Matiye 24 - Dɔnɔn kə̂ Siki: Tar kə̂ aw arə təbbə

Jeju pa tar kəy-polo Lubba kə̂ dâ guru

¹ Jeju tee kəy-polo Lubba tə̂ aw ɔtu a, njê-njaje goe tə̂ ddeeje aw tɔjɛ̂je gusu kə̂ dɔsu nɛ̂n kəy-polo Lubba le.

² A Jeju pa arəde nan: «Ooje nɛ̂nje nəənn tɔyn. M-pa tar kə̂ tɔkɔrɔ marəse. Marə ər kâra a nayn dɔ marɛ̂ tə̂ ang. Dâ tɔ nɛ̂nje nəənn tɔyn.»

Nɛ̂nje kə̂ a toje kete bba ddutu ndɔ a ddee

³ Jeju isi dɔ ddingiri Olibəje tə̂. A njê-njaje goe tə̂ ddeeje kə karəde baa dujeje nan: «Ndɔ kə̂ dda bba nɛ̂njeenn a toje wa? Ddi bba ja gərə nɛ̂n kar ddee ləi ddəm ddutu ndɔ le ddəm wa?»

⁴ Jeju ilade tə̂ nan: «Aaje rɔse, arəje dəw ərəse ang.

⁵ Mba dəwje nya a ddeeje kə rim ngaâ dâ paje nan: ‹Əman â m-to Kristə le› ngaâ dâ kərəje dəwje nya.

⁶ A kooje tar ddɔje kə̂ aw ddee ngɔsi kə tar ddɔje kə̂ nayn ddəw əw. A arəje bbəəl uta dɔse ang. Maji karə nɛ̂njeenn le toje bba. A, a to ddutu ndɔ ang bbay.

⁷ Marə gəl-dəwje a kin ta dda ddɔ kə marə gəl-dəwje. Marə Bbe-kɔn a kin ta dda ddɔ kə marə Bbe-kɔn. Nangə a yəkə loje tə̂ dang dang, tɔkə bbo a koso.

⁸ A nɛ̂njeenn tɔyn a toje tokə lə kunn-kutu nduru-ndo lə dɛnɛ̂n.

⁹ «Yeenn ngaâ dâ kuwase karə dəwje ulaje kəmse ndoo tə̂ ngaâ dâ tɔlse. Gəl-dəwje tɔyn a mbətəse mbam.

¹⁰ Mə-kunn lə dəwje nya a koso. Dâ kunn dɔ naan ngaâ dâ mbətəje naan.

¹¹ Njê-kilaje mbər tar kə̂ tɔkɔrɔ ang tokə banya a kundaje lo teeje ngaâ dâ kərəje dəwje nya nya.

¹² Majang a kaw kə kete kete, ndiki naan lə dəwje nya a təl kə guku.

¹³ A dəw kə̂ uwa arə ngəng ndərəng tee kɔnyɛ̂ tə̂ a, a kinga kaji.

¹⁴ Dâ kila mbər Tar kə̂ Maji kə̂ dɔ Bbe-kɔn tə̂ kə̂ darâ duninya tə̂ tɔyn karə gəl-dəwje tɔyn ooje. Goe tə̂ ngaa bba, a to dɔbɔyn nɛ̂n.»

Dəwje a kooje ndoo nya

¹⁵ «Â kooje ‹nɛ̂n kə̂ maji ang kə̂ aw tuju lo› kə̂ to lo tə̂ kə̂ n̂-sangə dang mba Lubba, nɛ̂n kə̂ Daniyɛl kə̂ to tɔkə nje-kila mbər tar lə Lubba ila mbəre le. Maji karə dəw kə̂ aw tura Makəturu nəənn gərə kandɛ̂ kə majɛ̂!

¹⁶ Yeenn bba, maji karə dəwje kə̂ isije nangə Jude tə̂ aynje ər kə dɔ ddingirije tə̂.

¹⁷ Bbo dəw kə̂ isi dɔ kəy tə̂ a, maji karə n̂-ddisi mba kunn nɛ̂n laa kə̂ to mə kəy tə̂ ang ngaa.

