Marke 1 - Dɔnɔn kə̂ Siki: Tar kə̂ aw arə təbbə

Jan-Batisi duju dəwje karə turuje məde

¹ Kunn-kutu Tar kə̂ Maji kə̂ dɔ Jeju-Kristə Ngonn lə Lubba tə̂ â nəənn.

² Lubba pa makəturu tə̂ lə Ejayi kə̂ to nje-kila mbər tar laa nan: «Əman Lubba, mâ kula marə nje-kula ləm nɔin tə̂ karə dda ddəw ləi ari.

³ Dəw le â aw uru əkii mə kɔr tə̂ nan: ‹Ə-ddaje ddəw lə Əbbə-dəwje. Arəje ddəwje laa ndɔjuje kə majɛ̂.› »

⁴ Yeenn bba Jan-Batisi unda lo tee mə kɔr tə̂, naw nila mbər narə dəwje karə ingaje batɛm ta tɔju to n̂-turuje məde bba karə tar majang ɔru dɔde tə̂.

⁵ Dəwje tɔyn kə̂ dɔ nangə Jude tə̂ kə njê kə̂ Jerujalɛm dawje rɔɛ̂ tə̂. N̂-paje majang ləde kə ddaka darəje Jan ddade batɛm maann Jurdɛn tə̂.

⁶ Jan ula kubbu kə̂ n̂-dda kə biin jambal ngaâ n̂-tɔ bbəre kə kula əndaar. Nɛ̂n-kusa laa to əbeteje kə təjə.

⁷ Nila mbər narə dəwje nan: «Dəw kə̂ aw ddee gom tə̂ ngəng utam. Masə ta kula dɔm nangə̂ tutu kula nɛ̂n-gɔl laa ang.

⁸ Əman m-ddase batɛm maann, a ne, nâ ddase batɛm Ndil-mə-nda.»

Jan dda Jeju Batɛm

⁹ Karɛ̂ tə̂ənn, Jeju in Najarɛtə nangə tə̂ kə̂ Galile ddee ngaâ Jan ddɛɛ̂ batɛm maann Jurdɛn tə̂.

¹⁰ A kar tə̂ kə̂ Jeju in mə maann tə̂ le aw tee kə ddaka a, oo ta dara kə̂ təəyn ngaâ Ndil aw ddisi kə dɔɛ̂ tə̂ tokə lə dər.

¹¹ Marə ndu bbar mə dara tə̂ nan: «Ə-to ngonnəm kə̂ m-ndikii nya. Əi â minga rɔ-nəəl mbai.»

Əsu nan Jeju mə kɔr tə̂

¹² Njangə baa goe tə̂ a, Ndil le aw kə Jeju le mə kɔr tə̂.

¹³ N̂-nayn mə kɔr tə̂ le ndɔ dɔsɔ ngaâ Satan nɛɛ̂n. N̂-nayn kə daje kə̂ muû ngaâ anjəje aw ddaje saa.

Jeju unn kutu kula laa Galile

¹⁴ Go kila tə̂ kə̂ dila Jan kəy-kula tə̂ a, Jeju aw Galile aw ila mbər Tar kə̂ Maji lə Lubba.

¹⁵ N̂-pa nan: «Kar kə̂ Lubba ɔju le asə ngaâ kɔn-mbay lə Lubba ddee ngɔsi ngaa. Ə-turuje məse bbo ooje məse tə̂ kə Tar kə̂ Maji.»

¹⁶ Kar tə̂ kə̂ Jeju aw nja kar tɔkə dangə tə̂ kə̂ Galile a, noo njê-ndɔn-maannje joo. To Simɔn de kə ngokɔɛ̂n Andere â daw dilaje ddəngə daw ddaje nɛ̂n ndɔn mə tɔkə dangə tə̂ le.

¹⁷ Jeju pa arəde nan: «Unnje gom a, mâ dda karə ə-ddeeje to njê-ddaje ndɔn dəwje.»

¹⁸ Njangə baa njaa, dinyaje ddəngəje ləde le, dunnje goe.

¹⁹ Jeju ngəsə kə kete tɛn be a, oo Jakə de kə ngokɔɛ̂n Jan kə̂ toje to ngann lə Jebede mə tɔkə to tə̂ ləde, daw mɔsɛje ddəngəje ləde.

²⁰ Njangə baa njaa Jeju le bbarde. Dinyaje bɔdede Jebede kə njê-kulaje mə tɔkə to tə̂ le a dunnje go Jeju.

Jeju tubba ndil kə̂ maji ang rɔ marə dingaw tə̂

²¹ Jeju kə njê-njaje goe tə̂ dawje bbe tə̂ kə̂ Kapɛrnawum. Ndɔ-kuwa-rɔ a, nandə mə kəy mbɔn-naan tə̂ lə Jiipije ngaâ nunn kutu tɔju nɛ̂n.

²² Gusu kə̂ naw tɔju nɛ̂n nɛ̂n le gangə singa dəwje kə̂ aw ooje nɛ̂n-tɔju laa le. Mba ne, naw tɔju nɛ̂n tokə lə mbay-bbe bbo n̂-tɔju nɛ̂n le tokə njê-gərəje-Ndu aw tɔjuje ang.

