Marke 14 - Dɔnɔn kə̂ Siki: Tar kə̂ aw arə təbbə

Njê-kɔn dɔ Jiipije ndikije ta tɔl Jeju

¹ Kusu Pakə kə kusu mapa kə̂ n̂-dda kə wum ang naynje ndɔ joo baa. A mbayje lə njê-poloje Lubba kə njê-gərəje-Ndu aw sangəje ddəw kə̂ ta kuwa nɛ̂n Jeju kə gusu tɔlɛ̂.

² Mba n̂-paje nan: «Maji karə juwɛ̂je ndɔ kusu tə̂ ang mba a kuju bula.»

Marə dɛnɛ̂n ungu yambo dɔ Jeju tə̂

³ Jeju ee Betani mə kəy tə̂ lə Simɔn kə̂ to nje-banji. Kar tə̂ kə̂ naw nusa nɛ̂n a, marə dɛnɛ̂n ddee kə yambo kə̂ gatɛ̂ ngəng mə ku albatərə tə̂. Nunda ta ku le n̂-tɔ ngaâ nungu yambo le dɔ Jeju tə̂.

⁴ Rɔ marə dəwje kə̂ eeje tə̂ənn nəəlde ang ngaâ n̂-paje horode tə̂ nan: «N̂-tuju yambo nəənn baann mba ddi wa?

⁵ Asə ta labbə yambo nəənn kandə narɛ kɔr mota kayn narɛ̂ njê-ndooje ang wa?» N̂-paje tar lə dɛnɛ̂n le maji ang.

⁶ A Jeju pa arəde nan: «Inyɛ̂je ddekeke! Aw jɔkɛ̂je mba ddi wa? Nɛ̂n kə̂ n̂-dda səm nəənn to nɛ̂n kə̂ maji.

⁷ Njê-ndooje a naynje kə se nəənn kə ndɔ tɔyn. Ndɔ kə̂ məse ndiki a, â ddaje kə de maji. A əman, mâ nayn kə se kə ndɔ tɔyn ang.

⁸ Nɛ̂n kə̂ nasə ta dda â n̂-dda. Nungu yambo rɔm tə̂ kete mba nginan nɛ̂n ndɔ kə̂ dâ dubbum nɛ̂n.

⁹ Tɔkɔrɔ njaa, m-pa marəse, lo tɔyn kə̂ dâ kila mbər Tar kə̂ Maji nəənn kə tə̂, duninya tə̂ tɔyn, dâ pa tar nɛ̂n kə̂ dɛnɛ̂n nəənn dda ngaâ dəwje a koleje məde dɔɛ̂ tə̂».

Judas ndiki ta kila Jeju ji dəwje tə̂

¹⁰ Judas Iskariyotə kə̂ to marə nje-nja go Jeju tə̂ horo marɛ̂je tə̂ kə̂ dɔku gire joo aw rɔ mbayje lə njê-poloje Lubba tə̂ ta kila Jeju jide tə̂.

¹¹ Dooje tar laa le a, rɔde nəəlde nya ngaâ dunnje ndude ta karɛ̂ narɛ. Yeenn ngaâ Judas unn kutu sangə ddəw kə̂ maji kə̂ nan kila nɛ̂n Jeju jide tə̂.

Jeju arə n̂-dda muru Pakə

¹² Dɔngɔr ndɔ kusu mapa kə̂ n̂-dda kə wum ang kə̂ to ndɔ kə̂ daw tɔl nɛ̂n ngann batəje mba dda nɛ̂n muru Pakə a, njê-njaje go Jeju tə̂ dujeje nan: «Lo kə̂ dda bba ə-ndiki karə jaw dda muru Pakə kə tə̂ jari wa?»

¹³ Jeju ula njê-njaje goe tə̂ joo kete nan: «Awje tɔkə bbe tə̂ a, â kingaje marə dingaw kə̂ oto jo-maann. Unnje goe.

¹⁴ Kəy kə̂ nandə tə̂ a, ə-paje arəje nje-kəy le nan: ‹Nje-nɛ̂n-tɔju duju nan: Lo kə̂ dda â əman kə njê-njaje gom tə̂ ja kɔn muru Pakə kə tə̂ wa?›

¹⁵ Nje-kəy le a tɔjuse marə lo kə̂ tatə kə̂ n̂-gɔl tokə kete mban dɔ kəy tə̂ taar. Nɛ̂nje tɔyn to məɛ tə̂. Ə-ddaje nɛ̂n-kusa arəjeje lo tə̂ənn le.»

¹⁶ Njê-njaje goe tə̂ le ɔtuje awje tɔkə bbe tə̂ le. Dingaje nɛ̂nje le tɔyn tokə n̂-pa narəde le ngaâ n̂-ddaje muru Pakə le.

