Marke 3 - Dɔnɔn kə̂ Siki: Tar kə̂ aw arə təbbə

Jeju aji marə dingaw kə̂ jia oy

¹ Jeju təl aw kəy mbɔn-naan tə̂ lə Jiipije. A marə dingaw kə̂ jia oy ee kəy-mbɔ-naan tə̂ le.

² A Parijinyɛje kə̂ eeje tə̂ənn aw ɛɛ̂je ta koo se nâ kaji dingaw le ndɔ-kuwa-rɔ tə̂ wa? Mba n̂-ndikije ta kunda tar dɔɛ̂ tə̂.

³ Jeju pa arə dəw kə̂ jia oy le nan: «In ar dannâ nəənn!»

⁴ Goe tə̂ a, n̂-duju dəwje le nan: «Ndu arə ddəw ta dda maji ndɔ-kuwa-rɔ tə̂ wase ta dda maji ang wa? Ta kaji dəw wase ta kinyɛ̂ karə noy wa?» A dəwje le ndikije ta kilɛ̂ tar tə̂ le ang.

⁵ Jeju aade tɔyn kə wungu. Rɔɛ̂ nəəle ang mba dəwje ddaje arə məde kətərə. Yeenn ngaâ n̂-pa narə dəw le nan: «Ə-ndɔju jii.» Dəw le ndɔju jia ngaâ jia le təl ddee maji.

⁶ Parijinyɛje le inje kəy mbɔn-naan tə̂ le teeje be a, uwaje dɔ naan kə dəwje kə̂ mə mbɔn-naan tə̂ lə Erodə ta koo ddəw kə̂ ta tɔl nɛ̂n Jeju.

Dəwje kə̂ banya ddeeje ingaje Jeju

⁷ Jeju kə njê-njaje goe tə̂ dɔruje rɔde dawje kar dangə tə̂ kə̂ Galile a, dəwje tokə banya ɔruje goe. Dəwje le inje Galile kə Jude,

⁸ Jerujalɛm kə nangə tə̂ kə̂ Idume. Dinje nangə tə̂ kə̂ tura Jurdɛn tə̂ kə bbeje tə̂ kə̂ toje mbɔr Tir tə̂ kə Sidɔn tə̂ tɔ. N̂-ddeeje tokə banya rɔ Jeju tə̂ mba dooje tar nɛ̂nje tɔyn kə̂ Jeju aw dda.

⁹ Yeenn a, Jeju duju njê-njaje goe tə̂ karə dundaje marə tɔkə to ngɔsi darɛ̂je, mba karə dəwje kə̂ banya le ubbɛ̂je ang.

¹⁰ Mba Jeju aw aji njê-rɔ-toje nya arə dəwje tɔyn kə̂ rɔde tode aw awje kə dɔɛ̂ tə̂ dɔɛ̂ tə̂ ta kɔrɛ̂ kə jide.

¹¹ Njê kə̂ ndilje kə̂ maji ang aw ddade ooeje a, n̂-teeje dosoje nangə̂ nɔn gɔlɛ̂ tə̂ ngaâ duruje əkii nan: «Ə-to Ngonn lə Lubba.»

¹² A Jeju ndɔru mbi dəwje le nya karə n̂-paje darə dəwje gəreje ang.

Jeju mbərə njê-kaw-kulaje kə̂ dɔku gire joo

¹³ Goe tə̂ a, Jeju aal marə ddingiri ngaâ bbar dəwje kə̂ məɛ̂ ndikide arə dawje rɔɛ̂ tə̂.

¹⁴ N̂-mbərə marɛ̂je dɔku gire joo, nunda ride to njê-kaw-kulaje karə n̂-naynje saa ddəm karə nulade narə daw dilaje mbər Tar kə̂ Maji ddəm.

¹⁵ Narəde singa kə̂ ta tubba nɛ̂n ndilje kə̂ maji ang.

¹⁶ Dəwje kə̂ dɔku gire joo kə̂ n̂-mbərəde le to: Simɔn kə̂ Jeju unda ria nan Piyɛr,

¹⁷ Jakə de kə ngokɔɛ̂n Jan kə̂ n̂-toje to ngann lə Jebede. Jeju unda ride nan Bowanɛrjesə, gəle nan: «Dingawje kə̂ toje tokə lə ndi kə̂ aw ndangə.»

