba ta təl dda marɛ̂ ture tə̂ mə ndɔ mota tə̂ le, bbo ə-to Ngonn lə Lubba a, aji rɔi əi njaa bbo in kakə-dəsə tə̂ le uru nangə̂!»

⁴¹ Mbayje lə njê-poloje Lubba kə njê-gərəje-Ndu kə tɔkəje lə Jiipije kokeje tɔ paje nan:

⁴² «Naji marə dəwje, a nasə kaji da-rɔɛ̂ njaa ang! Tɔkə mbay kə̂ Ijarayɛl le â nəənn wa? Bbo nin kakə-dəsə tə̂ nuru nangə̂ a, ja kunn məje karɛ̂.

⁴³ Nunda məɛ̂ dɔ Lubba tə̂ ngaâ n̂-pa nan n̂-to Ngonn lə Lubba. Bbo Lubba ndike a, maji karə najɛ̂ bbasinɛn nəənn.»

⁴⁴ Njê-bbokoje kə̂ n̂-bbərəde kakə-dəsəje tə̂ le tajɛ̂je tokə baann tɔ.

Koy lə Jeju

⁴⁵ Unn kute gɔl kar dɔku gire joo tə̂ ndərəng gɔl kar mota kə̂ lo-kul tə̂, lo ndul dɔ nangə tə̂ le tɔyn.

⁴⁶ A ta tee gɔl kar tə̂ kə̂ mota a, Jeju uru əkii kə singa nan: «Eli, Eli, laman sabakatani!» Kandə tar le nan: «Lubba ləm, Lubba ləm, mba ddi bba inyam wa?»

⁴⁷ Marə dəwje kə̂ eeje lo tə̂ənn le ooje tar lə Jeju le a, n̂-paje nan: «Naw bbar Eli.»

⁴⁸ Marə dəw kâra horode tə̂ ayn kə ngɔru aw unn marə ta-kubbu ula mə maann-binyə tə̂ kə̂ masə ngaâ n̂-kə ta kârə mu tə̂ nula narə Jeju karə ay.

⁴⁹ A marɛ̂je paje nan: «N-nginan joo se Eli a ddee kajɛ̂ wa?»

⁵⁰ Jeju təl uru əkii kə singa bbay ngaâ kəwn laa tee.

⁵¹ Karɛ̂ tə̂ənn njaa, kubbu kə̂ n̂-tɔ n̂-gangə nɛ̂n mə kəy-polo Lubba tiir dannâ joo, in taar uru bəər. Nangə yəkə ngaâ ərje ribbaje.

⁵² Ta buwa-yoje təəyn ngaâ dəwje kə̂ ooje məde tə̂ kə Lubba bba oyje ndolje.

⁵³ Dinje mə buwa-yoje tə̂ le n̂-teeje ngaâ go ndol tə̂ kə̂ Jeju ndol le a, dandəje Jerujalɛm kə̂ to bbe kə̂ maji tɔyn arə dəwje nya oojede.

⁵⁴ Nje-kɔn dɔ mbambaje kə̂ Rɔm kə mbambaje kə̂ daw ngəmje Jeju le dooje nangə kə̂ aw yəkə kə nɛ̂nje kə̂ toje le a, bbəəl uta dɔde nya ngaâ n̂-paje nan: «Dəw nəənn to Ngonn lə Lubba njaa.»

⁵⁵ Dɛnɛ̂nje tokə banya eeje tə̂ənn, darje ddəw əw bba daw dooje nɛ̂njeenn le, to dede kə̂ dinje kə Jeju Galile nu n̂-dannɛ̂je mba dda kula karɛ̂.

⁵⁶ Horo dɛnɛ̂nje tə̂ənn le, Mari kə̂ Magədala kə Mari kə̂ uju Jakə de kə Jojɛpə kə kɔn ngann lə Jebede, deeje tə̂ənn.

Dila niinn Jeju mə buwa-yo tə̂

⁵⁷ Lo-kul a, marə nje-nɛ̂n-kinga kə̂ to dəw kə̂ bbe tə̂ kə̂ Arimate ddee tee. Ria nan Jojɛpə. Ne kara n̂-to nje-nja go Jeju tə̂ tɔ.

⁵⁸ Naw noo Pilatə, n̂-duju niinn Jeju le. Yeenn ngaâ Pilatə unn ndu karə darɛ̂ niinn le.

⁵⁹ Jojɛpə unn niinn le, n̂-kə kə kubbu kə̂ siki kə̂ nɛ̂n-yərəw ɔru ang

⁶⁰ ngaâ nila buwa-yo tə̂ laa ne njaa kə̂ narə duru darɛ̂ tokə siki bbay mə ər tə̂. Goe tə̂ a, n̂-ndubbu marə tɔkə ər nutu nɛ̂n ta buwa-yo le ngaâ nɔtu.

⁶¹ Mari kə̂ Magədala kə marə Mari kə̂ deeje tə̂ənn, disije nangə̂, kəmde to kə buwa-yo tə̂ le.

Mbambaje aw ngəmje buwa-yo lə Jeju

⁶² Lo-karɛ̂, go ndɔ gɔl nɛ̂nje mba ndɔ-kuwa-rɔ tə̂ a, mbayje lə njê-poloje Lubba kə Parijinyɛje awje naan tə̂ kâra baa rɔ Pilatə tə̂,

⁶³ n̂-paje nan: «Dəw kə̂ bo, jole məje to, dɔ ndɔ tə̂ kə̂ nje-kərə dəwje nəənn le nayn nɛ̂n kəm baa bbay le, n̂-pa nan: ‹Ndɔ mota go yo tə̂ ləm a, mâ ndol.›

⁶⁴ Yeenn a, unn ndu arə n̂-ngəm buwa-yo le ndərəng ndɔ mota. Baann ang a, njê-njaje goe tə̂ a ddee bbokoje niinnɛ̂ a, dâ paje karə dəwje nan ne â n̂-ndol. Ngəm kə̂ guku nəənn a kuta ye kə̂ kete bbay.»

⁶⁵ Pilatə pa arəde nan: «Njê-ngəmje ta lo â nəənn. Awje arəje n̂-ngəmje buwa-yo le tokə məse ndiki.»

⁶⁶ Dawje buwa-yo tə̂ le ta koo gusu kə̂ ta ngəm nɛ̂n tɛɛ̂. N̂-ddaje marə əndaji ər tə̂ kə̂ ta buwa-yo tə̂ le ngaâ dundaje njê-ngəmje ta lo tɛɛ̂ tə̂.