Matiye 15 - Dɔnɔn kə̂ Siki: Tar kə̂ aw arə təbbə

Tar dɔ nɛ̂n-ji-bbeje tə̂

¹ Parijinyɛje kə njê-gərəje-Ndu inje Jerujalɛm ddeeje rɔ Jeju tə̂ ngaâ n̂-dujeje nan:

² «Mba ddi bba njê-njaje goi tə̂ aw mbətəje nɛ̂n-ji-bbeje lə kajejedede wa? Mba dawje ta kusa nɛ̂n a, n̂-tokoje jide ang.»

³ Jeju ilade tə̂ nan: «A sese, ə-ddaje nɛ̂n kə turu Ndu lə Lubba ang, a nɛ̂n-ji-bbeje ləse â aw ddaje mba ddi wa?

⁴ Mba Lubba pa nan: ‹Ə-wal bɔije kə kɔinje.› N̂-pa tɔ bbay nan: ‹Dəw kə̂ nanɛn kə bɔɛ̂je wase kɔɛ̂nje a, maji karə n̂-tɔlɛ̂.›

⁵ A sese ə-paje nan: ‹Dəw kə̂ pa arə bɔɛ̂je wase kɔɛ̂nje nan: Nɛ̂n kə̂ mâ kasə ta kumain nɛ̂n le m-ngəm dang mba Lubba›,

⁶ dəw le a kasə ta wal bɔɛ̂je wase kɔɛ̂nje le ang ngaa. Baann â aw tujuje nɛ̂n nɛ̂n lə Lubba mba nɛ̂n-ji-bbeje ləse.

⁷ See njê-ngəmje, Ejayi ila mbər tar lə Lubba nəənn dɔse tə̂ kə dɔgɔlɛ̂. N̂-pa nan:

⁸ ‹Dəwje nəənn aw waləmje tade tə̂ baa, a məde to dang səm.

⁹ Polo kə̂ daw polomje to polo kə̂ ture goto, mba nɛ̂nje kə̂ daw tɔjuje toje to nduje kə̂ dəwje baa â unnje.› »

Nɛ̂n kə̂ aw dda arə dəw ddee to nɛ̂n-yərəw

¹⁰ Goe tə̂ a, Jeju bbar dəwje kə̂ banya le ngaâ pa arəde nan: «Ooje tar ləm kə majɛ̂ ta ə-gərəje kandɛ̂!

¹¹ Nɛ̂n kə̂ aw andə ta dəw tə̂ â aw dda arə dəw ddee to nɛ̂n-yərəw ang. Nɛ̂n kə̂ aw tee ta dəw tə̂ â aw dda arə dəw ddee to nɛ̂n-yərəw.»

¹² Goe tə̂ a, njê-njaje goe tə̂ ddeeje rɔɛ̂ tə̂ paje arɛ̂je nan: «Tar kə̂ ə-pa le ti wur Parijinyɛje le nya le ə-gərə njaa wa?»

¹³ Jeju ilade tə̂ nan: «Kakə tɔyn kə̂ Bɔy kə̂ isi darâ â ula ang, dâ kɔru kə ngirɛ̂ baa.

¹⁴ Inyajede. N̂-toje to njê-kəm-tɔje kə̂ aw ilaje kakə ji njê-kəm-tɔje marədəje tə̂. Bbo nje-kəm-tɔ ila kakə ji nje-kəm-tɔ marɛ̂ tə̂ a, dede joo kəm dâ kosoje mə buwa tə̂.»

¹⁵ Piyɛr pa arə Jeju nan: «Ɔru gəl gusu-tar kə̂ ə-pa nəənn arəje joo.»

¹⁶ Jeju ilɛ̂ tə̂ nan: «Sese kara ə-gərəje nɛ̂n ang bbay wa?

¹⁷ Ə-gərəje to nɛ̂n tɔyn kə̂ andə ta dəw tə̂, aw məɛ̂ tə̂ ngaâ goe tə̂ a, tee kə muû ang wa?

¹⁸ A nɛ̂n kə̂ tee ta dəw tə̂ in bbəngəre tə̂. Nɛ̂ɛnn â aw dda arə dəw ddee to nɛ̂n-yərəw.

¹⁹ Mba kəjəje kə̂ maji ang aw inje bbəngərə dəw tə̂: Tɔl dəw, lo-to-majang, dda kaya, bboko, tar-naji kə̂ to kə dɔgɔlɛ̂ ang, nanɛn kə naan.

²⁰ Nɛ̂nje kə̂ baann â aw dda arə dəw ddee to nɛ̂n-yərəw. A toko ji ang a kusa nɛ̂n nɛ̂n aw dda arə dəw ddee to nɛ̂n-yərəw ang.»

Mə-kunn lə dɛnɛ̂n kə̂ to Jiipi ang

²¹ Jeju ɔtu lo tə̂ənn aw ər kə nangə tə̂ kə̂ Tir kə Sidɔn.

