Marke 15 - Dɔnɔn kə̂ Siki: Tar kə̂ aw arə təbbə

Daw kə Jeju rɔ Pilatə tə̂

¹ Kə əsindɔɔ baa njaa, mbayje lə njê-poloje Lubba mbɔnje naan kə tɔkəje lə Jiipije, njê-gərəje-Ndu kə kəsə njê-gangəje sariya tɔyn ta koo nɛ̂n kə̂ ta dda. Darə n̂-tɔ Jeju ngaâ daw saa nɔn gɔl Pilatə tə̂.

² Pilatə duju Jeju nan: «Ə-to mbay lə Jiipije wa?» Jeju le ilɛ̂ tə̂ nan: «Əi njaa ə-pa mban.»

³ Mbayje lə njê-poloje Lubba undaje tarje nya dɔ Jeju tə̂.

⁴ Pilatə təl duje bbay nan: «Ila tar tə̂ kâra ang wa? Oo tarje tɔyn kə̂ dəwje nəənn ulaje tai tə̂ nəənn.»

⁵ A Jeju ila tar tə̂ kâra ang arə dum dɔ Pilatə.

N̂-gangə sariya-yo dɔ Jeju tə̂

⁶ Kə ndɔ kusu Pakə kâra kâra tɔyn, ngonn mbay le aw ɔru dəw kâra kəy-kula tə̂. Dəw kə̂ dəwje kə̂ banya ndikije karə nɔrɛ̂ bba naw nɔrɛ̂.

⁷ A marə dəw kə̂ ria nan Barabas ee kəy-kula tə̂, ne de kə marə dəwje kə̂ tɔlje dəw dɔ ndɔ tə̂ kə̂ n̂-ddaje nɛ̂n dɔ-ngəng kə njê-kɔn-bbeje.

⁸ Dəwje kə̂ banya awje kəy lə Pilatə ngaâ dujeje karə n̂-dda nɛ̂n kə̂ naw dda kə bbal kâra kâra le narəde.

⁹ Pilatə ilade tə̂ nan: «Ə-ndikije karə minya mbay lə Jiipije le marəse wa?»

¹⁰ Mba Pilatə gərə kə majɛ̂ to mə â mbayje lə njê-poloje Lubba undaje kə Jeju bba uwɛ̂je ulɛ̂je jia tə̂ nəənn.

¹¹ A mbayje lə njê-poloje Lubba le ɔsuje kutu dəwje kə̂ banya karə dujuje Pilatə arə Barabas â ninyɛ̂ narəde.

¹² Pilatə təl dujude bbay nan: «Yeenn a, ddi â ə-ndikije karə m-dda kə dəw kə̂ aw bbarɛ̂je to mbay lə Jiipije le wa?»

¹³ N̂-təlje duruje əkii nan: «Ə-tɔlɛ̂ kakə-dəsə tə̂.»

¹⁴ Pilatə dujude nan: «Ddi kə̂ maji ang â n̂-dda wa?» A n̂-təlje duruje əkii darə ngəng nan: «Ə-tɔlɛ̂ kakə-dəsə tə̂.»

¹⁵ Pilatə ndiki ta dda karə rɔ dəwje kə̂ banya le nəəlde. Yeenn bba nɔru Barabas kəy-kula tə̂ narəde. Narə n̂-tunda Jeju kə ndəy a nulɛ̂ ji mbambaje tə̂ karə n̂-tɔlɛ̂ kakə-dəsə tə̂.

Mbambaje kokoje Jeju

¹⁶ Mbambaje awje kə Jeju mə kəy tə̂ lə ngonn mbay le ngaâ bbarje kəsə mbambaje tɔyn.

¹⁷ Dulɛ̂je kubbu kə̂ kasɛ. Goe tə̂ a, n̂-peteje kula kə̂ to konn to əjɔkudɔ dundaje dɔɛ̂ tə̂.

