Matiye 20 - Dɔnɔn kə̂ Siki: Tar kə̂ aw arə təbbə

Lubba aw uka dəwje kə̂ ddaje kula arɛ̂

¹ «Tar Bbe-kɔn kə̂ darâ to tokə tar lə marə nje-ndɔɔ kə̂ tee kə əndɔɔ baa mba sangə dəwje karə aw ndɔɔ binyə tə̂ laa.

² Ne kə dəwje le dooje ta naan karə nukade kandə narɛ kâra mba ndɔ kâra kâra. Goe tə̂ a, narə dawje ndɔɔ binyə tə̂ laa le.

³ Tee gɔl kar jikara tə̂ kə əndɔɔ a, n̂-tee ddaka ngaâ noo marə njê-kulaje kə̂ ingaje kula ta dda ang kə̂ arje natâ.

⁴ N̂-pa narəde nan: ‹Aw ddaje kula ndɔɔ binyə tə̂ ləm ta mâ kukase kə dɔgɔlɛ̂.›

⁵ Njê-kulaje le awje ndɔɔ̂ le. Nje-ndɔɔ le tee ddaka bbay kə gɔl kar dɔku gire joo ngaâ n̂-təl n̂-tee kə gɔl kar mota kə̂ lo-kul tə̂ tɔ, a n̂-dda tokə baann bbay.

⁶ Nje-ndɔɔ le təl tee ddaka kə gɔl kar min kə̂ lo-kul tə̂ bbay a, oo marə njê-kulaje arje lo tə̂ənn le bbay ngaâ pa arəde nan: ‹Mba ddi bba arje nəənn kə əndɔɔ baa ndərəng kar be nəənn, a ə-ddaje nɛ̂n kâra ang wa?›

⁷ Dilɛ̂je tə̂ nan: ‹Jar baa, mba joo dəw kə̂ ta kotoje kula tə̂ ang.› N̂-pa narəde nan: ‹Aw ddaje kula ndɔɔ binyə tə̂ ləm tɔ.›

⁸ «Lo-kul a, nje-ndɔɔ le bbar nje-kaa lo dɔ nɛ̂nje tə̂ laa pa arɛ̂ nan: ‹Ə-bbar njê-kulaje le ta ukade kâra kâra tɔyn. Unn kute dɔ dede tə̂ kə̂ n̂-ddeeje dɔ guku bba ta ə-tee nɛ̂n dɔ njê kə̂ ddeeje dɔngɔr tə̂.›

⁹ Njê kə̂ ddeeje kə gɔl kar min kə̂ lo-kul tə̂ le ddeeje ngaâ ingaje kandə narɛ kâra kâra tɔyn.

¹⁰ Dede kə̂ dɔngɔr n̂-ddeeje tɔ. Dəjəje to dâ kingaje narɛ uta njê kə̂ dɔ guku a, dede njaa kara dingaje kandə narɛ kâra kâra tɔyn tɔ.

¹¹ Kar tə̂ kə̂ dingaje narɛ le a, n̂-nanɛ̂nje kə nje-ndɔɔ le

¹² n̂-paje nan: ‹Njê-kulaje kə̂ ddeeje dɔ guku ngaâ ddaje kula kar kâra baa le â ukade asə naan kə jeje kə̂ kula uwa taje ddəm kar ɔsuje tɔlje ddəm tokə baânn wa?›

¹³ Nje-ndɔɔ le pa arə marɛ̂ kâra horode tə̂ nan: ‹Namʼm, mulai naan tə̂ ang. Əman je səi, joo ta naan mba kandə narɛ kâra mba ndɔ kâra kâra ang wa?

¹⁴ Ə-taa narɛ ləi bbo ɔtu tam tə̂ kə ddang. M-ndiki ta karə nje-kula kə̂ dɔ guku inga narɛ asə səi naan.

¹⁵ Mee kə ddəw ta dda nɛ̂n kə̂ məm ndiki kə narɛ ləm ang wa? Wase aw aam kə kəm kə̂ maji ang mba maji ləm le wa?› »

¹⁶ Jeju pa bbay nan: «Dəwje kə̂ dɔ guku a toje to dəwje kə̂ dɔngɔr. A dəwje kə̂ dɔngɔr, a toje to dəwje kə̂ dɔ guku.»