²² Marə dɛnɛ̂n kə̂ Kanaan, kə̂ in nangə tə̂ənn ddee rɔ Jeju tə̂ uru əkii nan: «Əbbə-dəwje, ngonn lə Dabbiti, oo kəm-to-ndoo ləm! Ndil kə̂ maji ang aw ula kəm Ngonnəm kə̂ dɛnɛ̂n ndoo tə̂ nya.»

²³ A Jeju le ilɛ̂ tar tə̂ ang. Njê-njaje goe tə̂ ddeeje rɔɛ̂ tə̂, paje nan: «Ə-tubba dɛnɛ̂n nəənn kə ddang, mba naw nuru əkii naw ndole nɛ̂n goje.»

²⁴ A Jeju ilade tə̂ nan: «Ngann Ijarayɛlje kə̂ toje tokə ngann batəje kə̂ naynje kɔrɔ̂ â Lubba ulam mbade a bbayɛ̂.»

²⁵ A dɛnɛ̂n le ddee ɔsu məkəjə-gɔlɛ̂ nangə̂ nɔn Jeju tə̂, pa nan: «Əbbə-dəwje, umanʼm!»

²⁶ Nilɛ̂ tə̂ nan: «Maji ta kunn nɛ̂n-kusa lə ngannje kila karə bisije ang.»

²⁷ Dɛnɛ̂n le ilɛ̂ tə̂ nan: «Ye njaann, Əbbə-dəwje! A bisije aw usaje buru nɛ̂n-kusaje kə̂ aw gaynje kɔ tabələ tə̂ lə əbbədede tɔ.»

²⁸ Yeenn ngaâ Jeju pa arɛ̂ nan: «Dɛnɛ̂n, mə-kunn ləi bo nya. Maji karə Lubba ari nɛ̂n kə̂ aw duju le.» A kar tə̂ənn njaa ngonnɛ̂ kə̂ dɛnɛ̂n le aji.

Jeju aji njê-rɔ-toje dang dang

²⁹ Goe tə̂ a, Jeju ɔtu lo tə̂ənn aw kar tɔkə dangə tə̂ kə̂ Galile. Naw naal marə ddingiri nisi tə̂.

³⁰ Dəwje kə̂ banya ddeeje rɔɛ̂ tə̂ kə njê-mətəje, njê-gɔl-gotoje, njê-kəm-tɔje, dəwje kə̂ mbide utu ddəm tade utu ddəm kə marə njê-rɔ-toje nya nya. Dungude nɔn Jeju tə̂ ngaâ najide.

³¹ Dəwje kə̂ banya le ooje njê-mətəje kə̂ mətə ləde le goto, nje-gɔl-gotoje kə̂ gɔlde ddee maji, njê-kəm-tɔje kə̂ ooje lo kə dəwje kə̂ mbide utu ddəm tade utu ddəm kə̂ aw paje tar le a, dɔde ayn ngaâ dɔsuje gaji Lubba lə Ijarayɛl.

Jeju arə nɛ̂n-kusa dəwje doro sɔ

³² Jeju bbar njê-njaje goe tə̂ pa arəde nan: «Dəwje kə̂ banya nəənn ddamje ndoo, mba ndɔ mota njaa ngaa kə̂ n̂-naynje səm lo tə̂ nəənn, a dingaje nɛ̂n-kusa ang. M-ndiki ta tubbade karə n̂-təlje məde bbo baa ang, mba dâ kosoje labbə kə ddəw.»

³³ Njê-njaje go Jeju tə̂ paje arɛ̂je nan: «Lo kə̂ dda bba mə kɔr tə̂ nəənn, ja kinga nɛ̂n-kusa tə̂ tokə bo karə dəwje kə̂ banya nəənn usa arə məde ndann wa?»

³⁴ Jeju dujude nan: «Mapa baânn â to jise tə̂ wa?» Dilɛ̂je tə̂ nan: «Mapa siri kə marə ngann kanjije tɔ.»

³⁵ Yeenn ngaâ Jeju duju dəwje kə̂ banya le karə disije nangə̂.

³⁶ N̂-jin mapa kə̂ siri kə kanjije le, narə wooyo Lubba ngaâ n̂-tətə narə njê-njaje goe tə̂ ngaâ njê-njaje goe tə̂ arəje dəwje kə̂ banya le.

³⁷ Dede tɔyn dusaje nɛ̂n darə asəde ngaâ n̂-mbɔnje kəse kə̂ nayn ddusu karɛ siri.

³⁸ Kɔr dəwje kə̂ usaje nɛ̂n le doro sɔ, dɛnɛ̂nje kə ngannje n̂-turade ang.

³⁹ Goe tə̂ a, Jeju tubba dəwje kə̂ banya le arə dɔtuje, a naal tɔkə to naw nangə tə̂ kə̂ Magadan.