Marke 10 - Dɔnɔn kə̂ Siki: Tar kə̂ aw arə təbbə

Tar kinya-naan lə dɛnɛ̂n de kə dingaw

¹ Goe tə̂ a, Jeju ɔtu lo tə̂ənn aw nangə tə̂ kə̂ Jude, tura Jurdɛn tə̂. A dəwje kə̂ banya təl mbɔnje naan rɔɛ̂ tə̂ bbay, arə naw tɔjude nɛ̂n tokə naw dda kə ndɔ tɔyn.

² Parijinyɛje awje rɔ Jeju tə̂ dujeje tar ta nɛɛ̂n nɛ̂n nan: «Ndu arə ddəw dingaw ta tubba dɛnɛ̂n laa wa?»

³ Jeju ilade tə̂ nan: «Mɔyijə unn ndu arəse nan ddi wa?»

⁴ Dilɛ̂je tə̂ nan: «Mɔyijə arə ddəw dingaw karə dda makəturu tɔju nɛ̂n to ninya dɛnɛ̂n laa bba ta ninya dɛnɛ̂n laa le.»

⁵ Jeju pa arəde nan: «Mba mə-kətərə ləse â Mɔyijə uja ndu nəənn le makəturu tə̂ arəse.

⁶ A kunn-kutu nɛ̂nje tə̂ kə̂ Lubba dda le, n̂-dda dingaw de kə dɛnɛ̂n.

⁷ Mba yeenn bba, dingaw a kinya bɔɛ̂je kə kɔɛ̂nje ta nayn kə dɛnɛ̂n laa,

⁸ ta dede joo kəm, dâ ddeeje to da-rɔ kə̂ kâra baa ngaa. Yeenn a, n̂-toje to dəwje kə̂ joo ang ngaa, a n̂-toje to da-rɔ kə̂ kâra baa.

⁹ Nɛ̂n kə̂ Lubba mbɔn naan tə̂ a, maji karə dəw kayn hore ang.»

¹⁰ Kar tə̂ kə̂ n̂-teeje kəy a, njê-njaje go Jeju tə̂ le təl dujeje tar dɔ tar tə̂ nəənn le bbay.

¹¹ Nilade tə̂ nan: «Dəw kə̂ tubba dɛnɛ̂n laa, a taa marɛ̂ dda lo-to-majang mba dɛnɛ̂n kə̂ dɔngɔr kə̂ n̂-tubbɛ̂ le.

¹² Bbo dɛnɛ̂n mbətə ngawɛ̂je, a təl taa marə dingaw a, dɛnɛ̂n le dda lo-to-majang ang.»

Jeju bbar tar kə̂ maji dɔ ngannje tə̂

¹³ Dəwje ddeeje kə ngannje karə Jeju ɔrude kə jia, a njê-njaje goe tə̂ aw inje kə dəwje le.

¹⁴ Jeju oo nɛ̂ɛnn le a, nəəle ang ngaâ pa arə njê-njaje goe tə̂ le nan: «Inyaje ngannje kə̂ mbatə arəje ddeeje rɔm tə̂ bbo ɔkujede ddəw ang. Mba Bbe-kɔn lə Lubba to mba dəwje kə̂ toje tokə dede.

¹⁵ Tɔkɔrɔ njaa m-pa marəse, dəw kə̂ taa Bbe-kɔn lə Lubba tokə lə ngonn ang, a kandə tə̂ ndɔ kâra ang.»

¹⁶ Yeenn ngaâ nuwa ngannje le kə karɛ̂ tə̂, nila jia dɔde tə̂ ngaâ n̂-bbar tar kə̂ maji dɔde tə̂.

Jeju kə nje-nɛ̂n-kinga

¹⁷ Kar kə̂ Jeju unn ddəw ta kɔtu a, marə dingaw ddee kə ngɔru ɔsu məkəjə-gɔlɛ̂ nɔɛ̂n tə̂ duje nan: «Nje-nɛ̂n-tɔju kə̂ maji, ddi â mâ dda bba mâ kinga təbbə kə̂ to kə ndɔ kə ndɔ wa?»

¹⁸ Jeju ilɛ̂ tə̂ nan: «Mba ddi bba ə-bbarəm to dəw kə̂ maji wa? Dəw kə̂ maji goto, Lubba kâra baa â maji.

¹⁹ Ə-gərə nduje kə̂ nan: Ə-tɔl dəw ang, ə-dda lo-to-majang ang, ə-bboko ang, ə-pa tar-naji kə̂ to ngəm ang, ərə dəw ə-taa nɛ̂n laa ang, ə-wal bɔije kə kɔinje.»

