Marke 11 - Dɔnɔn kə̂ Siki: Tar kə̂ aw arə təbbə

Kandə lə Jeju Jerujalɛm

¹ Jeju kə njê-njaje goe tə̂ n̂-teeje ngɔsi kə Jerujalɛm, ər kə Betepaje kə Betani, dɔ ddingiri Olibəje tə̂ a, Jeju ula njê-njaje goe tə̂ joo nɔɛ̂n tə̂ kete.

² N̂-pa narəde nan: «Awje ngonn bbe tə̂ kə̂ nɔnse tə̂ yoonn. A ta teeje be a, â kingaje marə ngonn kororo kə̂ n̂-tɔɛ̂, dəw nayn isi dɔɛ̂ tə̂ ang bbay. Ə-tuteje ə-ddeeje saa arəmje.

³ Bbo dəw dujuse nan: ‹Mba ddi bba ə-ddaje nɛ̂n baann wa?› a, ilɛ̂je tə̂ nan: ‹Əbbə-dəwje â duju karə jaw saa, a nâ karə n-təl saa njangə baa.› »

⁴ Dawje ngaâ dingaje ngonn kororo kə̂ n̂-tɔɛ̂ ta-ndoko tə̂ ddaka mbɔr ddəw tə̂, ngɔsi kə ta-kəy ngaâ n̂-tuteje.

⁵ Marə dəwje kə̂ eeje tə̂ənn dujujede nan: «Ddi â aw ddaje nəənn wa? Mba ddi bba aw tutuje ngonn kororo le wa?»

⁶ Njê-njaje go Jeju tə̂ le ilaje dəwje le tə̂ tokə Jeju pa arəde le. Dəwje le inyade arə dawje kə kororo le.

⁷ Dawje kə ngonn kororo le darə Jeju. N̂-tilaje kubbuje ləde dɔ kororo tə̂ le darə Jeju aal isi dɔɛ̂ tə̂.

⁸ Dəwje nya tilaje kubbuje ləde dɔ ddəw tə̂, a marɛ̂je tətəje kamje mə mu tə̂ tilaje dɔ ddəw tə̂.

⁹ Dəwje kə̂ aw njaje nɔn Jeju tə̂ kə njê kə̂ aw njaje goe tə̂ aw uruje əkii nan: «Jɔsuje gaji Lubba! Maji karə Lubba bbar tar kə̂ maji dɔ dəw tə̂ kə̂ ddee kə ri Əbbə-dəwje.

¹⁰ Maji karə Lubba bbar tar kə̂ maji dɔ kɔn-mbay tə̂ kə̂ aw ddee, kɔn-mbay lə kajeje Dabbiti. Jɔsuje gaji Lubba kə̂ isi ddutu dara tə̂ nu!»

¹¹ Jeju tee Jerujalɛm ngaâ aw andə kəy-polo Lubba tə̂. Nila kəmɛ̂ naa nɛ̂n nɛ̂nje tɔyn mbɔrɛ̂ tə̂ ngaâ, ne kə njê-njaje goe tə̂ kə̂ dɔku gire joo le dawje kə Betani mba lo wul mban.

Kakə pigə kə̂ andə ang

¹² Lo-karɛ̂ tə̂ kə̂ dinje Betani daw dɔtuje a, bbo dda Jeju.

¹³ Noo marə kakə pigə kə̂ kamɛ̂ to tə̂, ddəw əw. Naw ngɔsi ta koo se kandɛ̂ to wa? A kamɛ̂ dɔrɔ â noo. Mba to nɛyn kandə lə pigə ang bbay.

¹⁴ Yeenn ngaâ Jeju pa arə kakə pigə le nan: «Dəw a kusa kandi ndɔ kâra ang ngaa!» Njê-njaje go Jeju tə̂ le ooje tar le.

Jeju tubba njê-nɛ̂n-labbəje kəy-polo Lubba tə̂

¹⁵ N̂-teeje Jerujalɛm a, Jeju andə kəy-polo Lubba tə̂. Nunn kutu tubba njê-nɛ̂n-labbəje kə njê-ndoko nɛ̂nje mə kəy-polo Lubba tə̂ le. N̂-tuta tabələje lə njê kə̂ aw mbəlje narɛ kə nɛ̂n-kisi lə njê-labbə dərje n̂-tila

¹⁶ ngaâ narə dəw kâra oto marə nɛ̂n nday nɛ̂n mə kəy-polo Lubba tə̂ le ang.