¹⁸ Bbo dəw ee ndɔɔ̂ a, maji karə n̂-təl bbeê mba kunn kubbu laa ang tɔ.

¹⁹ Dɔ ndɔje tə̂ənn, a to ndoo nya karə dɛnɛ̂nje kə̂ uwaje səm kə njê kə̂ ngannde aw ilje mba.

²⁰ Ə-dujuje Lubba karə kayn kə̂ a ta kaynje le to dɔ nɛyn-kul tə̂ ang ddəm ndɔ-kuwa-rɔ tə̂ ang ddəm.

²¹ Mba kar tə̂ənn, dəwje a kooje ndoo karə uta dɔɛ̂. Ləw baa kə̂ Lubba dda duninya ndərəng bbokənɛn dəw nayn oo ndoo kə̂ baann ang bbay. Goe tə̂ a, nɛ̂n kəm-to-ndoo kə̂ a kuta yeenn a to ndɔ kâra ang ngaa.

²² Bbo Əbbə-dəwje təl kə ndɔ nɛ̂njeenn le arə gɔju ang a, dəw kâra a kinga kaji ang. A n̂-təl nɛ̂n narə gɔju, mba dəwje kə̂ n̂-mbərəde tokə kete le.

²³ «Yeenn bba, bbo dəw pa arəse nan: ‹Kristə le ee nəənn› wase: ‹Nee yoonn› a, ə-ndikije tə̂ saa ang.

²⁴ Mba kristəje kə̂ tɔkɔrɔ ang kə njê-kilaje mbər tar kə̂ tɔkɔrɔ ang a ddeeje. Dâ ddaje nɛ̂n-mɔrije kə nɛ̂nje kə̂ dum dɔ dəwje, ta bbo ddəw to a, njê kə̂ Lubba mbərəde kara dâ kərəjede tɔ.

²⁵ Ye â nəənn, m-ndɔru mbise kete mban.

²⁶ Yeenn bba bbo, n̂-pa darəse nan: ‹Ya! Nee mə kɔr tə̂› a, awje ang. A bbo nan: ‹Ne â niya rɔɛ̂ nəənn› a, ə-ndikije tə̂ ang.

²⁷ Ngonn lə dəw a ddee tokə ndi kə̂ təəl kə̂ ndoko laa in kəm kar tə̂ ndərəng uru lo kə̂ kar aw andə tə̂.

²⁸ Lo kə̂ niinn to tə̂ a, malje a mbɔnje naan tə̂.»

Ddee lə Ngonn lə dəw

²⁹ «Njangə baa go ndɔ nɛ̂n kəm-to-ndooje tə̂ənn le a, kar a tuka ndul, ta nɛyn a nda ang ngaa. Əndɛtɛrɛndɛnje a kinje darâ gaynje nangə̂ ngaâ singa-mɔnguje kə̂ darâ a yəkəje.

³⁰ Yeenn ngaâ nɛ̂n kə̂ a tɔju karə dəwje gərəje nɛ̂n təl lə Ngonn lə dəw a kubba mə dara tə̂. Dəwje tɔyn kə̂ duninya tə̂ a nɔnje. Dâ kooje Ngonn lə dəw kə̂ a ddee mə mum tə̂ kə singa-mɔngu nya ddəm kə piti nya ddəm.

³¹ Tɔkə təbbə-narɛ a bbar ngaâ Ngonn lə dəw a kula anjəje laa karə n̂-mbɔnje dəwje kə̂ n̂-mbərəde kɔyn nangə tə̂ kə̂ sɔ tɔyn ndərəng kɔyn dara tə̂.»

Nɛ̂n-tɔju kə̂ dɔ kakə pigə tə̂

³² «Ooje nɛ̂n-kɔju-marɛ̂ dɔ kakə pigə tə̂. Bbo barkəm kakə pigə unn kutu təwn ngaâ kamɛ̂ aw unju a, ə-gərəje to nɛyn nɛ̂n-dubbu ddee ngɔsi ngaa.

³³ Ddəw kâra baa, bbo ooje nɛ̂njeenn le tɔyn a, maji karə ə-gərəje to Ngonn lə dəw nayn ngɔsi ngaa, nar ta-ddəw tə̂ ta kandə nɛ̂n bbeê ləse.

