Marke 5 - Dɔnɔn kə̂ Siki: Tar kə̂ aw arə təbbə

Jeju tubba Ndil kə̂ maji ang rɔ marə dəw tə̂

¹ Jeju kə njê-njaje goe tə̂ n̂-teeje tura dangə tə̂ kə̂ Galile, nangə tə̂ kə̂ Gadara.

² Jeju in mə tɔkə to tə̂ le uru nangə̂ be a, kəm naan tə̂ nəənn, marə dingaw kə̂ ndilje kə̂ maji ang isi məɛ̂ tə̂ in dɔbarəje tə̂ tee ngaâ tila kəmɛ̂.

³ Dingaw le aw to dɔbarəje tə̂ le. Kula njamji njaa kara dəw a kasə ta tɔɛ̂ nɛ̂n ang.

⁴ Mba kə ndɔ tɔyn njaa bbo n̂-tɔɛ̂ kə kula njamji ngaâ dilɛ̂ kakə a, n̂-ti kula le, n̂-tətə kakə kə̂ dula gɔlɛ̂ məɛ tə̂ le. Dəw kə̂ singɛ̂ to ta kuwɛ̂ nɛ̂n kore nangə̂ karə n̂-to ddekeke goto.

⁵ Til kə kar naw nja dɔbarəje tə̂ kə dɔ ddingirije tə̂ naw nuru əkii ddəm naw njarɛ rɔɛ̂ kə ərje narə to do ddəm.

⁶ Noo Jeju ddəw əw a, nayn naw nɔsu məkəjə-gɔlɛ̂ nangə̂ nɔɛ̂n tə̂.

⁷ Nuru əkii kə taar nan: «Jeju Ngonn lə Lubba kə̂ isi ddutu dara tə̂ nu. Ddi â osoi tə̂ wa? M-wali nya kə ri Lubba, ula kəmʼm ndoo tə̂ ang.»

⁸ N̂-pa tar baann mba Jeju pa arɛ̂ nan: «Ndil kə̂ maji ang, ə-tee mə dingaw tə̂ nəənn kə ddang.»

⁹ Jeju duje nan: «Rii nan nân wa?» Nilɛ̂ tə̂ nan: «Rim nan banya banya», mba n̂-banyaje nya.

¹⁰ N̂-dda rɔɛ̂ to ndoo nɔn gɔl Jeju tə̂ nya karə tubbade nangə tə̂ənn kə ddang ang.

¹¹ Lo tə̂ənn, ngɔsi kə ddingirije le, kusu bərəje kə̂ banya aw usaje nɛ̂n.

¹² A ndilje kə̂ maji ang le ddaje rɔde to ndoo rɔ Jeju tə̂ nan: «Ulaje mə bərəje tə̂ toonn arə jandə məde tə̂.»

¹³ Jeju ndiki tə̂ kə de arə n̂-teeje mə dingaw tə̂ le daw dandəje mə bərəje tə̂ le. Bərəje le tɔyn kɔrde aw ngɔsi kə doro joo. Dinje kar kongo tə̂ kə ngɔru, n̂-gaynje mə ba-katə tə̂ le doyje.

¹⁴ Njê-ngəmje bərəje le aynje aw paje tarɛ̂ mə tɔkə bbe tə̂ le ddəm ngann bbeje tə̂ ddəm ngaâ dəwje ddeeje ta koo nɛ̂n kə̂ to le.

¹⁵ N̂-teeje rɔ Jeju tə̂ a, dooje dingaw kə̂ ndilje kə̂ maji ang tokə banya teeje məɛ̂ tə̂ kə ddang le. Nisi nangə̂. Kubbu to rɔɛ̂ tə̂ ngaâ kəjə laa təl to kə majɛ̂. Dede tɔyn bbəəl uta dɔde.

¹⁶ Dede kə̂ dooje nɛ̂ɛnn le dɔruje gəl nɛ̂n kə̂ inga dingaw le kə bərəje le darə dəwje le.

¹⁷ Yeenn ngaâ n̂-ddaje rɔde to ndoo rɔ Jeju tə̂ karə ɔtu nangə tə̂ ləde kə ddang.

¹⁸ Kar kə̂ Jeju aw aal tɔkə to a, dingaw kə̂ n̂-tubba ndilje kə̂ maji ang məɛ̂ tə̂ le dda rɔɛ̂ to ndoo nɔn gɔlɛ̂ tə̂ nan: «M-ndiki ta nayn səi.»

¹⁹ Jeju ndiki tə̂ ang ngaâ pa arɛ̂ nan: «Ə-təl kə̂y ləi rɔ nujuje tə̂ ləi ta ɔru gəl maji kə̂ Əbbə-dəwje dda səi ddəw mə-maji tə̂ laa le arəde.»

²⁰ Dingaw le aw ngaâ ila mbər nɛ̂nje tɔyn kə̂ Jeju dda saa le nangə tə̂ kə̂ tɔkə bbeje kə̂ dɔku toje tə̂. Dəwje tɔyn kə̂ ooje tar le, tar le gangə singade.