²⁰ Dingaw le ilɛ̂ tə̂ nan: «Nje-nɛ̂n-tɔju, maw ngəm ndujeenn kə kasəm baa ndərəng bbokənɛn.»

²¹ Jeju ɛɛ̂ a, ndike ngaâ pa arɛ̂ nan: «Nɛ̂n kâra ngaa â dui: Aw labbə nɛ̂nje tɔyn kə̂ inga ta ə-kayn narɛ̂ dangətəje a, â kinga marə dam narɛ darâ. Goe tə̂ a, ə-ddee unn gom.»

²² A kar tə̂ kə̂ dingaw le oo tar le a, rɔɛ̂ nəəle ang ngaâ ɔtu to ndoo ndoo, mba nɛ̂n-kingaje laa banya nya.

²³ Jeju ila kəmɛ̂ aa nɛ̂n lo mbɔrɛ̂ tə̂ tɔyn ngaâ pa arə njê-njaje goe tə̂ nan: «To ngəng nya kə njê-nɛ̂n-kingaje karə dandəje Bbe-kɔn tə̂ lə Lubba.»

²⁴ Tar le gangə singa njê-njaje goe tə̂ le. A Jeju pa arəde bbay nan: «Ngannəm, to ngəng nya ta kandə Bbe-kɔn tə̂ lə Lubba!

²⁵ Karə jambal andə buwa suwa tə̂ ngəng ang wa? Ta karə nje-nɛ̂n-kinga andə Bbe-kɔn tə̂ lə Lubba a ngəng nya.»

²⁶ Tar le aw dum dɔ njê-njaje goe tə̂ le kə kete kete. N̂-dujuje naan nan: «Yeenn a, nân bba a kasə kinga kaji wa?»

²⁷ Jeju aade ngaâ pa arəde nan: «Nɛ̂ɛnn, to nɛ̂n kə̂ nya dəwje. A nya Lubba ang. Mba Lubba asə ta dda nɛ̂n tɔyn.»

²⁸ Yeenn ngaâ Piyɛr pa arɛ̂ nan: «Oo! Jinya nɛ̂nje tɔyn, a junn goi.»

²⁹ Jeju ilɛ̂ tə̂ nan: «Tɔkɔrɔ m-pa marəse: Dəw kə̂ inya kəy laa, inya ngakɔɛ̂nje kə̂ dingaw wase ngakɔɛ̂nje kə̂ dɛnɛ̂n, kɔɛ̂nje wase bɔɛ̂je, ngannɛ̂ wase ndɔɔje laa mbam ddəm mba Tar kə̂ Maji ddəm

³⁰ a təl kinga nɛ̂njeenn asə gɔl kɔr kâra bbasinɛn nəənn. Nâ kinga kəy, ngakɔɛ̂nje kə̂ dingaw kə ngakɔɛ̂nje kə̂ dɛnɛ̂n, kɔɛ̂njedede, ngannje kə ndɔɔje ngaâ dəwje a kulaje kəmɛ̂ ndoo tə̂ tɔ. A nâ kinga təbbə kə̂ to kə ndɔ kə ndɔ mə ndɔje tə̂ kə̂ aw ddeeje.

³¹ Nya lə dəwje kə̂ toje to dəwje kə̂ dɔngɔr, a ddeeje to dəwje kə̂ dɔ guku. A dəwje kə̂ dɔ guku, a ddeeje to dəwje kə̂ dɔngɔr.»

Jeju təl pa tar koy kə tar ndol laa bbay

³² Jeju kə njê-njaje goe tə̂ daw dawje kə Jerujalɛm ngaâ noso nɔnde tə̂ kete. Kəjə-tar tɔl njê-njaje goe tə̂ le ngaâ bbəəl uta dɔ dəwje kə̂ aw unnje gode le tɔ. Jeju təl ɔru njê-njaje goe tə̂ kə̂ dɔku gire joo le aw kə de ər kâra tə̂ ngaâ unn kutu ta pa tar nɛ̂n kə̂ a ta kingɛ̂ karəde nan:

³³ «Ooje, jaw jawje kə Jerujalɛm. Dəwje a kilaje Ngonn lə dəw ji mbayje tə̂ lə njê-poloje Lubba kə ji njê-gərəje-Ndu tə̂. Dâ gangə sariya-yo dɔɛ̂ tə̂ ngaâ dâ kilɛ̂ ji dəwje tə̂ kə̂ gərəje Lubba ang.

³⁴ Dâ kɔjɛ̂je koko nɛ̂n, dâ tije wənrə dɔɛ̂ tə̂, dâ tundɛ̂je kə ndəy, dâ tɔlɛ̂je ngaâ ndɔ mota laa a, nâ ndol.»