¹⁸ Andere kə Pilipi, Bartelemi kə Matiye, Toma kə Jakə ngonn lə Alpe, Tade kə Simɔn kə̂ daw bbarɛ̂ nan «Dəw kə̂ ndiki bbe laa nya»,

¹⁹ kə Judas Iskariyotə nje-kunn dɔ Jeju.

Njê-nujuje lə Jeju ndikije ta kɔrɛ̂ kɔtuje saa

²⁰ Jeju təl kə̂y ngaâ dəwje tokə banya təlje mbɔnje naan arə nɛ̂n-kusa njaa kara ne kə njê-njaje goe tə̂ dingaje ddəw ta kusa ang.

²¹ Njê-nujuje laa ooje tarɛ̂ ngaâ ddeeje ta kuwɛ̂ kaw saa mba n̂-paje nan: «Dɔ Jeju turu.»

Jeju ila tar tə̂ lə dəwje kə̂ undaje tar dɔɛ̂ tə̂

²² Njê-gərəje-Ndu kə̂ inje Jerujalɛm paje nan: «Bɛljebul isi məɛ̂ tə̂.» N̂-paje bbay nan: «Mbay lə ndilje kə̂ maji ang â arɛ̂ singa tubba nɛ̂n ndilje kə̂ maji ang.»

²³ Yeenn ngaâ Jeju bbarde ngaâ unn marə nɛ̂n-kɔju-marɛ̂ pa nɛ̂n tar arəde nan: «Satan a kasə tubba Satan tokə baânn wa?

²⁴ Bbo dəwje kə̂ mə marə bbe-kɔn tə̂ tinje naan a, bbe-kɔn le a kasə nayn ang.

²⁵ Ngaâ bbo dəwje kə̂ mə marə nuju tə̂ tinje naan a, nuju le a kasə nayn ang.

²⁶ A bbo Satan aw dda ddɔ kə da-rɔɛ̂ njaa a, yeenn pa nan n̂-tin kə da-rɔɛ̂ njaa arə nâ kasə nayn ang, laa a goto ngaa.»

²⁷ «Dəw a kasə kandə mə kəy tə̂ lə nje-singa ta koto nɛ̂n-kingaje laa njaa baann ang. Maji karə nuwɛ̂ n̂-tɔɛ̂ bba. A bbo n̂-tɔɛ̂ a, nâ kasə ta koto nɛ̂nje tɔyn kə̂ to mə kəy tə̂ laa.

²⁸ «Tɔkɔrɔ njaa m-pa marəse: Lubba a kɔru tar majangje kə tar nɛ̂n-tajije tɔyn kə̂ dəwje tajɛ̂je dɔde tə̂ kə ddang.

²⁹ A dəw kə̂ taji Ndil-mə-nda, tar a kɔru dɔɛ̂ tə̂ ndɔ kâra ang. Mba tar majang kə̂ to kə ndɔ kə ndɔ to dɔɛ̂ tə̂ mban.»

³⁰ Jeju pa tar kə de tokə baann mba n̂-paje nan: «Ndil kə̂ maji ang isi məɛ̂ tə̂.»

Kɔn Jejuje kə ngakɔɛ̂nje kə̂ tɔkɔrɔ

³¹ Goe tə̂ a, kɔn Jejuje kə ngakɔɛ̂nje n̂-ddeeje darje ddaka ngaâ dulaje dəw karə bbarɛ̂.

³² Dəwje tokə banya isije mbɔr Jeju tə̂ le ngaâ paje arɛ̂ nan: «Kɔinje kə ngakɔin kə̂ dingaw kə ngakɔin kə̂ dɛnɛ̂n deeje ddaka, daw sangije.»

³³ Jeju ila tə̂ nan: «Nân bba to kɔnʼmje ngaâ njê kə̂ dda bba toje to ngakɔnʼm wa?»

³⁴ Goe tə̂ a, naa dəwje kə̂ isije gukeje le ngaâ n̂-pa nan: «Ooje, kɔnʼmje kə ngakɔnʼm â isije nəənn.

³⁵ Mba dəw kə̂ dda nɛ̂n kə̂ mə Lubba ndiki â to ngokɔnʼm, to kɔn-nannəm ngaâ to kɔnʼmje.»