Jeju pa tar lə marə nje-nja goe tə̂ kə̂ a kilɛ̂ ji dəwje tə̂

¹⁷ Lo-kul a, Jeju kə njê-njaje goe tə̂ kə̂ dɔku gire joo n̂-ddee n̂-teeje.

¹⁸ Kar tə̂ kə̂ disije daw dusaje nɛ̂n a, Jeju pa nan: «Tɔkɔrɔ njaa, m-pa marəse, dəw kâra horose tə̂ kə̂ aw usa nɛ̂n səm a kilam ji dəwje tə̂.»

¹⁹ Njê-njaje goe tə̂ le ooje tar nəənn le a rɔde nəəlde ang nyɔm ngaâ dunnje kutu duje kâra kâra nan: «Əman wa?»

²⁰ Jeju pa arəde nan: «Dəw kâra horose tə̂ kə̂ dɔku gire joo. Ne kə̂ nula jia naan tə̂ səm mə ka tə̂ nəənn.

²¹ Ngonn lə dəw a koy ddəw kâra baa kə tar kə̂ Makəturu lə Lubba pa dɔɛ̂ tə̂ le. A, a to ndoo nya karə dəw kə̂ a kilɛ̂ ji dəwje tə̂. Dəw le, kuje ang maji nya uta.»

Muru mə-kâra

²² Kar tə̂ kə̂ daw dusa nɛ̂n a, Jeju unn mapa, arə wooyo Lubba ngaâ arəde a, pa nan: «Ə-taaje nɛ̂n nəənn, da-rɔm â nəənn.»

²³ Goe tə̂ a, nunn əngo maann-binyə, narə wooyo Lubba ngaâ narəde narə dede tɔyn njaa dayje.

²⁴ Jeju pa arəde nan: «Yeenn to məsəm. To məsə kə̂ Lubba ɔsu nɛ̂n dɔnɔn, məsə kə̂ kayn nangə̂ mba dəwje tokə banya.

²⁵ Tɔkɔrɔ njaa, m-pa marəse: Mâ kay maann-binyə nəənn ang ngaa ndərəng ndɔ kə̂ mâ kay nɛ̂n maann-binyə kə̂ siki mə Bbe-kɔn tə̂ lə Lubba.»

Jeju pa tar lə Piyɛr kə̂ a mayn tar laa

²⁶ Dɔsuje pa wal Lubba ngaâ n̂-teeje dawje dɔ ddingiri Olibəje tə̂.

²⁷ Jeju pa arə njê-njaje goe tə̂ nan: «Sese tɔyn njaa â tusumje kinyamje. Mba n̂-dda Makəturu tə̂ lə Lubba nan: ‹Mâ tɔl nje-ngəm nɛ̂n-kuulje karə batəje le sanrɛje naan kâra kâra.›

²⁸ A bbo m-ndol go koy tə̂ ləm a, mâ kaw nginanse kete Galile.»

²⁹ Piyɛr pa arɛ̂ nan: «Le dəwje tɔyn tusije inyaije kara, əman, mâ kinyai ang.»

³⁰ Jeju pa arɛ̂ nan: «Tɔkɔrɔ, m-pa mari, til tə̂ nəənn njaa, kete bba karə kuran nɔn gɔl joo, â pa gɔl mota nan ə-gərəm ang.»

³¹ A Piyɛr təl pa arə ngəng bbay nan: «Le asə ta koy səi kara, ta pa nan m-gəri ang, mâ pa baann ndɔ kâra ang.» Kəseje tɔyn kara paje tokə baann tɔ.

Jeju duju Lubba Jetesemane

³² Jeju kə njê-njaje goe tə̂ daw teeje lo tə̂ kə̂ daw bbar nan Jetesemane a, n̂-pa narəde nan: «Isije lo tə̂ nəənn, a əman mâ kaw duju Lubba.»

³³ N̂-jin Piyɛr, Jakə, de kə Jan naw kə de. Bbəəl unn kutu kuta dɔɛ̂ ngaâ rɔɛ̂ nəəle ang.

³⁴ N̂-pa narəde nan: «Rɔm nəələm ang, tokə nɛ̂n kə̂ mâ ta koy be. Ə-naynje nəənn. Arəje bbi ɔru kəmse ang.»

³⁵ Naw ddəw əw ngaji, noso nangə̂ ngaâ n̂-duju Lubba karə bbo ddəw to a, nuta kar nɛ̂n kəm-to-ndoo nəənn kə ddang.