¹⁷ Goe tə̂ a, n̂-tɔjude nɛ̂n nan: «Lubba pa makəturu tə̂ laa nan: ‹Dâ bbar kəy ləm nan kəy duju Lubba kə̂ gəl-dəwje tɔyn a dujuje Lubba məɛ tə̂›. A sese, ə-ddaje arə ddee to lo kiya-rɔ lə njê-bbokoje wa?»

¹⁸ Mbayje lə njê-poloje Lubba kə njê-gərəje-Ndu ooje tar le ngaâ aw sangəje gusu kə̂ ta tɔl nɛ̂n Jeju. N̂-bbəəlje nya, mba nɛ̂n-tɔju laa aw gangə singa dəwje kə̂ banya le tɔyn.

¹⁹ Lo-kul a, Jeju kə njê-njaje goe tə̂ dinje mə tɔkə bbe tə̂ le n̂-teeje kə ddang.

Tar kakə pigə kə̂ oy

²⁰ Lo-karɛ̂ kə əndɔɔ kə̂ daw ndayje a, dooje kakə pigə le a, oy taar ndərəng ngirɛ̂ tə̂.

²¹ Mə Piyɛr ole dɔ tar tə̂ənn le ngaâ pa arə Jeju nan: «Nje-nɛ̂n-tɔju, oo kakə pigə kə̂ ɔru saa le â oy njan toonn.»

²² Jeju pa arəde nan: «Unnje məse arəje Lubba.

²³ Tɔkɔrɔ njaa m-pa marəse: Bbo dəw pa arə ddingiri toonn nan: ‹Ɔtu lo tə̂ nəənn aw oso baâ›, a bbo kəjə-tar dang to məɛ̂ tə̂ ang, a noo məɛ̂ tə̂ to nɛ̂n le a to a, nɛ̂n le a to njaa.

²⁴ Mba yeenn bba, m-pa marəse: Nɛ̂n tɔyn kə̂ aw dujuje Lubba mbɛɛ̂, maji karə ooje məse tə̂ to ingaje nɛ̂n le mban, a Lubba a karəse.

²⁵ Bbo arje taar ta duju Lubba, a bbo eeje kə tar kə marə dəw a, ɔruje tar le dɔɛ̂ tə̂, arəje Bɔsese kə̂ isi mə dara tə̂ ɔru tar dɔse tə̂ tɔ. [

²⁶ A bbo ɔruje tar dɔ dəwje tə̂ ang a, Bɔsese kə̂ darâ a kɔru tar majang kə̂ ə-ddaje dɔse tə̂ ang tɔ.]»

Nân bba arə singa Jeju wa?

²⁷ Jeju kə njê-njaje goe tə̂ n̂-təlje Jerujalɛm bbay. Kar tə̂ kə̂ Jeju aw nja mə kəy-polo Lubba tə̂ a, mbayje lə njê-poloje Lubba kə njê-gərəje-Ndu kə tɔkəje lə Jiipije n̂-ddeeje rɔɛ̂ tə̂.

²⁸ N̂-dujeje nan: «Nân bba ari ddəw karə ə-dda nɛ̂n nɛ̂njeenn wa? Wase nân njaa bba ari singa karə ə-dda nɛ̂n nɛ̂njeenn wa?»

²⁹ Jeju ilade tə̂ nan: «Mâ dujuse tar kâra baa. Bbo ilamje tə̂ a, mâ bbar ri dəw kə̂ arəm singa dda nɛ̂njeenn le karəse tɔ.

³⁰ Batɛm lə Jan in dda wa? In rɔ Lubba tə̂ darâ wase in rɔ dəwje tə̂ wa? Ilamje tə̂.»

³¹ A n̂-paje horode tə̂ nan: «Bbo jilaje tə̂ n-pa nan: ‹In rɔ Lubba tə̂ darâ› a, nâ pa nan: ‹Mba ddi bba ə-ndikije tə̂ kə Jan le ang wa?›

³² A bbo n-pa nan: ‹Dəwje â ula Jan.› » Ta koo a, mbayje lə njê-poloje Lubba kə Njê-gərəje-Ndu kə tɔkəje lə Jiipije le bbəəlje dəwje kə̂ banya le mba dəwje tɔyn gərəje to Jan to nje-kila mbər tar lə Lubba.

³³ Yeenn ngaâ dilaje Jeju tə̂ nan: «N-gərə ang.» A Jeju pa arəde nan: «Əman kara mâ bbar ri dəw kə̂ arəm singa ta dda nɛ̂njeenn le karəse ang tɔ.»