Marke 16 - Dɔnɔn kə̂ Siki: Tar kə̂ aw arə təbbə

Jeju kə̂ oy le ndol

¹ Kar kə̂ ndɔ-kuwa-rɔ lə Jiipije nday a, Mari kə̂ Magədala kə Salome kə Mari kɔn Jakəje, n̂-ndokoje yamboje ta kaw kungu dɔ niinn Jeju tə̂.

² Kə əndɔɔ baa njaa, ndɔ-kuwa-rɔ tə̂ kə̂ kar aw tee a, dawje buwa-yo tə̂ le.

³ N̂-dujuje naan nan: «Nân njaa bba a ndubbu tɔkə ər kə̂ dutu nɛ̂n ta buwa-yo le kə ddang karəje wa?»

⁴ Kunn kə̂ dunnje kəmde daaje lo a, tɔkə ər le tokə ndubbu mban.

⁵ Yeenn ngaâ dandəje buwa-yo tə̂ le. A dooje marə basan ula kubbu kə̂ ngal kə̂ nda kə̂ isi nangə̂ ər kɔl, a bbəəl uta dɔde.

⁶ A basan le pa arəde nan: «Ə-bbəəlje ang. Aw ə-sangəje Jeju kə̂ Najarɛtə kə̂ n̂-tɔlɛ̂ kakə-dəsə tə̂ le wa? N̂-ndol mban, nee nəənn ang. Lo kə̂ dilɛ̂ tə̂ le â nəənn.

⁷ Awje aw paje arəje Piyɛr kə kəsə njê-njaje goe tə̂, ə-paje nan: ‹Nâ nginanse Galile. Lo kə̂ nunn â, â kooeje tə̂ tokə n̂-pa narəse le.› »

⁸ Yeenn ngaâ dinje buwa-yo tə̂ le n̂-teeje ddaka ngaâ daynje dawje ddəw əw mba daw disaje kə bbəəl, n̂-gərəje nɛ̂n kə̂ ta dda ang. N̂-paje tar kâra darə dəw ang mba bbəəl uta dɔde. [

Jeju tee inga Mari kə̂ Magədala

⁹ Go ndol tə̂ kə̂ Jeju ndol ndɔ-kuwa-rɔ tə̂ kə əndɔɔ baa le a, n̂-tɔju rɔɛ̂ dɔngɔr narə Mari kə̂ Magədala kə̂ n̂-tubba ndilje kə̂ maji ang siri məɛ̂ tə̂ le.

¹⁰ Mari le aw pa tarɛ̂ arə dəwje kə̂ aw njaje kə Jeju, kar tə̂ kə̂ daw ndingaje ndoo ddəm daw nɔnje ddəm le.

¹¹ A koo kə̂ dooje tar lə Mari kə̂ pa nan Jeju nayn kəm baa ngaâ nooe le a, n̂-ndikije tə̂ saa ang.

Jeju tee inga njê-njaje goe tə̂ joo

¹² Goe tə̂ a, Jeju unn marə da-rɔ kə̂ dang bba tɔju nɛ̂n rɔɛ̂ arə njê-njaje goe tə̂ joo kə̂ aw awje kə ngonn bbe tə̂.

¹³ N̂-təlje n̂-ddeeje, n̂-paje tarɛ̂ darə kəseje. A dede kara n̂-ndikije tə̂ kə de ang tɔ.

Jeju tee inga njê-njaje goe tə̂ kə̂ dɔku gire kâra

¹⁴ Dɔbɔnyɛ̂ a, n̂-tɔju rɔɛ̂ narə njê-njaje goe tə̂ kə̂ dɔku gire kâra, kə̂ aw usaje nɛ̂n ngaâ n̂-kɔl kə de mba mə-kunn ləde kə̂ goto ddəm mba mə-kətərə ləde ddəm mba n̂-ndikije tə̂ kə dəwje kə̂ ooeje go ndol tə̂ kə̂ n̂-ndol le ang.

¹⁵ N̂-pa narəde nan: «Awje dɔ nangə tə̂ tɔyn, ilaje mbər Tar kə̂ Maji le arəje dəwje tɔyn.

¹⁶ Dəw kə̂ unn məɛ̂ ngaâ inga batɛm a, a kinga kaji. Dəw kə̂ unn məɛ̂ ang a, sariya to dɔɛ̂ tə̂.

¹⁷ Nɛ̂n kə̂ dâ gərə nɛ̂n dəwje kə̂ a kooje məde tə̂ â nəənn: Dâ tubbaje ndilje kə̂ maji ang kə rim, dâ paje ndɔn-tarje kə̂ siki.

¹⁸ Dâ kuwaje lije kə jide. Bbo dayje marə nɛ̂n kə̂ aw tɔl dəw a, nɛ̂n kâra a ddade ang. Dilaje jide dɔ njê-rɔ-toje tə̂ a, njê-rɔ-toje le a kajije.»

Jeju təl rɔ Lubba tə̂

¹⁹ Go tar tə̂ kə̂ Əbbə-dəwje Jeju pa arəde tokə baann a, Lubba unnɛ̂ aw saa darâ ngaâ nisi dɔ ji-kɔlɛ̂ tə̂.

²⁰ Njê-njaje go Jeju tə̂ aw ilaje mbər tar le loje tə̂ tɔyn. Əbbə-dəwje dda kula kə de arə n̂-ddaje nɛ̂n-mɔrije kə̂ tɔju to tar kə̂ daw dilaje mbəre le to tar kə̂ tɔkɔrɔ.]