³⁶ N̂-pa nan: «Aba! Bɔy, əi asə ta dda nɛ̂n tɔyn, uta əngo kəm-to-ndoo nəənn dɔm tə̂ kə ddang. A ə-dda nɛ̂n kə̂ məm ndiki ang, nɛ̂n kə̂ məi əi njaa ndiki â ta ə-dda.»

³⁷ N̂-təl n̂-ddee rɔ njê-njaje goe tə̂ kə̂ mota le a, daw tibbije. N̂-pa narə Piyɛr nan: «Simɔn, aw tibbi wa? Asə ta mbətə bbi mba gɔl kar kâra be ang wa?

³⁸ Arəje bbi ɔru kəmse ang, ə-dujuje Lubba bba karə osoje mə nɛ̂n-nan tə̂ ang. Ndil dəw ndiki ta dda nɛ̂n kə̂ maji njaa, a da-rɔ ee kə singa ang.»

³⁹ Jeju təl aw ddəw əw aw duju Lubba tokə baann bbay.

⁴⁰ N̂-təl n̂-ddee rɔ njê-njaje goe tə̂ le a, ningade dɔ bbi tə̂ bbay, mba bbi uta dɔde arə ddəw kə̂ ta karə kəmde nayn takə baa goto. A n̂-gərəje tar kə̂ ta kilɛ̂ tə̂ ang.

⁴¹ N̂-təl n̂-ddee kə̂ gɔl mota laa a, n̂-dujude nan: «Ə-naynje aw tibbije wa? Aw uwaje rɔse bbay wa? Bbayɛ̂ ngaa, kar asə ngaa. Dâ kunn Ngonn lə dəw kila ji njê-nɛ̂n-ddaje tə̂ kə̂ maji ang.

⁴² Inje, arəje jawje! Nje-kunn dɔm le ddee mban ngaa.»

Duwa Jeju

⁴³ Jeju nayn aw pa tar bbay a, marə nje-nja goe tə̂ kâra horo marɛ̂je tə̂ kə̂ dɔku gire joo kə̂ ria nan Judas ddee kə dəwje tokə banya. Duwaje tɔkə kiyaje kə kakəje jide tə̂. Mbayje lə njê-poloje Lubba, njê-gərəje-Ndu kə tɔkəje lə Jiipije â ulajede.

⁴⁴ Judas le tɔjude marə nɛ̂n kə̂ nâ dda karə n̂-gərəje nɛ̂n Jeju le tokə kete. N̂-pa nan: «Dəw kə̂ m-to mbia a, to ne. Uwɛ̂je ta ə-ngəmɛ̂je kə majɛ̂ awje saa.»

⁴⁵ N̂-ddee n̂-teeje a, n̂-ngəsə kə rɔ Jeju tə̂ ngaâ n̂-pa nan: «Nje-nɛ̂n-tɔju» ngaâ n̂-to mbia.

⁴⁶ Njangə baa njaa dəwje le ilaje Jeju le uwɛ̂je.

⁴⁷ Marə nje-nja go Jeju tə̂ ɔru tɔkə kiya ngaâ tuka mbi marə nje-kula le tɔkə nje-polo Lubba ti.

⁴⁸ Jeju pa arəde nan: «Ə-ddeeje kə tɔkə kiyaje kə kakəje bba ta kuwam nɛ̂n tokə nɛ̂n kə̂ m-to dəw kə̂ maji ang wa?

⁴⁹ Kə ndɔ tɔyn mee horose tə̂ kəy-polo Lubba tə̂ maw tɔju nɛ̂n, a uwamje ang. A nɛ̂n nəənn to mba karə tar kə̂ Makəturu lə Lubba pa ddee to tar kə̂ tɔkɔrɔ.»

⁵⁰ Yeenn ngaâ njê-njaje goe tə̂ tuseje inyɛ̂je a, aynje.

⁵¹ Marə basan unn go Jeju le, n̂-kiri rɔɛ̂ kə bəl-kubbu. Daw ta kuwɛ̂ a,

⁵² n̂-tusu bəl le ninya a, nayn rɔɛ̂ baa.

Daw kə Jeju sariya tə̂ lə Jiipije

⁵³ Daw kə Jeju bbeê le tɔkə nje-polo Lubba. Lo tə̂ənn, mbayje lə njê-poloje Lubba, tɔkəje lə Jiipije kə njê-gərəje-Ndu tɔyn mbɔnje naan.

⁵⁴ Piyɛr ɔru goe a, nja ddəw əw saa ndərəng tee nɛ̂n mə ndoko tə̂ le tɔkə nje-polo Lubba le. Nisi kə mbambaje lo tə̂ənn naw ndibbi puru.