¹⁸ Goe tə̂ a, n̂-ddɛɛ̂je lapiya n̂-paje nan: «Lapiya, tɔkə mbay lə Jiipije.»

¹⁹ N̂-tundaje dɔɛ̂ kə kârə mu, n̂-tije wənrə dɔɛ̂ tə̂ ngaâ dɔsu məkəjə-gɔlde nangə̂, dulaje dɔde ndərəng darə ɔsu nangə nɔɛ̂n tə̂.

²⁰ Dɔjɛ̂je n̂-kokoje nɛ̂n n̂-tunga a, duwaje kubbu kə̂ kasɛ kə̂ rɔɛ̂ tə̂ le dɔruje ngaâ n̂-təlje dulɛ̂je kubbuje laa. Goe tə̂ a, n̂-teeje saa mə bbe tə̂ le kə ddang dawje ta kaw tɔlɛ̂ kakə-dəsə tə̂.

N̂-tɔl Jeju dɔ kakə-dəsə tə̂

²¹ Duwaje marə dingaw kə̂ in ndɔɔ̂ aw nday darə oto kakə-dəsə lə Jeju le. Ri dingaw le nan Simɔn, n̂-to dəw kə̂ bbe tə̂ kə̂ Sirɛnn, n̂-to bɔ Alɛkəjandərəje kə Rupusje.

²² Dawje kə Jeju le marə lo tə̂ kə̂ daw bbar nan Gɔlogota. Kandə ri le nan «lo ka-dɔ-dəw je.»

²³ Darɛ̂je bɛn kə̂ dungu nɛ̂n kə̂ maji ang məɛ tə̂ karə nay, a n̂-mbətə ta kay.

²⁴ N̂-bbəreje kakə-dəsə tə̂ le ngaâ n̂-ddɔje mbari n̂-kaynje nɛ̂n naan kubbuje laa.

²⁵ N̂-bbəre kakə-dəsə tə̂ kə kar jikara kə̂ kə əndɔɔ.

²⁶ N̂-dda marə makəturu n̂-bbərə ər dɔɛ̂ tə̂ ta tɔju nɛ̂n gəl nɛ̂n kə̂ n̂-gangə nɛ̂n sariya dɔɛ̂ tə̂ le nan: «Dəw nəənn to mbay lə Jiipije.»

²⁷ N̂-bbərəje njê-bbokoje joo kakə-dəsəje tə̂ mbɔrɛ̂ tə̂ tɔ. Marɛ̂ kâra ər kɔl, a marɛ̂ kâra ər gəl. [

²⁸ Yeenn bba, tar kə̂ n̂-dda Makəturu tə̂ lə Lubba ddee to tar kə̂ tɔkɔrɔ. Tar le nan: «Dilɛ̂ horo njê-tɔl dəwje tə̂.»]

²⁹ Dəwje kə̂ aw ndayje lo tə̂ənn tukaje dɔde tajɛ̂je nɛ̂n. N̂-paje darɛ̂je nan: «Əi kə̂ ə-ndiki ta tɔ kəy-polo Lubba ta təl dda marɛ̂ ture tə̂ mə ndɔ mota tə̂ le.

³⁰ Əi njaa aji rɔi bbo in dɔ kakə-dəsə tə̂ le uru nangə̂.»

³¹ Mbayje lə njê-poloje Lubba kə njê-gərəje-Ndu kara aw kokoje Jeju, n̂-paje horo naan tə̂ tɔ nan: «Naji marə dəwje, a nasə kaji da-rɔɛ̂ njaa ang!

³² Maji karə ne kə̂ n̂-to Kristə, tɔkə mbay kə̂ Ijarayɛl le n̂-ddisi dɔ kakə-dəsə tə̂ nuru nangə̂. Yeenn bba joo a, ja kunn məje karɛ̂.» Dəwje kə̂ n̂-bbərəde dɔ kakə-dəsə tə̂ mbɔrɛ̂ tə̂ le kara aw tajɛ̂je tɔ.