³⁴ Tɔkɔrɔ, m-pa marəse, dəwje kə̂ bbokənɛn nəənn a koyje tɔyn ang bbay a, nɛ̂njeenn tɔyn a toje.

³⁵ «Dara kə nangə a ndayje, a tarje ləm a ndayje ang.»

Dəw kâra gərə ndɔ kə̂ Ngonn lə dəw a ddee nɛ̂n ang

³⁶ «Dəw kâra gərə ndɔ wase kar kə̂ nɛ̂njeenn le a toje nɛ̂n ang. Anjəje kə̂ darâ wase Ngonn le kara gərə ang. Bɔ kə karɛ̂ baa â gərə.

³⁷ Ndɔ ddee lə Ngonn lə dəw le, nɛ̂nje a toje tokə dɔ ndɔ tə̂ lə Nowe.

³⁸ Mba kar tə̂ənn le, kete bba karə maann ndi taa lo, kula lə dəwje njaa to kusa kə kay. Daw taaje naan, daw darəje ngaw wase dɛnɛ̂n ngannde ndərəng ndɔ tə̂ kə̂ Nowe andə nɛ̂n mə tɔkə to tə̂.

³⁹ Dəjəje marə nɛ̂n kâra ang ndərəng ndɔ tə̂ kə̂ maann ndi taa lo ngaâ uwade tɔyn aw kə de. Ndɔ ddee lə Ngonn lə dəw a to tokə baann tɔ.

⁴⁰ Yeenn bba, bbo dingawje joo eeje ndɔɔ̂ a, dâ kunn marɛ̂ kâra, a dâ kinya ne kə̂ kâra.

⁴¹ Dɛnɛ̂nje joo kə̂ aw uruje nɛ̂n birî, dâ kunn marɛ̂ kâra, a dâ kinya ne kə̂ kâra.

⁴² «Yeenn a, arje dɔ gɔlse tə̂, mba ə-gərəje ndɔ kə̂ Əbbəsese a ddee nɛ̂n ang.

⁴³ Ə-gərəje kə majɛ̂: Bbo nje-kəy gərə kar kə̂ nje-bboko a ta ddee nɛ̂n til tə̂ a, nâ ngəm ta-kəy bbo nâ kinya nje-bboko le karə andə kəy laa ang.

⁴⁴ Mba yeenn bba, sese kara arje dɔ gɔlse tə̂, mba Ngonn lə dəw a ddee kə kar kə̂ aw əjəje to nâ ddee nɛ̂n le ang.»

Tar dɔ njê-kulaje tə̂ joo

⁴⁵ «Nje-kula kə̂ dda nɛ̂n kə dɔgɔlɛ̂ ddəm kəmɛ̂ arɛ ddəm kə̂ əbbeeje inya njê-kula marɛ̂je jia tə̂ karə narəde nɛ̂n-kusa kə karɛ̂ to nân wa?

⁴⁶ Maji arɛ̂, ne kə̂ əbbeeje le təl ddee ingɛ̂ ta kula tə̂ le.

⁴⁷ Tɔkɔrɔ njaa, m-pa marəse, əbbeeje le a kinya nɛ̂n-kingaje laa tɔyn mə jia tə̂ karə n̂-ngəm.

⁴⁸ Â bbo n̂-to nje-kula kə̂ maji ang a, nâ kəjə nan: ‹Əbbəmje a ddee njangə ang bbay.›

⁴⁹ Nâ kuru dɔ njê-kula marɛ̂je tə̂ le tundade. Nâ kusa nɛ̂n ngaâ nâ kay nɛ̂n kə njê-kayje koto.

⁵⁰ Əbbeeje le a ddee kə ndɔ kə̂ nəjə ang ddəm kə kar kə̂ nâ gərə ang ddəm.

⁵¹ Əbbeeje le a ddɛɛ̂ maji ang ngaâ a kilɛ̂ lo tə̂ kə̂ daw dila njê-ngəmje tə̂ darə aw nɔnje ddəm aw ngəərje ngangəde ddəm.»