⁵⁵ Mbayje lə njê-poloje Lubba kə njê-gangəje sariya lə Jiipije le tɔyn, daw sangəje marə tar ta kunda dɔ Jeju tə̂ bba ta gangə nɛ̂n sariya-yo dɔɛ̂ tə̂, a dingaje marə tar ang.

⁵⁶ Dəwje nya paje tar-naji ngəmje dɔ Jeju tə̂ le, a tarje le awje go naan tə̂ ang.

⁵⁷ Marɛ̂je inje ngaâ ulaje tar ngəmje ta Jeju tə̂ le paje nan:

⁵⁸ «Joo tɛɛ̂ tə̂ njaa, n̂-pa nan: ‹Mâ tɔ kəy-polo Lubba nəənn kə̂ dəwje â ddaje. Mâ dda marɛ̂ kə̂ dəwje â ddaje ang mə ndɔ mota tə̂.› »

⁵⁹ A dɔ tar tə̂ nəənn le kara, tarje ləde aw go naan tə̂ ang.

⁶⁰ Yeenn ngaâ tɔkə nje-polo Lubba le in horo dəwje tə̂ ngaâ duju Jeju nan: «Tar kə̂ dəwje aw paje dɔi tə̂ nəənn, ila tə̂ ang wa?»

⁶¹ A Jeju ar ddekeke, nila tar tə̂ kâra ang. Tɔkə nje-polo Lubba le təl duje bbay nan: «Ə-to Kristə, Ngonn lə Lubba kə̂ jaw pole le wa?»

⁶² Jeju ilɛ̂ tə̂ nan: «Ye njaann, m-to Ngonnɛ̂. Â kooje Ngonn lə dəw kə̂ isi dɔ ji-kɔl Lubba tə̂ kə̂ Nje-singa-mɔngu. Nâ kin darâ mə mum tə̂ ta ddee.»

⁶³ Yeenn ngaâ tɔkə nje-polo Lubba le tiir kubbuje kə̂ rɔɛ̂ tə̂ ngaâ pa nan: «N-ndiki ta kinga marə nje-tar-naji ang ngaa.

⁶⁴ Ooje taji kə̂ n̂-taji Lubba nəənn mban. Tar ddi â əjəje dɔɛ̂ tə̂ wa?» Dede tɔyn n̂-gangəje sariya-yo dɔ Jeju tə̂.

⁶⁵ Marɛ̂je unnje kutu ti wənrə dɔɛ̂ tə̂. N̂-tɔje kəmɛ̂, n̂-bbirije jide n̂-tundɛ̂je nɛ̂n ngaâ n̂-dujeje nan: «Nân undai nəənn wa? Ə-pa arə joo.» Njê-kulaje lə tɔkə mbay tɛɛ̂je ngaâ tundaje ka-mbɔrɛ̂.

Piyɛr mayn nan n̂-gərə Jeju ang

⁶⁶ Kar tə̂ kə̂ Piyɛr nayn mə ndoko tə̂ le bəər bbay a, marə dɛnɛ̂n nje-kula le tɔkə nje-polo Lubba le ddee.

⁶⁷ Noo Piyɛr kə̂ aw ndibbi puru le a, naa kəmɛ̂ ngaâ n̂-pa nan: «Əi kara ə-nja kə Jeju kə̂ to dəw kə̂ Najarɛtə le tɔ.»

⁶⁸ A Piyɛr le mayn pa nan: «M-gərə nɛ̂n kə̂ a ta pa nəənn ang, məjə pin.» Goe tə̂ a, nin naw ta-ndoko tə̂, a kuran nɔn.

⁶⁹ A dɛnɛ̂n nje-kula le oo Piyɛr le ngaâ təl pa arə dəwje kə̂ eeje tə̂ənn nan: «Dəw nəənn to marə njê-nja go Jeju tə̂ le tɔ.»

⁷⁰ A Piyɛr təl mayn bbay. Mbɔr ang a, dəwje kə̂ eeje tə̂ənn təl paje arəje Piyɛr bbay nan: «Â to marɛ̂ kâra horode tə̂ njaa, mba əi kara ə-to dəw kə̂ Galile tɔ.»

⁷¹ A Piyɛr unda yo dɔn nɛ̂n guman nan: «M-gərə dingaw nəənn ang.»

⁷² Kar tə̂ənn njaa, kuran nɔn kə̂ gɔl joo laa. Yeenn ngaâ mə Piyɛr ole dɔ tar tə̂ kə̂ Jeju pa arɛ̂ nan: «Kete bba karə kuran nɔn kə̂ gɔl joo laa a, â mayn tar ləm gɔl mota pa nan ə-gərəm ang.» Ngaâ Piyɛr tee ddaka nɔn nya.