Jeju təl pa tar koy laa kə tar ndol laa

¹⁷ Jeju aw aw kə Jerujalɛm a, n̂-bbar njê-njaje goe tə̂ kə karəde baa, n̂-pa narəde kə ddəw nan:

¹⁸ «Ooje, jaw jawje kə Jerujalɛm. Lo tə̂ nunn, dâ kila Ngonn lə dəw ji tɔkə njê-poloje Lubba kə ji njê-gərəje-Ndu tə̂. Dâ gangəje sariya-yo dɔɛ̂ tə̂

¹⁹ ngaâ dâ kilɛ̂ ji dəwje tə̂ kə̂ gərəje Lubba ang karə dɔjɛ̂je n̂-kokoje nɛ̂n. Dâ tundɛ̂ kə ndəy ngaâ dâ tɔlɛ̂ kakə-dəsə tə̂. Ndɔ mota laa a, nâ ndol.»

Kɔn Jakə kə Janje duju marə nɛ̂n Jeju

²⁰ Goe tə̂ a, dɛnɛ̂n lə Jebede aw kə ngannɛ̂ kə̂ dingaw kə̂ joo rɔ Jeju tə̂. Nɔsu məkəjə-gɔlɛ̂ nangə̂, n̂-dda rɔɛ̂ to ndoo rɔ Jeju tə̂ mba duje marə nɛ̂n.

²¹ Jeju duje nan: «Ddi â ə-ndiki wa?» Nilɛ̂ tə̂ nan: «Maji karə unn ndu ta karə ngannəm kə̂ joo nəənn, marɛ̂ kâra isi dɔ ji-kɔli tə̂, a ne kə̂ kâra nisi dɔ ji-gəli tə̂ Bbe-kɔn tə̂ ləi.»

²² Jeju ilɛ̂ tə̂ nan: «Ə-gərəje nɛ̂n kə̂ aw dujuje ang. Â kasəje ta kay əngo kəm-to-ndoo kə̂ mâ ta kay wa?» Dilɛ̂je tə̂ nan: «Ja kasə.»

²³ Jeju pa arəde nan: «Tɔkɔrɔ, a kasəje ta kay əngo kəm-to-ndoo ləm le njaa. A tar kisi dɔ ji-kɔləm tə̂ wase dɔ ji-gələm tə̂, to tar ləm ang. Lo le to mba njê kə̂ Bɔmje gɔl mbade.»

²⁴ Kəsə njê-njaje go Jeju tə̂ kə̂ dɔku le ooje tar le a, wungu ɔnde dɔ ngakɔn-naan tə̂ kə̂ joo le.

²⁵ Jeju bbarde tɔyn ngaâ pa nan: «Ə-gərəje to mbay-bbeje aw ddaje dingaw dɔ dəwje tə̂ ngaâ dəwje kə̂ bo aw ddaje dəwje maji ang.

²⁶ A to tokə baann horose tə̂ ang. Dəw kə̂ ndiki ta ddee to dəw kə̂ bo horose tə̂ a, maji karə n̂-ddee to nje-kula ləse.

²⁷ Dəw kə̂ horose tə̂ kə̂ ndiki ta to dəw kə̂ dɔngɔr a, maji karə n̂-dda rɔɛ̂ to bbərə ləse.

²⁸ Ddəw kâra baa, Ngonn lə dəw ddee karə dəwje ddaje kula arɛ̂ ang. N̂-ddee ta dda kula karə dəwje, ta kunn rɔɛ̂ to nɛ̂n-kuka dɔ dəwje tokə banya.»

Jeju aji njê-kəm-tɔje joo arə dooje lo

²⁹ Kar tə̂ kə̂ Jeju kə njê-njaje goe tə̂ dinje mə bbe tə̂ kə̂ Jeriko daw teeje kə ddaka a, dəwje kə̂ banya unnje goe.

³⁰ A ta koo a, marə njê-kəm-tɔje joo kə̂ isije mbɔr ddəw tə̂ ooje nan Jeju â aw nday. Duruje əkii nan: «Əbbəjeje, Ngonn lə Dabbiti, oo kəm-to-ndoo ləje bbo!»

³¹ Dəwje kə̂ banya le inje kə de karə dutu tade. A duruje əkii kə taar bbay nan: «Oo kəm-to-ndoo ləje bbo! Əbbə-dəwje, Ngonn lə Dabbiti.»

³² Jeju ar lo kâra ngaâ bbarde, pa nan: «Ddi â ə-ndikije karə m-dda marəse wa?»

³³ Dilɛ̂ tə̂ nan: «Əbbəjeje, arə joo lo.»

³⁴ Jeju oo kəm-to-ndoo ləde ngaâ ula jia ɔru nɛ̂n kəmde. Kəm naan tə̂ nəənn njaa dooje lo ngaâ dunnje goe.