²³ Karɛ̂ tə̂ənn njaa, mə kəy mbɔn-naan tə̂ le, marə dingaw kə̂ ndil kə̂ maji ang isi məɛ̂ tə̂ ee tə̂ənn tɔ. Dingaw le uru əkii nan:

²⁴ «Jeju kə̂ Najarɛtə, ddi â ə-ndiki ta dda kə je wa? Ə-ddee ta tɔlje wa? M-gəri kə majɛ̂. Ə-to dəw kə̂ Lubba undai dang ngaâ ulai.»

²⁵ Jeju ndangə ndil kə̂ maji ang le, nunn ndu narɛ̂ nan: «Utu tai bbo ə-tee rɔ dingaw tə̂ nəənn kə ddang.»

²⁶ Ndil kə̂ maji ang le yəkə dingaw le kə singa ngaâ unda əkii tee nɛ̂n kə ddang.

²⁷ Dɔ dəwje le tɔyn ayn arə n̂-dujuje naan nan: «Ddi â be nəənn wa? Nɛ̂n-tɔju kə̂ siki kə singa kɔn-mbay â nəənn. Dingaw nəənn unn ndu arə ndilje kə̂ maji ang njaa kara ooje tɛɛ̂ wa?»

²⁸ Yeenn ngaâ ri Jeju aw bbar dɔ nangə Galile tə̂ tɔyn.

Jeju aji mum Piyɛrje kə̂ rɔɛ̂ toe

²⁹ Jeju in kəy mbɔn-naan tə̂ lə Jiipije le tee ngaâ ne kə Jakə kə Jan dawje kəy lə Simɔn de kə Andere.

³⁰ Mum Simɔnje kə̂ dɛnɛ̂n to tuwa rɔ-to tə̂, rɔɛ̂ tunga nya. A tee kə̂ Jeju tee be a, n̂-pa tarɛ̂ darɛ̂.

³¹ Jeju ddee ngɔsi saa, uwa jia arə nin taar. A rɔɛ̂ kə̂ tunga le wul ngaâ nunn kutu karəde nɛ̂n-kusa.

Jeju aji njê-rɔ-toje nya nya

³² Lo-kul tə̂ kə̂ kar andə a, dəwje otoje njê-rɔ-toje tɔyn kə njê kə̂ ndilje kə̂ maji ang toje məde tə̂ ddeeje kə de rɔ Jeju tə̂.

³³ Dəwje tɔyn kə̂ mə tɔkə bbe tə̂ le mbɔnje naan ta-kəy tə̂ le.

³⁴ Jeju aji njê-rɔ-toje nya nya ngaâ tubba ndilje kə̂ maji ang rɔ marɛ̂je tə̂. A ninya ddəw narə ndilje le n̂-paje tar ang, mba ndilje le gəreje kə majɛ̂.

Jeju ila mbər Tar kə̂ Maji Galile

³⁵ Lo-karɛ̂ tə̂ kə əndɔɔ kə̂ lo nayn uja ang bbay a, Jeju in mə tɔkə bbe tə̂ le tee aw lo tə̂ kə̂ iya rɔɛ̂ aw duju Lubba.

³⁶ Simɔn de kə njê-marɛ̂je dawje kə ngɔru ta sangɛ̂.

³⁷ Dingɛ̂je ngaâ n̂-paje darɛ̂ nan: «Dəwje tɔyn aw sangije.»

³⁸ A Jeju pa arəde nan: «Jawje kə̂ ddang, jawje bbeje tə̂ kə̂ mbɔrje tə̂ nəənn. Maji karə mila mbər tar nəənn nunn tɔ. Mba yeenn njaa Lubba ulam mbɛɛ̂.»

³⁹ Yeenn ngaâ n̂-nja nangə Galile tə̂ tɔyn. Naw tɔju Tar kə̂ Maji mə kəy mbɔn-naanje tə̂ lə Jiipije kə̂ nangə tə̂ənn ngaâ n̂-tubba ndilje kə̂ maji ang.

Jeju aji marə nje-banji

⁴⁰ Marə nje-banji ddee rɔ Jeju tə̂, ɔsu məkəjə-gɔlɛ̂ nɔɛ̂n tə̂ ngaâ dda rɔɛ̂ to ndoo nɔn gɔlɛ̂ tə̂ nan: «Bbo ə-ndiki a, a kasə ta dda karə m-ddee maji.»

⁴¹ Jeju le ooe a, n̂-ddɛɛ̂ ndoo ngaâ nula jia nɔrɛ̂ nɛ̂n n̂-pa nan: «M-ndiki tə̂, ə-ddee maji.»

⁴² Njangə baa njaa a, banji le goto rɔ dingaw tə̂ le arə rɔɛ̂ ddee maji.

⁴³ Jeju ndɔru mbi dingaw le ngaâ njangə baa goe tə̂ a, tubbɛ̂, n̂-pa narɛ̂ nan:

⁴⁴ «Oo kə majɛ̂, ə-pa tar nəənn arə dəw ang. A aw tɔju rɔi arə nje-polo Lubba. Goe tə̂ a, arə nɛ̂n-polo kə̂ Ndu lə Mɔyijə pa le, mba kɔru nɛ̂n naji ləi karəde.»

⁴⁵ Dingaw le ɔtu a, aw ila mbər nɛ̂nje kə̂ ingɛ̂ le loje tə̂ tɔyn. Mba yeenn bba Jeju asə ta tɔju rɔɛ̂ marə tɔkə bbe tə̂ ang ngaa. Nisi sayn kə bbeje, lo-kiyɛ̂ tə̂ ngaâ dəwje inje loje tə̂ dang dang ddeeje rɔɛ̂ tə̂.