Koy lə Jeju

³³ Gɔl kar dɔku gire joo a, lo ndul dɔ nangə tə̂ le tɔyn ndərəng gɔl kar mota kə̂ lo-kul tə̂.

³⁴ A ta tee gɔl kar tə̂ kə̂ mota a, Jeju uru əkii kə singa nan: «Ɛloyi, Ɛloyi, laman sabakatani!» Kandə tar le nan: «Lubba ləm, Lubba ləm, mba ddi bba ə-tusum inyam wa?»

³⁵ Marə dəwje kə̂ eeje lo tə̂ənn le ooje tar le a, n̂-paje nan: «Ooje, naw bbar Eli.»

³⁶ Marə dəw kâra horode tə̂ ayn kə ngɔru aw unn marə ta-kubbu ula mə maann-binyə tə̂ kə̂ masə ngaâ n̂-kə ta kârə mu tə̂ ula arə Jeju karə ay ngaâ pa nan: «Inyaje, ja koo se Eli a ddee kɔrɛ̂ dɔ kakə-dəsə tə̂ kilɛ̂ nangə̂ wa!»

³⁷ A Jeju uru əkii kə singa ngaâ oy.

³⁸ Yeenn ngaâ kubbu kə̂ n̂-tɔ n̂-gangə nɛ̂n mə kəy-polo Lubba tiir dannâ joo, in taar uru bəər.

³⁹ Nje-kɔn dɔ mbambaje kə̂ Rɔm kə̂ ar nɔn Jeju tə̂ le oo gusu kə̂ Jeju oy nɛ̂n le a, n̂-pa nan: «Dəw nəənn to Ngonn lə Lubba njaa.»

⁴⁰ Marə dɛnɛ̂nje eeje tə̂ənn tɔ, darje ddəw əw daw daaje lo. Mari kə̂ Magədala de kə Mari kɔn Jakə kə Jojeje kə Salome deeje horode tə̂.

⁴¹ Ləw dɛnɛ̂njeenn le njaje go Jeju tə̂ ngaâ ddaje saa kar tə̂ kə̂ n̂-nayn nɛ̂n Galile. Dɛnɛ̂nje tokə banya kə̂ awje saa Jerujalɛm eeje tə̂ənn tɔ.

Jojɛpə dubbu Jeju

⁴² Ndɔɛ̂ le to ndɔ gɔl rɔ nginan nɛ̂n ndɔ-kuwa-rɔ lə Jiipije ngaâ dɔ lo-kul ngaa.

⁴³ Jojɛpə kə̂ Arimate ddee tee. N̂-to marə tɔkə kâra horo marɛ̂je tə̂ kə̂ aw isije tɔkə lo gangə sariya tə̂ lə Jiipije. Ne kara naw nginan kɔn-mbay lə Lubba. N̂-tɔn bire to dingaw naw duju Pilatə karə arɛ̂ niinn Jeju le.

⁴⁴ Pilatə oo nan Jeju le oy mban a, dum dɔɛ̂. Yeenn ngaâ nula n̂-bbar tɔkə mbamba lə dəwje kə̂ Rɔm, n̂-duje se Jeju le oy ləw baa wa?

⁴⁵ Tɔkə mbamba kə̂ Rɔm le pa tar yo le arɛ̂. Yeenn ngaâ narə ddəw Jojɛpə karə unn niinn le.

⁴⁶ Jojɛpə le ndoko tɔkə bəl-kubbu kə̂ nda. Nɔru niinn le dɔ kakə-dəsə tə̂, n̂-kə kə tɔkə bəl le ngaâ nila mə buwa-yo tə̂ kə̂ narə duru mə ər tə̂. Goe tə̂ a, n̂-ndubbu marə ər nutu nɛ̂n ta buwa-yo le.

⁴⁷ Mari kə̂ Magədala de kə Mari kɔn Jojeje daw daaje lo kə̂ dila niinn le tə̂.