Matiye 17 - Dɔnɔn kə̂ Siki: Tar kə̂ aw arə təbbə

Jeju turu to dang

¹ Ndɔ misan goe tə̂ a, Jeju jin Piyɛr, Jakə kə Jan kə̂ to ngokɔn Jakə ngaâ aw kə de dɔ ddingiri tə̂ ddəw əw.

² Jeju turu to dang kəmde tə̂, kəmɛ̂ unn kutu ndoko tokə lə kar ngaâ kubbuje laa turu nda ngaâ aw ndoko.

³ A ta koo a, dooje Mɔyijə de kə Eli kə̂ dundaje lo n̂-teeje ngaâ daw paje saa tar.

⁴ Piyɛr pa arə Jeju nan: «Əbbəjeje, maji laa boy â jee nəənn, bbo ə-ndiki a, mâ dda ngann kəy-kamje mota: kâra to ləi, kâra to lə Mɔyijə, a kâra to lə Eli.»

⁵ N̂-nayn naw pa tar bbay a, marə mum kə̂ ndɔnrɛn ddee kiri dɔde. Marə ndu bbar mə mum tə̂ le nan: «Dəw nəənn to ngonn ndiki ləm kə̂ rɔm nəələm nya mbɛɛ̂. Maji karə ooje tɛɛ̂.»

⁶ Njê-njaje go Jeju tə̂ le ooje ndu Lubba le a, bbəəl uta dɔde arə n̂-tee dosoje n̂-dəbbəje kəmde nangə̂.

⁷ Jeju ddee rɔde tə̂ ɔrude kə jia, pa nan: «Ə-bbəəlje ang, inje taar.»

⁸ Kar kə̂ dunnje kəmde kə taar a, Jeju kə karɛ̂ baa njaa â dooeje.

⁹ Kar kə̂ dinje dɔ ddingiri tə̂ le daw ddisije a, Jeju unn ndu nəənn arəde nan: «Dang bba ə-paje tar nɛ̂n kə̂ ooje le arəje dəw ang, ndərəng ndɔ kə̂ Ngonn lə dəw a ndol go koy tə̂ laa.»

¹⁰ Njê-njaje goe tə̂ dujeje nan: «Mba ddi bba njê-gərəje-Ndu paje nan Eli a ddee dɔngɔr bba wa?»

¹¹ Nilade tə̂ nan: «Tɔkɔrɔ, Eli a ddee dɔngɔr mba mɔsɛ nɛ̂nje tɔyn ture tə̂.

¹² A əman m-pa marəse, Eli le ddee mban. Dəwje gəreje ang ngaâ n̂-ddaje saa nɛ̂n kə̂ məde ndiki. Dâ kulaje kəm Ngonn lə dəw ndoo tə̂ tokə baann tɔ.»

¹³ Njê-njaje goe tə̂ gərəje kə majɛ̂ to naw pa tar dɔ Jan-Batisi tə̂.

Jeju aji ngonn kə̂ ndil isi məɛ̂ tə̂

¹⁴ Jeju kə njê-njaje goe tə̂ n̂-teeje ngɔsi kə dəwje kə̂ banya. Marə dəw ddee rɔɛ̂ tə̂ ngaâ ungu məkəjə-gɔlɛ̂ nangə̂ nɔɛ̂n tə̂.

¹⁵ N̂-pa nan: «Əbbəmje, oo kəm-to-ndoo lə Ngonnəm kə̂ dingaw nəənn. Rɔ-to ndilje kə̂ maji ang ddɛɛ̂ arə noo ndoo nya. Naw noso kə ndɔ ndɔ kəm puru tə̂, ang a, mə maann tə̂.

¹⁶ Maw saa rɔ njê-njaje goi tə̂, a dumanje ta kajɛ̂ pin.»

¹⁷ Jeju pa nan: «See dəwje kə̂ mə-kunn ləse goto nəənn, mâ nayn kə se be mba ndɔ baânn wa? Mâ kumanse mba ndɔ baânn bbay wa? Ə-ddeeje kə ngonn le arəmje.»

¹⁸ Jeju ndangə ndil kə̂ maji ang le arə n̂-tee kə ddang. Kar tə̂ənn njaa, ngonn le aji.

¹⁹ Goe tə̂ a, njê-njaje go Jeju tə̂ le ddeeje rɔɛ̂ tə̂, dede kə karəde baa saa bba n̂-dujeje nan: «Mba ddi bba jeje juman kə tubba ndil le pin wa?»

²⁰ Jeju pa arəde nan: «Mba mə-kunn ləse tɛn baa. Tɔkɔrɔ m-pa marəse, bbo mə-kunn ləse tɛn baa tokə lə kandə-ko kə̂ ria nan mutardə bba ə-paje arəje ddingiri nəənn ə-paje nan: ‹Ə-ngəsə nəənn aw to yoonn› a, nâ ngəsə. Marə nɛ̂n kâra kə̂ a nyase goto. [

²¹ Ə-mbətəje nɛ̂n-kusa, ta ə-dujuje Lubba nya bba â tubbaje ndilje kə̂ baann.]»

Jeju təl pa tar koy laa kə tar ndol laa

²² Marə ndɔ, njê-njaje go Jeju tə̂ mbɔnje naan Galile a, n̂-pa narəde nan: «Dâ kuwa Ngonn lə dəw kulɛ̂ ji dəwje tə̂.

²³ Dâ tɔlɛ̂je ngaâ ndɔ mota laa a nâ ndol.» Njê-njaje go Jeju tə̂ ooje tar le a, ndingaje ndoo nya.

Jeju de kə Piyɛr dukaje lambo kəy-polo Lubba

²⁴ Jeju kə njê-njaje goe tə̂ n̂-teeje Kapɛrnawum a, njê-taaje narɛ lambo kəy-polo Lubba ddeeje rɔ Piyɛr tə̂ dujeje nan: «Nje-nɛ̂n-tɔju ləse uka lambo kəy-polo Lubba ang wa?»

²⁵ Piyɛr ilade tə̂ nan: «Naw nuka njaa!» Piyɛr a ta kandə kəy be a, Jeju ɔru tɛɛ̂ dɔngɔr pa nan: «Simɔn, kəjə ləi dɔ tar tə̂ nəənn tokə baânn wa? Njê kə̂ dda bba aw ukaje lambo kə mbayje kə̂ nangə̂ nəənn wa? Ngann njê-bbeje wase njê-mbaje wa?»

²⁶ Piyɛr ilɛ̂ tə̂ nan: «Njê-mbaje.» Jeju ilɛ̂ tə̂ nan: «Yeenn a, to tar lə ngann njê-bbeje ta kuka lambo ang.

²⁷ A ta karə jula wungu məde tə̂ ang a, aw baâ aw ila kii. Dɔngɔr kanji kə̂ a kɔrɛ̂ njaa ə-təəyn tɛɛ̂ a, â kinga kandə narɛ. Unn kandə narɛ le aw nɛ̂n arəde to lambo ləm ddəm ləi ddəm.»