Jan de kə Jakə n̂-dujuje marə nɛ̂n ji Jeju tə̂

³⁵ Goe tə̂ a, Jakə de kə Jan kə̂ n̂-toje to ngann lə Jebede n̂-ddeeje rɔ Jeju tə̂, n̂-paje darɛ̂je nan: «Nje-nɛ̂n-tɔju, n-ndiki karə ə-dda nɛ̂n kə̂ ja ta duji nəənn.»

³⁶ Jeju dujude nan: «Ddi â ə-ndikije karə m-dda marəse wa?»

³⁷ Dilɛ̂je tə̂ nan: «Arə jeje kə̂ joo nəənn, kâra isi dɔ ji-kɔli tə̂, a kâra isi dɔ ji-gəli tə̂ mə piti tə̂ ləi.»

³⁸ Jeju ilɛ̂ tə̂ nan: «Ə-gərəje nɛ̂n kə̂ aw dujuje ang. A kasəje ta kay əngo kəm-to-ndoo kə̂ mâ ta kay wa? A kasəje ta kinga batɛm kəm-to-ndoo kə̂ mâ ta kinga wa?»

³⁹ Dilɛ̂je tə̂ nan: «Ja kasə.» A Jeju pa arəde nan: «Tɔkɔrɔ, â kayje əngo kəm-to-ndoo kə̂ mâ ta kay, â kingaje batɛm kəm-to-ndoo kə̂ mâ ta kinga njaa.

⁴⁰ A tar kisi dɔ ji-kɔləm tə̂ wase dɔ ji-gələm tə̂ to tar ləm ang. Lo le to mba njê kə̂ Lubba gɔl mbade.»

⁴¹ Kəseje kə̂ dɔku le ooje tar le a, wungu ɔnde dɔ Jakə de kə Jan tə̂ le.

⁴² Yeenn ngaâ Jeju bbarde tɔyn ngaâ pa arəde nan: «Ə-gərəje to njê kə̂ dəwje aw oojede to mbay-bbeje aw ddaje dingaw dɔ dəwje tə̂ ngaâ dəwje kə̂ bo aw ddaje dəwje maji ang.

⁴³ A horose tə̂, maji karə to tokə baann ang. Dəw kə̂ ndiki ta ddee to dəw kə̂ bo horose tə̂ a, maji karə n̂-ddee to nje-kula ləse.

⁴⁴ Dəw kə̂ horose tə̂ kə̂ ndiki ta to dəw kə̂ dɔngɔr a, maji karə n̂-ddee to bbərə ləse tɔyn.

⁴⁵ Mba Ngonn lə dəw ddee karə dəwje ddaje kula arɛ̂ ang. N̂-ddee ta dda kula karə dəwje, ta kunn rɔɛ̂ to nɛ̂n-kuka dɔ dəwje tokə banya.»

Jeju aji Bartime arə oo lo

⁴⁶ Jeju kə njê-njaje goe tə̂ n̂-teeje Jeriko. Ne kə njê-njaje goe tə̂ kə dəwje kə̂ banya daw teeje mə tɔkə bbe tə̂ le ta kɔtu a, marə nje-kəm-tɔ kə̂ to ngonn lə Time, ria nan Bartime isi mbɔr ddəw tə̂ aw kɔy nɛ̂n.

⁴⁷ Noo nan Jeju kə̂ Najarɛtə â aw nday a, nunn kutu kuru əkii nan: «Jeju, Ngonn lə Dabbiti, oo kəm-to-ndoo ləm bbo!»

⁴⁸ Dəwje nya inje saa karə nutu tɛɛ̂, a nuru əkii kə taar bbay nan: «Ngonn lə Dabbiti, oo kəm-to-ndoo ləm bbo!»

⁴⁹ Jeju ar lo kâra ngaâ pa nan: «Ə-bbarɛ̂je.» Dəwje le bbarɛ̂je ngaâ paje arɛ̂ nan: «Ə-dda singa in taar, naw bbari!»

⁵⁰ N̂-bin tɔkə kubbu laa nila nangə̂, nubba nangə nin nar taar ngaâ naw rɔ Jeju tə̂.

⁵¹ Jeju duje nan: «Ddi â ə-ndiki karə m-dda mari wa?» Nje-kəm-tɔ le ilɛ̂ tə̂ nan: «Nje-nɛ̂n-tɔju, m-ndiki ta təl koo lo!»

⁵² Jeju pa arɛ̂ nan: «Aw, mə-kunn ləi aji!» Njangə baa goe tə̂ a, n̂-təl noo lo ngaâ nunn go Jeju ddəw-boô.