Jeju aji ngonn lə Jayirus kə marə dɛnɛ̂n

²¹ Jeju unn tɔkə to tura maann tə̂ le təl a, dəwje kə̂ banya ddee mbɔnje naan rɔɛ̂ tə̂ ta ba-katə tə̂.

²² Marə nje-kɔn dɔ kəy mbɔn-naan lə Jiipije ddee tee. Koo kə̂ noo Jeju a, n̂-tee noso nɔn gɔlɛ̂ tə̂,

²³ n̂-dda rɔɛ̂ to ndoo n̂-pa nan: «Ngonnəm kə̂ dɛnɛ̂n a ta koy. Ə-ddee ila jii dɔɛ̂ tə̂ arə naji ta n̂-nayn kəm baa.»

²⁴ Jeju ɔtu aw saa. Dəwje kə̂ banya ɔruje goe ngaâ aw ubbɛ̂je kə yo ddəm nəənn ddəm.

²⁵ Marə dɛnɛ̂n ee horo dəwje tə̂ənn le. Məsə aw ddee rɔɛ̂ tə̂ asə bbal dɔku gire joo.

²⁶ Noo ndoo nya ji njê-karəje kuman tə̂. Narɛ laa tunga tɔyn mbɛɛ̂. A nɛ̂n kə̂ maji kâra to goe tə̂ ang. Rɔ-to le aw aw kə kete kete.

²⁷ Dɛnɛ̂n le oo tam Jeju. Yeenn bba n̂-ddee nandə horo dəwje tə̂ le giri Jeju tə̂ ngaâ nɔru kubbu laa kə jia.

²⁸ Mba n̂-pa məɛ̂ tə̂ nan: «Bbo kubbu laa baa njaa bba mɔru a, mâ kaji.»

²⁹ Karɛ̂ tə̂ənn njaa, məsə kə̂ aw ddee rɔɛ̂ tə̂ le gangə ngaâ n̂-gərə to rɔ-to laa le goto.

³⁰ Njangə baa njaa, Jeju gərə to marə singa in rɔɛ̂ tə̂ tee. N̂-turu rɔɛ̂ dann dəwje tə̂ le ngaâ n̂-duju nan: «Nân bba ɔru kubbu ləm wa?»

³¹ Njê-njaje goe tə̂ ilɛ̂je tə̂ nan: «Oo dəwje kə̂ banya kə̂ aw ubbaije kə yo, ddəm nəənn ddəm kə majɛ̂ a, ə-təl ə-duju se nân bba ɔru kubbu ləi wa, tokə baânn wa?»

³² A Jeju ila kəmɛ̂ ta koo dəw kə̂ dda nɛ̂ɛnn le.

³³ Dɛnɛ̂n le gərə nɛ̂n kə̂ ingɛ̂ le ngaâ n̂-bbəəl arə naw nisa. N̂-ddee noso nɔn gɔl Jeju tə̂ le, n̂-pa tar kə̂ tɔkɔrɔ narɛ̂.

³⁴ Jeju pa arɛ̂ nan: «Ngonnəm, mə-kunn ləi ajii. Aw kə mə-wul-lɔm kə rɔ kə̂ maji.»

³⁵ Kar kə̂ n̂-nayn naw pa tar bbay a, marə dəwje inje kəy lə Jayirus le ddee paje arɛ̂je nan: «Ngonni le oy mban, a aw jɔku nje-nɛ̂n-tɔju le bbay mba ddi wa?»

³⁶ A Jeju aa lo kə tar tə̂ ləde le ang ngaâ pa arə Jayirus le nan: «Ə-bbəəl ang. Məi njaa unn arəm a, bbayɛ̂.»

³⁷ Piyɛr kə Jakə de kə ngokɔɛ̂n Jan â narə dannɛ̂je a bbayɛ̂, bbo marə dəw dang ang.

³⁸ N̂-teeje kəy lə Jayirus le a, Jeju oo dəwje kə̂ aw ddaje rɔde, aw nɔnje aw ndingaje nɛ̂n rɔde nya nya.

³⁹ Nandə kəy ngaâ n̂-pa narəde nan: «Aw ddaje rɔse ngaâ aw nɔnje mba ddi wa? Ngonn le oy ang, bbi â naw tibbi.»

⁴⁰ A dəwje le kokeje. Yeenn ngaâ narə dede tɔyn n̂-teeje ddaka, a bɔ ngonnje le kə kɔn ngonnje le kə dəwje kə̂ dannɛ̂je le â narə dandəje saa lo tə̂ kə̂ dila ngonn le tə̂.

⁴¹ Nuwa ji ngonn le, n̂-pa narɛ̂ nan: «Talita kum.» Kandə tar le nan: «Ngonn kə̂ dɛnɛ̂n, m-pa mari, in taar.»

⁴² Njangə baa njaa, ngonn kə̂ dɛnɛ̂n le in taar aw nja. Bbalɛ̂ dɔku gire joo. Nɛ̂n le dum dɔ dəwje tɔyn kə̂ arje lo tə̂ənn le.

⁴³ A Jeju ndɔru mbide nya karə n̂-paje tarɛ̂ darə dəw oo ang. Goe tə̂ a, n̂-pa narəde nan: «Arɛ̂je nɛ̂n nusa.»